1 Pa ot nyawm nyiem ka daux veng Zion mai pa een rhawm tix ot kaux cong ka gawng Samarix, ka kaw pa ting min khankix, pa mawh cao kaing ting ka daux ceu pui, ka pa peung nyiex ma ceu pui Isarelax khankix kah, tak koe krax kha rhawm heue. 2 Pex hu ka plak veng Khalanie mai jhak ti yaox mai kaoh khaing tan dee hu ka veng ting Hamat heue. Khaix an lih hu ka veng Gilat, ka dee ot pui Philitix khankix heue. Mawh nie lheu mhawm meung ankix khaing meung pa ot pex lie? Mawh nie lheu vieh va dee kwang kix khaing dee kwang pex lie? 3 Pex pa greed singaix pa caox luan singai, pa kieh dee ngawm krax pa kin hoek dee dex koe krax kha rhawm heue. 4 Pa it ka piang ku nga sang khankix, pa nyat tix ka piang bi tawm, pa ih kawn yung iak khankix khaing daux cub phung yung mai pa teei ti ih kawn mawie iak khaing daux kawg mawie, 5 pa silao ti ah lai rhax tau mai tah ting khankix mai pa tang yuh ting pa khraox son tokaux tix, awm simiang Davit, 6 pa nyaux rawm plix siiet ka kawk ting mai pa kraix tokaux tix ka rawm bee pa kied mhawm mai ang tie koe krax khi rhawm son krax pa kha rhawm ceu pui Yosiep khankix heue. 7 Mawh kheu nan, kix tak sang yaox ti hu laig ka daux krax pa giex laung phao voe ka daux cub pa giex laung an khankix mai pui ankix pa nyhot tix ka daux bang pawie tak sang that grai hu heue. 8 Siyiex pa mawh Siyiex hoik tiextu ka tokaux cao tix, pa mawh Siyiex cao kru naing raoma mai ah nin “Aux seeing ka krax pa ting min Yakop mai koeng ka nyiex haw nawh khankix, mawh kheu nan, Aux tak sang ap ti tawx veng nawh mai can pa koe ka daux an khankix khawmuik ka pui koeng heue. 9 Yam an phan pui kawn deuk kao kaux ka daux nyiex tix lhang, kix tak sang yum khawmuik heue. 10 Yam teei paox nyiex kaw pa yum an ti gleeing tokaux yum an khankix mai pui pa sang gah tokaux yum an khankix lih khaing daux nyiex, nawh tak chawk ka pui pa ot ka daux nyiex ah nin “Mawh kawn koe pui tix kaux kaux mai maix lie? “Khaix an, nawh tak ah nin “Ang lai koe pie tix kaux kawx heue. “Nawh baox ah nin paw lai nye, grawh grawng nawh, ex ang lai koe akhwang ti krai ceu kaux Siyiex heue. 11 Grawh grawng nawh, jhak heue. Siyiex tawx gumlox tix lih, nyiex pa ting lhaong tak mawh pa yieh ti laux mai nyiex pa iak tak phawng hu ku plak heue. 12 Mawh chix to brung ka piang rang lie? Mawh chix thai pui ka mawie ka piang rang an lie? Pex hoik deeh teei pa rahsee mawh ghin pa song mai hoik deeh tieh pa khaw caw mawh plix lhax sup song heue. 13 Pex pa koe krax gaux rhawm ka daux Lawdebarax, pa ah nin, “Mawh ang yix hoik teei ti koe sibrawm ka riang rao tokaux yix lie?” 14 Jhak heue, nyiex ma ceu pui Isarelax khankix eue, Aux tak sang yaog ceu pui tix cub hoek ti puing ka pex heue. Siyiex Cao kru naing raoma ah nin “Kix tak sang yuh krax pa kha rhawm ka pex, jah khaing daux diang laig ka veng Hamat, tom hoek ka rawm klawng daux ngawd Arabax heue.