11
Jessi’ Suan’ Ukna Man
1 Jessi’ phung sung panin
a sel khat hong khang khia dinga,
a zungte panin
a no khat hong khang ding hi.Ref 11:1 Mang 5:5; 22:16.
2 Topa’ kha in ama tungah
ama mite a ukna ding
pilna, thutheihna le siamna pia ding hi.
Amah in Topa’ deihna thei-in
Topa zahtak ding hi.
3 Amah in Topa’ nasep nuamsa ding hi.
Amah in a tungtham bek muhna tawh
thu khen lo dinga,
kam lengsawn bek zakna tawh
thu khentat lo ding hi.
4 Thumanna tawh mizawngte’ thu khenin,
lungsim nem mite’ thu
ahi bangin khensak ding hi.
Ama kam panin a thupiakna tawh
leitung mite gim kipia dinga,
a muk panin a thugenna tawh
migilote si ding uh hi.Ref 11:4 2The 2:8.
5 Amah in thuman le thutak tawh
ama mite uk ding hi.Ref 11:5 Efe 6:14.
6 Keivom pen
tuuno tawh omkhawm dinga,
kamkei gialbem pen
keelno tawh lumkhawm ding hi.
Bawngno le humpinelkai le
ganhing thaute omkhawm ding uh a,
naupangno khat nangawn in
tuate hawl zo ding hi.
7 Bawngpi le vompi in
an nekhawm ding uh a,
amau’ note lumkhawm ding uh hi.
Humpinelkai in bawngtal mah bangin
buhkung ne ding hi.
8 Nawine naungek,
gul gilo’ kua vangah kimawl dinga,
nawine nawn lo naupang in
gul gunei’ bu a sawk hangin
a gul in tu lo ding hi.
9 Ka mual siangtho buppi tungah
amaute khatlekhat
kiliamsak lo ding uh a,
kisusia lo ding uh hi.
Bang hang hiam cih leh
tuite in tuipi omna a tuamcip mah bangin
leitungah Topa’ thu theihna
kidim ding hi.Ref 11:6-9 Isa 65:25. Ref 11:9 Hab 2:14.
10 Tua ni ciangin Jessi’ zung pen mihingte’ tungah lim khat hi ding hi. Minamte in amah zong ding uh a, ama omna mun minthang mahmah ding hi.Ref 11:10 Rom 15:12.
A Suakta Laite Gualzo-in A Ciahkikna
11 Tua ni ciangin Topa in Assiria gam, Egypt gam, Pathros gam, Ethiopia gam, Elam gam, Shinar gam, Hamath gam le tuipi gei-a gamte panin ama mi a omlaite a ngahkik nadingin a vangliatna zangkik ding hi.
12 Amah in minamte adingin
lim khat koih dinga,
Israel mi a kihawl khiate kaikhawmin,
leitung kiu li panin
Judah mi a kikhenthangte
kaikhawm ding hi.
13 Efraim in hazatna lungsim
a neihnate bei dinga,
Judah mi a galbawlte kisusia ding hi.
Efraim in Judah haza nawn lo dinga,
Judah in zong Efraim galbawl lo ding hi.
14 Ahih hangin amaute in
nitumna lama om Filistia mite
simkhawm ding uh a,
nisuahna lama om mite
luhkhawm ding uh hi.
Amaute in Edom mite le
Moab mite zo gawp ding uh a,
Ammon mite in
amau’ thu mang ding uh hi.
15 Topa in ama huihsa nungsakin
Nail gunpi le Eufratis gunpi tuite
kangsak dinga,
mi khempeuh in nuamtakin
a kantan zawh ding
lui neu sagih bek sitlai ding hi.Ref 11:15 Mang 16:12.
16 Egypt gam panin
Israel-te hong paitoh ciangin
amau adingin lam lianpi khat
a om mah bangin,
ama mi a omlaite adingin
Assiria gam panin zong
lam lianpi khat om ding hi.