1 Tu-in Levi mite sung pan Levi’ tapa Kohath, Kohath’ tapa Izhar, Izhar’ tapa Korah leh Reuben mite sung Reuben’ tapa Eliab, Eliab’ tapa Dathan leh Abiram leh Peleth’ tapa On, 2 hih mite in pawl kai uh hi; Israel mite sung panin mi’ theihkim, mihon sung panin a kiteel, mihonte a makai mi zanih leh sawmnga tawh Moses’ mai-ah ding uh hi; 3 Moses leh Aaron langpangin amaute kikaikhawm uh a, amaute kiangah, “Khengval lua uh teh! Mihon khempeuhte a milip-in siangtho uh a, amaute lakah Topa om hi; bang hangin Topa’ mi honpite’ tungah nomau kiliansak tawm na hi uh hiam?” ci uh hi. 4 Moses in tua thu a zak ciangin boksuk hi; 5 amah in Korah leh a pawlte khempeuh kiangah, “Zing ciangin Topa in a siangtho ahi mi, ama’ aa ahi mi hong lakin, ama kiangah pai sak ding hi; amah in a teel ding mipa ama kiangah pai sak ding hi. 6 Hih bangin gamta un: Korah leh a pawlte khempeuh in paknamtui beel la un; 7 zing ciangin Topa’ mai-ah tua beelte’ sungah mei koihin, mei tungah paknamtui koih un; tua ciangin Topa’ teel mi in a siangtho hong hi ding hi. Levi’ tapate aw, khengval lua uh teh!” a ci hi. 8 Moses in Korah kiangah, “No Levi mite aw, tu-in za un; 9 Israel mite’ Pasian in ama kiangah hong paipih ding, Topa’ biakbuk sungah nasep sem ding, mi honte’ na sem dingin amau’ mai-ah a ding dingin Israel mi honte kiang panin hong khenkhiatna leh 10 nang leh na sanggamte ahi Levi’ mite ama kiangah hong paipihna, hawmthawh lai na hi hiam? Siampi nasepna zong deih lai na hi hiam? 11 Tua ahih ciangin nang leh na pawlte khempeuh hih lai-ah na kikaihkhopna uh in Topa langpan’na ahi hi; note in na phunsan uh Aaron pen bang mi hi mawk ahi hiam?” a ci hi.

12 Moses in Eliab’ tapa Dathan leh Abiramte sam sak hi; amaute in, “Kong pai kei ding uh hi. 13 Kote tungah nangmah ulian-in kibawl tawmin, gamlakah kote hong that dingin bawngnawi leh khuaizu a luan’na gam panin nong paikhiatpihna thu hawmthawh lai na hi hiam? 14 Tua tham loin nangmah in bawngnawi leh khuaizu a luan’na gamah kote hong paipih loin, lote leh leenggui lote zong nong luah sak kei hi. Hih mite’ mit khel khia ding na hi hiam? Kong pai kei ding uh hi,” a ci hi.

15 Moses heh mahmah a, Topa kiangah, “Amau’ biakna thupi ngaihsut kei in. Amaute tung panin la khat zong la loin, amaute khat zong ka siasak kei hi,” a ci hi. 16 Tua ciangin Moses in Korah’ kiangah, “Nang leh na pawlte, nang leh amaute, Aaron tawh zing ciangin Topa’ mai-ah hong om un; 17 note in na milip-un na paknamtui beel ciat uh la-in, a sungah paknamtui koih un la, Topa’ mai-ah na paknamtui beel ciat uh, paknamtui beel zanih leh sawmnga paipih un; Aaron leh nangmah in zong na paknamtui beel tuak uh paipih un,” a ci hi. 18 Tua ahih ciangin a milip-un a paknamtui beel ciat uh la a, tuate sungah mei koihin a tungah paknamtui koih uh a, kikhopna buk kongah Moses leh Aaron tawh ding uh hi. 19 Tua ciangin Korah in amaute’ lang khat, kikhopna buk kongah mihonte khempeuh khawm hi. Topa’ minthan’na mihon khempeuhte tungah kilang hi.

20 Tua ciangin Topa in Moses leh Aaron kiangah, 21 “Amaute tomno sungin ka beisak theih nadingin hih mihonte lak panin kihem un,” a ci hi. 22 Amaute boksuk uh a, “Pasian, mi khempeuhte tungah nuntakna a pia Pasian aw, mi khat khial ding a, mihon khempeuhte tungah nang heh ding na hi hiam?” a ci uh hi. 23 Topa in Moses kiangah, 24 ”Mihonte tungah hih bangin gen in, Korah, Dathan leh Abiramte’ omna kiim panin paikhia un, ci in,” a ci hi.

25 Tua ciangin Moses ding-in Dathan leh Abiram kiangah pai hi; Israel upate in amah zui hi. 26 Amah in mihonte kiangah, “Amaute’ khialhna khempeuh tawh note hong kiphiat khia kha ding ahih manin, hih migilote’ puanbuk panin paikhia un la, amau’ na khat beek lawng kha kei un, hong thuum ing,” a ci hi. 27 Tua ahih ciangin Korah, Dathan leh Abiramte’ omna kiim panin, amau paikhia uh hi; Dathan leh Abiramte a zite uh leh a tapate uh leh a taneute uh tawh hong pusuakin a puanbuk kong uhah ding khawm uh hi. 28 Tua ciangin Moses in, “Hih na khempeuh a sem dingin Topa in kei hong sawlin, tua pen keima ut thu a hih lohna, hih thu tawh na thei ding uh hi. 29 Mi khempeuh a sih ngei bang danin hih mite si a, tua ahih kei leh mi khempeuh in a tuah ngeite a tuah leh, Topa in kei hong sawl loh ahi hi. 30 Ahih hangin Topa in a thak khat hong piangsakin, leitang a kam ka-in amaute’ neih khempeuh tawh hih mite valh tumin, a hing tangun Leinuai-ah a tumsuk uh leh, hih mite Topa a simmawhna thu na thei ding uh hi,” a ci hi.

31 Hih thute a gen khiat phetin amau’ nuai-ah lei kiphel kham hi; 32 leitang in a kam ka-in, Korah tawh a kipawl mi khempeuh leh a innkuanpihte uh leh a neihsa khempeuh uh valh tum hi. 33 Tua ahih ciangin amaute leh a neihsa khempeuh uh a hing tangun Leinuai-ah tumsuk uh hi; leitang in amaute khup nelh a, mi honpite laizang panin amaute bei uh hi. 34 Amaute’ kikona hangin a kiim uh a, a om Israel khempeuh tai uh hi; bang hang hiam cih leh amaute in, “Leitang in hong valh tum kha in teh!” ci uh hi. 35 Topa kiang panin mei hong paikhia a, paknamtui a pia mi zanih leh sawmngate kangtum hi.

36 Tua ciangin Topa in Moses kiangah, 37 “Siampi Aaron’ tapa Eleazar in meikuang sung panin paknamtui beelte a lak khiat ding gen in; tua ciangin a gamlapi-in mei thehthang in. Bang hang hiam cih leh tua nate, 38 amau’ nuntakna a beina dongin a khial hih mite’ paknamtui beelte siangtho hi; tua ahih ciangin biakna tau sitna kuangdai dingin seek un; bang hang hiam cih leh amaute in Topa mai-ah tuate pia uh hi; tua ahih ciangin tua nate siangtho hi. Israel mite tungah tua bangin hih nate in lim khat hi ding hi,” a ci hi. 39 Tua ahih ciangin siampi Eleazar in mei tawh a kang tum mite’ piak paknamtui sumngo beelte la-in biakna tau sitna-in seek hi— 40 Topa in Moses tung tawnin Eleazar tungah a gen bangin Korah leh a pawlte tawh a kibang kha lo dingin, siampi ahi lo, Aaron, suan leh khakte ahi lo mi peuhmah in Topa’ mai-ah paknamtui hal dingin a pai loh nading, Israel mite tungah phawksakna khat ahi hi.

41 Ahih hangin a zing ciangin Israel mi hon khempeuh in Moses leh Aaron phunsan uh a, “Topa mite na that uh hi,” a ci uh hi. 42 Moses leh Aaron langpangin mihonte a kikhop uh ciangin, kikhopna buk lamah amaute kihei uh hi, en in: meii in tuam a, Topa minthan’na kilang hi. 43 Kikhopna buk mai lamah Moses leh Aaron pai a, 44 Topa in Moses kiangah, 45 “Tomno sungin amaute ka siatsak theih nadingin hih mihonte laizang panin paikhia un,” a ci hi. Amaute boksuk uh hi. 46 Moses in Aaron kiangah, “Na paknamtui beel la-in, biakna tau pan-a mei a sungah koih in la, a tungah paknamtui koihin, mihonte lakah paipih mengmeng in la, amaute’ adingin kilemna bawlsak in; bang hang hiam cih leh Topa kiang panin hehna hong paikhia khin a, gimna kipan khin hi,” a ci hi. 47 Tua ahih ciangin Moses’ gen bangin Aaron in la-in mihonte lakah tai hi, en in: mite lakah gimna kipan khin hi; amah in paknamtui koihin mite’ adingin kilemna bawlsak hi. 48 A si leh a hing-te kikalah amah ding a, gimna veng hi. 49 Tu-in Korah’ tungtangah a site sim loh, hih gimna tawh a si mi tulsawm leh tulli leh za sagih ahi hi. 50 Gimna a ven’ ciangin kikhopna buk kong Moses kiangah Aaron ciahkik hi.