12
Lungdam Kohna La
1 Ni khat ni ciangin mite in,
“Topa aw,
kei tungah na heh hangin
na hehna damta a,
kei hong hehnem na hih manin
nang tungah lungdamna kong ko ding hi.
2 En in, Pasian pen
kei a hong hon khia pa ahi hi.
Amah ka muang dinga,
ka lau kei ding hi.
Bang hang hiam cih leh Topa Pasian in
thahatna le vangliatna hong pia a,
amah pen kei a hong hon khia pa ahi hi,”
a cih hun uh hong tung ding hi.Ref 12:2 Pai 15:2; La 118:14.
3 Tui siangtho in a dangtakte
a lungdamsak mah bangin,
Pasian’ hotkhiatna in
a mite lungdamsak ding hi.
4 Ni khat ni ciangin mite in,
“Topa’ tungah lungdam ko unla,
ama hong huh ding ngen un.
Minam khempeuh lakah
ama septe kitheisak unla,
ama min kiliansak hi, ci-in gen un.
5 Amah in minthang takin
sem khin ahih manin
leitung khempeuh ah
hih thu kitheisak un.
6 Zion-a teeng mite aw, nomau’ lakah
Israel-te’ Siangtho Pa
lianin om ahih manin
lungdamin awng unla,
lungdamin la sa un,”
a cih hun uh hong tung ding hi.