1 Siyiex hoik jhi aux yaox, jhak heue, Nawh Cao hoik phan ti deuh cub sido khankix ka daux bawg yam jah rib ti glaoh khaix hoik pat simiang ka rib khankix heue. 2 Yam hoik ih sido khankix ka rib haktiex an mai Aux hoik ah nin, “Siyiex leeing ju eue, aux khyox khaw Maix pluat ploi phimap liak, mawh kheu Yakop hoik iak riang rao, nawh tak sang pon cung yuh ka mawx lie?” 3 Siyiex leeing ju hoik deeh tieh rhawm tix ka son grawng in “An tak ang lai pon ti koe heue. “Siyiex ah nan heue.

4 Siyiex hoik baox jhi aux yaox, jhak heue, Siyiex tak kok ngu krax pa kha rhawm hoek mai ngu an hoik proe ti ih dee pa kied raux khankix mai tak sang gleeing yuh haktiex dee pang dee kwang khankix heue. 5 Aux ah nin “Siyiex leeing ju eue, aux khyox khaw Maix deeh yoi ti deuh an liak, mawh kheu Yakop hoik iak riang rao, nawh tak sang pon cung yuh ka mawx lie? 6 Siyiex leeing ju hoik deeh tieh rhawm rhi tix ka son grawng in, “In tak baox deeh ang lai koe heue. “Siyiex leeing ju ah nan heue.

7 Nawh Cao hoik baox jhi aux yaox, jhak heue, Siyiex hoik cung ti ot ka piang guh veng, pa hoik yuh tix ka maox pa tiag an tix nyaing tau ka daux taix Nawh Cao heue. 8 Siyiex chawk ah nin, “Amot eue, mawh yaox maix ka ceu patix lie? “Mai aux deeh ah nin yaox maox pa iak tix nyaing heue. Khaix an Siyiex deeh ah nin jhak heue, Aux tak preue ti deuh maox pa tiag an tix nyaing ka daux sinax pui aux khankix pa mawh ceu pui Isarelax heue. Aux tak ang lai gun yeung ka kix khaix in baox tix bawg heue.” 9 Dee pa lhaong Icak khankix tak sang mawh dee pa yiien mai dee pa singax pui Isarelax khankix, tak sang mawh pa laux leeing heue. Aux tak sang yaog ti kaoh tau mai vaid ka piang nyiex ma Yerobom heue.

10 Cao giex kaing li Amazi khaing daux veng Betelax, hoik ploi pui hu ka Yerobom pa mawh simiang haktiex Isarelax, ah nin, “Amot hoik keud ti sang yuh pa caox ka piang maix daux sinax nyiex ma ceu pui Isarelax khankix heue, Meung in ang pon kan ti kham gumlox nawh heue. 11 “Amot hoik ah nin, “Yerobom tak sang yum ka vaid mai ceu pui Isarelax tak sang mawh pa giex laung ti hu khaing daux haktiex cao kix heue.” 12 Amazi ah nin ka Amot maix pa mawh cao jhai eue, hu heue. To ka meung Yudax heue. Cang jheeh tix son pa ih tan mai krai lox jhai tan heue. 13 Khaix in paw lai baox krai lox jhai ka daux veng Betelax awx, ka dee an koe dee pa singax singeh simiang mai dee an koe nyiex haw ot simiang heue. 14 Amot deeh pawk lox ka Amazi ah nin, aux ang tie mawh cao jhai mai ang tie mawh kawn simex cao jhai. Aux mawh ngie cao pa liang yung mai cao pa priex khaox ruh heue. 15 Siyiex hoik laug aux, yam kawn hawt aux khaix cub phung yung mai Siyiex ah nin ka aux, maix hu krai lox jhai ka pui Aux khankix pa mawh ceu pui Isarelax heue.” 16 Amazi eue, yam in nghiet ka gumlox Siyiex awx. Maix lai ah nin, “Paw doh krai lox jhai ka ceu pui Isarelax mai paw jah lox jhai ka nyiex ma Icak awx.” 17 “Mawh kheu nan, Siyiex ah nin moeng maix tak sang mawh bun pa coh kaux ka daux veng, kawn simex kawn bun maix khankix, tak goh ti yum ka vaig, haktiex maix tak sang mawh pa tiag ti gwieh ka maox maix tak yum ka daux haktiex pa seeing brai mai ceu pui Isarelax tak sang mawh pa giex ti hu tete khaing daux haktiex cao kix heue.”