18
Absalom sia Ngallel in Kithatlum
1 Kumpipa David in a mite theampo khawmtua in, tulkhat pawl, zakhat pawl ci in khen a, a uk tu uliante koi hi.
2 Tuaciang ama in tuate pawl thum in kuansak a, Joab le a suapuipa Abishai, Gath pan Ittai te thum in tua pawlte khat tek uksak hi. Tuaciang kumpipa in, “Keima zongh no taw kuankhawm tu khi hi,” ci hi.
3 Amate in, “Ko taw hong kuankhawm ngawl tu ni hi. Ei a taanglai teng kiheak in ih tai ahizong, ei a lang ma hong kithat ahizong ih ngalte atu bangma kilamdanna om ngawl tu hi; ahihang nang na hile ko tulsawm taw na man neina kikim hi. Hi lai khuapi sungah om in huna hong puak lete phazaw tu hi,” ci uh hi.
4 Kumpipa in, “Pha na sakbel uh bangin ngamta tu khi hi,” ci in zo hi. Tuasia zawkciang a ngalkapte tulkhat pawl, zakhat pawl, a pawl a pawl in a kuan ciangin, David sia kongpi hui ah ding hi.
5 Ama in Joab, Abishai le Ittai te munah thupia a, “Keima nong ngaisutna in, tangvalpa Absalom bangma na law heak vun,” ci hi. Ngalkap mite theampo in David ii a uliante tungah hi a thupiakna sia za kim uh hi.
6 David ii ngalkaphonpi sia ngamsung theampo ah hong kuanin, Ephraim duisung ah Israel te sim uh hi.
7 Israel te in David ii mite lel uh hi; tua ni in nasia lel mama uh a, tulkul kithatlum uh hi.
8 Ngamsung bup ah kidona hong kilaw a, duisung ah a thi sia ngalphual ah a kithat sangin tamzaw hi.
9 Thakhat thu in Absalom in David ii mite taw kisi uh hi. Absalom sia laa tungah to in, a laa sia oak thingkung lian nuai khat ah a pai laitak thingbaak kawm ah, Absalom ii lutang awk hi.
10 David ii mite khat in ama mu a, Joab tungah, “Topa awng, Absalom sia oak thingkung tungah a kaai ka mu hi,” ci in ko hi.
11 Joab in, “Mu na hi le banghangin a munah thatlum paih ngawl ni ziam? Keima mama in ngunn tang sawm le kawngkhau khat hong pia zawsap tu khi hi,” ci in zo hi.
12 Ahihang tua pa in, “Ngunn tang tulkhat keak nong pia hial zong kumpi pa tapa tungah ka khutme khat zongh laamto ngawl tu khi hi. Kumpipa in nang le Abishai, Ittai tungah, ‘Keima nong ngaisutna in khangno pa Absalom sia bangma na law heak vun’ ci in thu hong piak sia za tek khu hi.
13 Ahihang kumpipa thupiak mang ngawlin Absalom that hi leng, kumpipa in za nanak tu hi — ama in thu theampo za hi — tuaciang nangma in kei hong hung ngawl tu ni hi,” ci hi.
14 Joab in “Nang taw hun sauzaw bosak thawthong nawn bua tong,” ci hi. Joab in tei thum la in, oak thing tung a kikhai a nungta lai Absalom ii awm hol hi.
15 Tuaciang Joab ngalkap sawm in Absalom hong neak in, thatlum vet uh hi.
16 Ngal kido tawlngak natu in Joab in lemle tum natu thupia a, a ngalkapte Israel te a delna uh pan heak kik uh hi.
17 Amate in Absalom ii luang la in duisung dum thuk khat sungah a lotsuk zawk uh ciang suangtum honpui khat taw siin uh hi. Israel te theampo taimang in a inn tek zuan uh hi.
18 Absalom in a nuntak lai in, a min kilaw natu tapa nei ngawl ahikom, Kumpipa Kuam a kicina munah ama atu in khansuang vawt in phut hi. Tua bangin ama min ma kivaw a, tuni dong ciang Absalom ii Khan kici lai hi.
Absalom ii Thina David munah Kison
19 Tuasia ciang Zadok ii tapa Ahimaaz in Joab munah, “ Topa in a ngalte khut sung pan ama a hutna thupha kumpipa tungah son tu in hong taisak ta'n,” ci hi.
20 Joab in, “Hi ngawl hi, tuni in thupha bangma puak ngawl tu ni hi. Nidang khat pawpo ciang na uuk le hi thei hi, ahihang tuni in puak ngawl tu ni hi, banghang ziam ci le kumpipa ii tapa thi hi,” ci hi.
21 Tua zawkciang Ethiopia a sila pa tungah, “Pai in, na mu teng kumpipa tungah son ta'n,” ci hi. Sila pa sia kun a tai paih hi.
22 Ahimaaz in, “Bang thu po piang kale awlmaw bong; nong hesuakna in tua thu zong keima hong puaksak po ta'n,” ci veve hi.
Joab in, “Ka tapa awng, bang tu ci kenkon ni ziam? Tua atu in letsong bangma nga beak ngawl tu ni hi,” ci hi.
23 “Bangpo a piang zong pai nuam khi hi,” Ahimaaz in ci kik hi.
Joab in, “Tua ahile va pai ta'n,” ci hi. Ahimaaz zongh lam ah hong taisuk in, Jordan Kuam kaantan a, hai ngawlin silapa suangkhial hi.
24 David sia khuapi kongpi puanung le sungnung kilaklaw mun awngna ah to hi. Ngal vilpa sia khuapi uumna luphung vuum tungah kaato a, kongpi ii tung innkhum tungah ding hi; ama in khua a et le pasal khat ama nguakin hong tai mu hi.
25 Ama in oksan suk a kumpipa munah son hi, tuaciang kumpipa in, “Ama nguak ahile thupha hong puak hi tu hi,” ci hi. A tai pa sia hong nai vaial hi.
26 Tuaciang ngalvil pa in pasal dang khat ma ama nguakin hong tai mu leleau a, kongkhapi cing pa oksan suk hi. “En in! Zia sungah pasal dang khat ma hong tai hi!” ci hi.
Kumpipa in, “Hisia zongh in thupha hong puak hi” ci in zo hi.
27 Ngalvil pa in, “A masa a hong tai sia Ahimaaz ii tai bangin tai hi,” ci hi.
Kumpipa in, “Ama mihing pha khat hi a, thupha hong puak hi,” ci hi.
28 Ahimaaz in kumpipa nuksetna kam pau in ama mai lei ah kisepsuk hi, tuaciang, “Kumpipa awng Topa na Pathian pok in, ama in na lang pan hong leedo mite hong zosak hi!” ci hi.
29 “Tangvalpa Absalom a suakta ziam?” ci in kumpipa in dongh hi.
Ahimaaz in, “Topa awng, na ulianpa Joab in kei hong paisak lai in a buai lialua khat ka mu a, bang ziam ci in ka son thei bua hi,” ci in zo hi.
30 “Zia lai ah ding in,” kumpipa in ci a; tuaciang ama tua munah ding hi.
31 Tua zawkciang Ethiopia silapa hong theng a, kumpipa munah, “Kumpipa awng, nang atu thupha khat hong puak khi hi! Tuni in Topa in nang hong leedo te theampo hong zosak hi,” ci hi.
32 “Tangvalpa Absalom a suak ta na ziam?” ci in kumpipa in dongh hi.
Sila pa in, “Ama thuak sia na ngalte theampo le, tuaciang nang hong leedo theampo in thuak le ka oai hi,” ci in zo hi.
33 Kumpipa khuangai mama hi. Kongpi suazoai tung inndoi sungah kaato in kap hi. A pai kawkawmin, “Aw, ka tapa! Ka tapa Absalom! Absalom ka ta awng! Nang ka tapa ii thi luangin kei thi zaw leng maw! Absalom ka tapa!” ci in au hi.