19
Joab in David Teih
1 Kumpipa David sia Absalom hu in khuangai a, kakap hi ci in Joab tungah kison hi.
2 Tuabangin ngalzawna lungdamna sia tua ni in David ii a ngalkapte atu in heena hong suak hi, banghang ziam cile a tapa thi hu in kumpipa a tauna teng amate in za hi.
3 Ngal kisimna phual panin a tai a maizum ngalkapte bangin, amate sia khuapi sungah thim takin hong tum kik uh hi.
4 Kumpipa in a mai hum in nging takin, “Aw ka tapa! Ka tapa Absalom! Absalom ka tapa!” ci in kap hi.
5 Kumpipa ii inn ah Joab pai in ama munah, “Tuni in na mite — nang le na tapate na tanute, na zite le na zinote nuntakna hong huu mite maimawlsak ni hi.
6 Nang hong it teng na langpan a, nang hong ensan teng na panpui hi. Na uliante le na mite sia bangma in hong heang ngawl na hi sia kitelthiangsak zo ni hi.Tuni in Absalom nungta hen a, ko teng theampo thi zaw le ung na lungdam zaw phial tu in hong mu khi hi.
7 Tu in va pai ta'n a, na mite lungmuangsak kik ta'n. Topa min lo in ka kiciamna pan, tuabangin nong vawt buale zingsang ciangin amate sung pan khat zongh in nang hong koppui nawn ngawl tu hi. Tuasia in na khan tawntung tuasiatna nasia belh na thuak hi tu hi,” ci hi.
8 Tuasia ciang kumpipa kikhuangkho a, hong pai in khuapi kongpi hui ah to hi. A mite in ama sia tualai ah a om hunlam a zaak uh ciangin ama kiim ah hong kikaikhawm uh hi.
David Jerusalem zuan kik
Tua hun sungin Israel te theampo tai in amate inn tek zuan uh hi.
9 Ngam buppi sungah amate le amate hong kihau uh hi. “Kumpipa David in ih ngalte khut sung panin hong suatak hi,” khat le khat kici uh hi. “Ama in Philistine te khut sung panin hong suatak a, ahihang ama sia tu in Absalom kung pan tai in ngam nusia zo hi.
10 Absalom sia ih kumpipa tu in sathau ih noai hi, ahihang ama ngalphual ah kithat hi. Tua ahiciang banghangin khat po in Kumpipa David ciapui kik tu hanciam ngawl ziam?” ci uh hi.
11 Israel te ii pauna teng David kungah kison hi. Tua ahikom thiampi Zadok le Abiathar te Judah lampuite a dongh tu in samsak hi. Ama in, “A kumpi inn sungah kumpipa a cia kik natu a hute sung pan banghangin note a hu khakbel hi tu nu ziam?
12 No sia ka mealheakte nu hi, ka chi le ka sa nu hi; banghangin ka cia kik natu hong hu khakbel te hi nu ziam?” ci in donghsak hi.
13 David in Amasa tungah hi bangin cisak si hi, “Nang ka mealheak ni hi. Tu pan kipan Joab taangin ka ngalkaphonpi ukpa in hong koi khi hi. Tuabangin ka vawt buale Pathian in hong vaatlum tahen!” ci hi.
14 David kammalte in Judah mite theampo ii thumaan takin a panpuina a cingin piangsak a, amate in ama le a uliante hong heak kik natu kam thaak hi.
15 Kumpipa hong cia kik lamin Judah mite in Jordan ngun ah muak in, a ngun kan na ah a cing tu in Gilgal ah amate hong pai ahi uh hi.
16 Tua hun ma in, Bahurim pan Gera ii tapa, Benjaminte Shimei zongh Jordan ah Kumpipa David taw kisi tu in manlang in hong pai hi. Ref 19:16 2 Sa 16:5-13
17 Ama in Benjamin namte tulkhat tonpui hi. Tuaciang Saul ii innkuan naseampa Ziba zongh a tapa sawm le nga le a naseam kul taw hong pai in, kumpipa thet ma in Jordan theng hi.
18 Kumpipa le a pawlte ngun a kan laitak a cing tu le kumpipa ii dei babangin a seam tu in amate ngun hong kan uh hi.
Shimei tungah David in Cikna Thiamna lak
Kumpipa ii ngun kaantan tu a kithoai laitak Shimei hong pai in ama mai ah hong kilei see suk a,
19 “Kumpipa awng, nong hesuakna in Jerusalem na nusiat ni in nang tungah ka ngamtat khialna teng hong makngilsak ta'n.Tuasia taw kei hong langpan heak in a, thinngil laingil ah na paai heak in.
20 Topa awng mawna vawt zo ka hi hunlam kihe khi hi, tuaciang tua hu ma in saksang namte sung pan tuni in kumpipa taw kisi tu in hong pai phitbel pa khi hi,” ci hi.
21 Zeruiah ii tapa Abishai hong pau a: “Shimei sia thalup tu hi, banghang ziam cile Topa ii kumpi tu in a teal pa haamsiat hi,” ci hi.
22 Ahizong David in Abishai le a suapuipa Joab munah, “A kua in no ngaisutna hong ngen ziam? Ngim hong pia tu nu ziam? Tu in kei Israel ii kumpipa hi zo khi hi, tuaciang tu ni in Israel te kuama kithatlum ngawl tu hi,” ci hi.
23 Tuaciang Shimei munah, “Nang hong kithatlum ngawl tu hi ci in kamciam hong pia khi hi,” ci hi.
Mephibosheth tungah David in Cikna Lak
24 Tua zawkciang Saul ii tupa Mephibosheth sia David taw kisi tu in hong pai hi. Ama in kumpipa ii Jerusalem a nusiat hun pan ngalzo a hong cia kik dong, a peang le sil ngawl, a khamul le meet ngawl, a puan le sawp ngawlin omcip hi. Ref 19:24 2 Sa 9:1-13; 16:1-4
25 Kumpipa taw kimu tu in Jerusalem ah Mephibosheth hong thet ciangin, kumpipa in, “Mephibosheth awng, nang kei taw hong paikhawm ngawl ni hi. Banghang ziam?” ci in dongh hi.
26 Ama in, “Kumpipa awng, na heaksa bangma, kei sia ka peang zaw hi. Ka naseampa munah ka laa a kungh hong thuasak ta'n, kumpipa taw tonkhawm nuam khi hi, ka ci hang ama in kei hong leeheak hi.
27 Ama in kei huvau Kumpipa nangma tungah leilot hi, ahihang nang sia Pathian ii vantunglalang taw na kibang hi, tua ahikom maan na sak bangin ngamta in.
28 Ka pa ii innkuanpuite theampo kumpipa ii na thisak sia ahi tu ma hi, ahihang nangma in na sabuai ah an ka neak thei natu thu hong pia ni hi. Kumpipa tung pan hamphatna dang kong nget thuathua lai natu thu om ngawl hi,” ci in zo hi.
29 Kumpipa in, “Bangma son thua kul nawn bo. Nang le Ziba in Saul ii ngamh teng na hawm natu khensat zo khi hi,” ci in zo hi.
30 “Ziba in tang siat tahen. Kumpipa nangma ciidam in inn nong cia kik sia kei atu pha zo hi,” ci in Mephibosheth in zo hi.
David in Barzillai tungah Cikna Thiamna Lak
31 Gilead pan Barzillai zongh kumpipa ii Jordan a kan ciang a cing tu in Rogelim pan hong paisuk hi. Ref 19:31 2 Sa 17:27-29
32 Barzillai sia kum sawmliat a pha pasal huai mama khat ahi hi. Ama hau mama a, Mahanaim ah a taam sung kumpipa anvaak hi.
33 Kumpipa in ama tungah, “Kei taw Jerusalem ah ih paikhawm tu a, nang kong en tu hi,” ci hi.
34 Ahihang Barzillai in, “Kei sia ngei nungta nawn ngawl tu khi hi, banghangin kumpipa taw Jerusalem ah pai tu khi ziam?
35 Kei kum sawmliat pha zo a, bangma in nopsak hong pia nawn ngawl hi. Ka neak ka dawnte ii limna le he nawn ngawl, lasa te ii aw le za thei nawn ngawl khi hi. Kumpipa nang atu vanh ngitpi khat suak bek tu khi hi.
36 Tuabang tel lian a saang tu in kiphu nawn ngawl khi hi. Tua ahikom Jordan ngal khat tawm khawng dong hong pai lai bek tu khi hi.
37 Tua zawkciang hong ciasak ta'n a, ka nute ka pate ii thaan hui ka inn ah thi ka tong. Hi munah ka tapa Chimham om hi, ama in nangma na hong sepsak tu hi; ama nangma paipui in, kumpipa awng, nangma ii pha na sakbel bangin ama atu vawtsak ta'n,” ci hi.
38 Kumpipa in, “Ama paipui tu khi hi, tuaciang vawt a na oai babangin ama tungah ka vawt tu hi. Tuaciang nong nget pawpo nang atu in hong vawtsak tu khi hi,” ci in zo hi.
39 Tua zawkciang David le a mite theampo in Jordan ngun kan uh hi. Ama in Barzillai namh in, thupha pia a, tuaciang inn ah Barzillai cia kik hi.
Judah le Israel in Kumpipa vai Kam kinial
40 Judah mi theampo le Israel mi teng ii a lang in kumpipa cing in ngun a kan zawkciang, ama Gilgal ah paitan a. Chimham sia ama taw paikhawm hi.
41 Tuaciang Israel te a om theampo kumpipa kungah pai in, ama munah, “Kumpipa awng, koma suapui Judah mite in nang hong la khe a, nangma, na innkuanpuite le na mite ii Jordan na kan uh ciang hong cin natu banghangin thu nei kisa ziam?” ci in dongh uh hi.
42 Judah mite in, “Banghangin tuabang ngamta khu ziam cile kumpipa sia koma mi khat hi. Tua ahikom banghangin hisia hu in thin uuk thei nu ziam? Ama in ka an neak tu uh la hong leisak bo, a dang zongh bangma piak hong nei ngawl hi,” ci in zo uh hi.
43 Israel te in, “Ama sia noma mi khat hikale David kumpipa tungtaang ah no sangin koma in see sawm bang a tamzaw in thu nei khu hi. Banghangin hong no mu nu ziam? Kumpipa ciapui kik natu kam a nging phitsak sia koma khu hi, mangil heak vun,” ci in zo kik hi.
Ahihang Judah mite ii a cite sia Israel mite kampauna sangin nasia zaw in khalh zaw hi.