15
1 Topa in Moses kiangah,
2 “Israel mite tungah hih bangin gen in. Note kong piak leitangah a teeng dingin note tungin,
3 bawnghon pan hita leh tuuhon pan hita leh thuciamna tun’sak nadingin Topa’ tungah meihal biakna ahi a, biak piakna ahi zongin na piak ciang uh hita leh, Topa tungah a gim namtui bawl nadingin ut thu-a biakna hita leh, a kiseh pawi hunte-ah hita leh na piak uh ciangin,
4 biakna a paipih mipa in annel seu khat sehsawm suah sehkhat sathau bung khat sehli suah sehkhat tawh a kibawl an tawh biakna Topa tungah pia ding hi;
5 tuuno khat tawh piak khawm dingin meihal biakna ahih kei leh biak piakna tawh, tui-buah dingin leenggahzu bung khat sehli suah sehkhat na bawl ding hi.
6 Tua ahih kei leh tuutal khat tawh piak khawm dingin annel seu khat sehsawm suah sehnih sathau bung khat sehthum suah sehkhat tawh a kibawl an tawh biak nading na bawl ding hi;
7 Topa’ tungah a gim namtui-in tuibuah dingin leenggahzu bung khat sehsawm suah sehkhat na pia ding hi.
8 Meihal biak nading ahi a, thuciamna tun’sakna-in biakpiak nading ahi a, Topa’ tungah thunuam-a biak nading ahi zongin bawngtal na bawl uh ciangin,
9 mi khat in a bawngtal tawh annel seu khat sehsawm suah sehthum sathau bung lang tawh a kibawl an tawh biakna pia ding a,
10 Topa’ tungah a gim namtui, mei tawh kihal biakna-in tuibuah dingin leenggahzu bung lang na pia ding hi.
11 “Bawngtal ahi a tuutal ahi zongin, tuuno a pa ahi a keelno a pa tawh ahi zongin piak khawm dingin tua bangin kihih ding hi.
12 Na bawl ganhing khempeuh a pha zahzah tua bangin na bawl kim ding hi.
13 Topa tungah a gim namtui, mei tawh kihal biakna a piakna uhah tual sung mi khempeuh in hih nate tu-a bangin hih ding uh hi.
14 Note kiangah khualmi khat hong peem ahi a, na khang tawntungun note lakah mi khatpeuh hong om leh ahi zongin, amah in Topa’ tungah a gim namtui, mei tawh kihal biakna a piak nop leh, note’ hih mah bangin hih ding hi.
15 Mi honpi’ adingin ngeina khat om ding hi; note leh note lakah hong peem mi’ adingin tawntung ngeina khat na khang tawntungun om ding hi. Topa’ mai-ah note leh peemta mite na kibang ding uh hi.
16 Note leh note lakah hong peem mi’ adingin a kibang thu khat, ngeina kip khat om ding hi,” a ci hi.
17 Topa in Moses kiangah,
18 “Israel mite tungah hih bangin gen in. Note kong paipihna gamah tungin
19 tua gama piang ante na nek uh ciangin Topa tungah biakna na pia ding uh hi.
20 Na an-ham uh a masa pen sung panin biakna in moh khat na pia ding uh hi; an cilna pana biakna-in na pia ding uh hi.
21 Na khang tawntungun na an-ham uh a masa pen Topa’ tungah biakna ah na pia ding uh hi.
22 “Ahih hangin note khialin, Topa in Moses tungah a gensa hih thupiaknate khempeuh,
23 Topa in a thupiak-a kipanin na khang tawntungun, Moses tung tawnin Topa in note hong thupiaknate khempeuh na zuih kei uh leh,
24 theih lohna hangin mi honte’ phawk lohin a kikhial ahih leh, mi honte khempeuh in Topa tungah a gim namtui, meihal biakna dingin bawngtal no khat, ngeina kip om bangin an tawh biakna leh a tuibuah tawh, leh khialhna hanga biakna-in keel a pa khat pia ding hi.
25 Siampipa in Israel mihonte khempeuh adingin kilemna bawlsak ding a, amaute kimaisak ding hi; bang hang hiam cih leh tua in tatkhialhna hi a, amaute in tua amau’ tatkhialhna hangin Topa’ tungah mei tawh kihal amau’ biakna leh khialhna hanga amau’ biakna uh Topa’ mai-ah hong paipih khin uh hi.
26 Tua tatkhialhna in amaute khempeuh huamkha ahih manin Israel mihonte khempeuh leh amau lakah a peem khualmi zong kimaisak ding hi.
27 “Theih lohna hangin mi khat a khialh leh, khialna hanga biak nadingin kum khat a pha keel a nu khat pia ding hi.
28 Mi khat in theih lohna hangin a khialh ciangin, ama ading kilemna bawlsak nadingin siampipa in tua a khial mipa’ adingin Topa’ mai-ah kilemna bawl sak ding hi; amah kimaisak ding hi.
29 Theih lohna hangin na khatpeuh peuh a hih, Israel mi lakah a om tual sung mipa leh amaute lakah a peem khual mipa’ adingin ngeina a kibang khat na nei ding uh hi.
30 Ahih hangin tual sung mi hita leh peemta hita leh, na khatpeuh peuh a hih teitei mipa in Topa a simmawh hi a, ama mite kiang panin tua mipa kikhenkhia ding hi.
31 Amah in Topa’ thu simmawhin, a thupiakna siasak ahih manin, tua mipa kikhenkhia siang ding hi; ama mawhna ama tung mahmah om ding hi,” a ci hi.
32 Israel mite gamlakah a om sungun, sabbath ni-in sing a tom mi khat mu uh hi.
33 Sing a tom laitak a mu mite in Aaron leh Moses, leh mihonte khempeuh kiangah amah paipih uh hi.
34 Amah bang kicih ding cih tel takin kigen lo ahih manin amaute in khumcip uh hi.
35 Topa in Moses kiangah, “Tua mipa kithat ding hi; mihonte khempeuh in giahphual pua-ah suang tawh amah deng ding uh hi,” a ci hi.
36 Mi honte khempeuh in giahphual pua-ah amah paipih uh a, Topa in Moses a thupiak bangin suang tawh amah deng lum uh hi.
37 Topa in Moses kiangah,
38 “Israel mite tungah gen in la, a khang tawntungun a puan mongte uhah a teep bawlin, a puan mong-a a teep tungah khau dum khat a khih dingun sawl in;
39 tua in, note in ut luatna tawh na zuih theih zel uh ahi nomau’ lungsim leh nomau’ mittang deihna zui loin, note in na et ding uh puanmongteep leh Topa’ thupiakte khempeuh phawkin na sep ding uh ahi hi.
40 Tua ahih ciangin note in ka thupiakte khempeuhte phawkin na sem ding uh a, na Pasian uh tungah na siangtho ding uh hi.
41 Keimah in, note’ Pasian a hi dingin Izipt gam panin note a hong paikhiatpih Topa na Pasian uh ka hi hi: keimah in Topa na Pasian uh ka hi hi,” a ci hi.