21
Saul ii Suan le Paalte Kithatlum
1 David ii kumpi in a maan hunsungin kum thum sitset kialpi nasia khat tung hi. Tua hi a, David in Topa munah tuasia thu a dok ciang, Topa in, “Saul le a bangkua in mihing that mawna vawt hi; ama in Gibeon mite thatlum hi,” ci hi.
2 Gibeon mite sia Israel mi hi ngawl a; amate sia, Israel te in hut tu dal tu in kamciam a piaksa Amor mi pawlkhat hi napi, Israel mite in Judah mite atu a deisak leilam manin Saul in tuate mot tu in hanciam hi. Ref 21:2 Jos 9:3-15
3 Tua ahikom David in Gibeon mite samsak a, “No atu bang hong vawtsak thei tu khi ziam? Topa ii mite tungah thupha na piak natu in no tungah hong tatkhialna te hong lul kik nuam khi hi,” ci hi.
4 Amate in, “Saul le a bangkua taw ka kihauna uh sia ngunn le khamh taw thu kisaatsat thei ngawl bek dom ngawlin Israel mite khat zongh thatlum nuam ngawl khu hi,” ci in zo hi.
David in, “Tua ahile no atu in kei bang hong vawtsak tu ci in na ngaisun uh ziam?” ci in dongh hi.
5 Amate in, “Saul in ko sia hong maaimot nuam hi, tuaciang Israel ngamsung koima ah khat zongh a nungta in hong koi nuam ngawl hi.
6 Tua ahikom Saul ii suan le paal pasal sali hong aap tavun, Topa ii kumpi tu a teal Saul ii khua Gibeah ah amate sia Topa mai ah ka awksak tu uh hi,” ci in zo uh hi.
Kumpipa in, “Amate hong aap tu khi hi,” ci in zo hi.
7 Ahihang Jonathan taw a thiangtho kamciamna a piak hu in, David in Saul ii tupa, Jonathan ii tapa, Mephibosheth khoaikhe hi. Ref 21:7 1 Sa 20:15-17; 2 Sa 9:1-7
8 Ahihang ama in Aiah ii tanu Rizpah ii Saul taw a hin tapate nii, Armoni le Mephibosheth la hi; ama in Saul ii tanu Merab le Meholah pan Barzillai ii tapa Adriel taw a hin tapa nga teng zongh la hi. Ref 21:8 1 Sa 18:19
9 David in amate teng Gibeon mite tungah aap a, tuate in Topa mai mual tungah awklumsak uh hi — tuaciang a sali ma in thi khawm uh hi. Tua a thi hun sia phalbi bo kuan hi a, mangtaang at a kipatsawng hi.
10 Tuaciangin Saul ii zino, Aiah tanu Rizpah sia mithiluangte kisialna suangpi tungah khau-ip buk vawtin anlaak kipat pan kipan tangngam ngua a zuk dong om hi. Ama in sun in mithiluangte a ne tu vacimte hung a, zanin ngamsate neak tu pan dal hi.
11 David in Rizpah ii ngamtatna a zaak ciangin,
12 ama pai a, Gilead ngam Jabesh mite kung panin Saul le a tapa Jonathan ii ngu la hi. Amate in Gilboa mualvum tung a Saul a kithalup ni in Philistine te ii a luang a khaina Beth Shan taangpi khawlmun panin ngu uh hi. Ref 21:12 1 Sa 31:8-13
13 David in Saul le Jonathan ii ngute le a ki awklumsak pasal sali teng ii ngute zongh khawmtua hi.
14 Tua zawkciang amate in kumpipa sawl babangin, Saul le Jonathan ii ngute Benjamin ngamsung Zela khua, Saul ii pa Kish ii thaan sungah phum uh hi. Tuasia zawkciang amate ngam atu a thungetna teng Pathian in zo hi.
Philistine Thatanglian mamate taw Ngal kisimna
(1 Khangtaanghthu 20:4-8)
15 Philistine te le Israel te ngal kisimna khat om kik a, David le a mite pai in Philistine te do uh hi. Kido hun sung khat ah David toi zo ta hi.
16 Thatang lian mama Ishbibenob a kici khat sia taau taw a kivawt kilogramme thum le lang a ngit teipi khat toai in, namsau thak khat kua a, David that thei tu in ki um hi.
17 Ahihang Zeruiah ii tapa Abishai in David hu a, thatang lianpa simin thatlum hi. Tua zawkciang David ii mite in David peuma amate taw ngalsim khawm tu in a kuan kik nawn ngawl natu in kamciam piasak hi. Amate in, “Nang sia Israel te ii lam etna ni hi, nang hong taan nuam ngawl khu hi,” ci uh hi. Ref 21:17 1 Kum 11:36; Ps 132:17
18 Hisia zawkciang Gob ah Philistine te taw kidona khat om kik a, Hushah pan Sibbecai in Saph a kici thatang lian mama khat thatlum hi.
19 Gob ma ah Philistine te taw kidona khat om a, Bethlehem pan Jair ii tapa Elhanan in Gath mi Goliath that hi, note 21:19 Ahithei thu see 1 Khang 20:5 na ah Goliath suapuipa Lahmi that hi kici hi. ama ii teibul sia thiamtakte ii thiambanna pumlawng cia pha hi.
20 Tuaciang Gath ah ngal kidona dang khat om a, tua munah thatang lian mama ngal sim uuk mama khat om hi. Ama in a khutte ah khutme luk veve le a peangte ah peangme luk veve nei hi.
21 Ama in Israel te nalh hi, tuaciang David ii suapuipa Shammah ii tapa Jonathan in ama thatlum hi.
22 Hi mihing li teng sia Gath mi thatang lian te suan vive hi a, David le a mite in thatlum uh hi.