22
David ii Ngalzawna La
(Psalm 18)
1 Topa in David sia Saul le a ngal dangte kung panin a hutkhiat ciangin David in Topa tungah hi la a sak hi.
2 Topa in kei hong dal pa hi;
ama sia ka kulh kho ahi hi.
3 Ka Pathian sia ka kidalna hi a,
tuaciangin ama hangin kei ka ngammuang hi.
Ama in lum bangin kei hong sung hi;
ama in kei hong hung a, \q2~kei hong keamcing hi.
Ama in ka ngumpa hi;
Ama in a ngoltolte kung panin kei hong dalin hong hun hi.
4 Topa ka biakpui a,
ama in ka ngalte kung panin hong hun hi.
5 Thina tuihualte ka kiim theampo ah om a;
lalna tuihualte kei tungah hong kihual hi.
6 Thina ii lau huaina ka kiim ah hong om a,
tuaciang thaankuul in kei thaang hong sia hi.
7 Ngim ka nga ciangin Topa ka biakpui a;
ka Pathian munah hu ka ngen hi.
A biakinn sung pan ka aw hong za a;
hu ngen in ka auna aw ama in hong ngai hi.
8 Tua zawkciang leitung sia liingin ngawk a;
van ii a bul a zungte kivei in liing hi,
banghang ziam cile Pathian a thin uuk hi!
9 A naak hawng panin meikhu hong pusuak a,
a kam sung pan a kaanghtumsak thei meikuang le meikam leang hi.
10 Ama in vantung balkeakin hong pai suk a,
a peang nuai ah meeivom kaai hi.
11 Ama in cherub tha tungah to in
manlang takin leang a;
vui ii thakhui te tungah khualhaw hi.
12 Ama le ama khuazing taw kituam a;
tui taw kidim meeikaai saate in ama kiim uum hi;
13 khualeng in meikamte
14 Tuaciang Topa in
van pan vanto nging bang hisak a,
Vaanglianbelpa Pathian ii aw kiza hi.
15 Ama in a thaltangte kap a,
a ngalte kithethaangsak hi;
khualeng kuang taw amate taisak hi.
16 Topa in a ngalte a teih ciang le
a thin uukin a hawksan ciangin,
Tuipi ii tawdap kihawk a,
leitung ii tawdap kilawt hi
17 Topa in tungsang panin
hong baan suk a, kei hong len hi;
ama in tuithukna panin kei hong kaito hi.
18 A thahat ka ngalte kung pan ahizong
kei hong ensan theampo te kung pan ahizong hong suatak hi —
kei atu in amate hat leih uh hi.
19 Ngim ka nga ciang,
amate in kei hong sim a,
ahizong Topa in kei hong dal hi.
20 Ama in launa pan hong hu a;
kei tungah hong lungkim hu in kei hong hun hi.
21 A maan bang ngamta ka hikom
Topa in kei, tel hong pia hi;
paubaang ngawl ka hikom
ama in thupha hong pia hi.
22 Topa thukham ka ni a;
ka Pathian kung pan ka puapial bua hi.
23 Ama ii thukham theampo ka tang a;
a thupiakte ni ngawlin ka om bua hi.
24 Ama in ka maw ngawl hunlam hong he a,
a maan ngawl ngamtatnate pan ka kikep hong he hi.
25 A maan bang ngamta ka hikom
ama in tel hong pia hi,
banghang ziam cile paubaang ngawl ka hi hong he hi.
26 Topa awng, nang tungah
hong thumaante tungah na thumaan a,
a cialcingte tungah na phatna kicing hi.
27 Nangma in a thiangtho te ii
tungah na thiangtho a,
ahizong a seksolte na ngal vawt hi.
28 A kiniamkhiakte na ngum a,
ahizong a kiphasakte na kiniamkhiaksak hi.
29 Nangma, Topa, ka khuavak na hi hi;
ka khuazing na nilkeak hi.
30 Ka ngalte ka sim natu in thahatna nong pia a,
amate kihuuknate ka zaw zawk natu in vaangletna nong pia hi.
31 Hi Pathian — bangza in ama nasepnate cialcing a,
ama kammalte suan taak ziam!
Ama hong dalna a zong theampo atu in
ama in lum khat taw kibang hi.
32 Topa bekma Pathian hi a;
Pathian bekma ih kihuukna ahi hi.
33 Hi Pathian in a kip a kho ka bukna hi;
Ama in ka lampi ngammuangsak hi.
34 Ama in ka peangte sangai bangin kho takin hong khuasuansak a;
mualte tungah kei hong keamcing hi. Ref 22:34 Hab 3:19
35 Ama in ngal kisim hong sinsak a,
tuasia ciang thalkawng a khobel zongh ka zangh thei hi.
36 Oh, Topa, nangma in
nong dal a, nong hun hi;
nong huna in keima hong thupisak hi.
37 Hong kimat natu panin nong keam a,
bangma hunin ka puk ngei bua hi.
38 Ka ngalte ka del a ka zo hi;
amate ka mot mateng ka tawp bua hi.
39 Amate ka vaat vawk a, a thoto zo bua uh hi;
amate ka mai ah ngallel in puk uh hi.
40 Ngal do natu in thahatna nong pia a;
ka ngalte nong zosak hi.
41 Ka ngalte ka kung panin na taisak a;
kei hong ensan te ka mon hi.
42 Amate in huna zong ka le
kuama in hun ngawl hi;
amate in Topa biakpui hikale
ama in zo ngawl hi.
43 Amate ka sucip a,
leivui bang suak uh hi;
lampi ah a om buan bangin amate ka tuanhcil hi.
44 Hong leedo ka mite kung pan nong hun a
minamte ka ukna nong kipsak hi;
tu in ka heak ngeingawl mihingte ka khutnuai mi suak uh hi.
45 Ngamdangmite ka mai ah hong kun a;
amate in ka kammal a zaak ciang hong ni hi.
46 Amate a thin letna uh bosua in,
a kulhte sung pan liing vadil in hong pai uh hi.
47 Topa nungta hi!
Kei hong hunpa pok vun!
Kei hong hun a thahat Pathian ii
letna thangsak vun.
48 Ama in ka ngalte hong zosak hi!
minamte ka khutnuai ah ama in huthe ngam ngawlin koi a;
49 ka ngalte kung pan kei hong hun hi.
Oh Topa, ka ngalte nong zosak a,
a ngoltol mite kung panin nong dal hi.
50 Tua ahiciang minamte sungah
nang kong pok a;
na tungah pokna late kong sak hi. Ref 22:50 Rom 15:9
51 Pathian in a kumpipa tungah
zawna liante pia hi;
ama in a tealsa khat ii tungah itna kip lak a,
David le a suan a paalte tungah itna kip a tawntungin lak hi.