12
Nathan ii Thupuak le David ii Kisiikikna
1 Topa in kamsaang pa Nathan sia David kungah paisak hi. Ama kungah Nathan pai in, “Pasal nii khuapi khat sungah teang khawm hi; khat sia hau a, a khat sia zawng hi. Ref 12:1 Ps 51Thulu
2 A hau pa in khui le tuu tam mama nei hi,
3 a zawng pa ahile a leisa tuuno khat bek nei hi. Ama in tuasia pha takin khoai a, a inn ah a tate taw khang khawmsak hi. Ama ii neak lai an pawlkhat taw vaakin, a hai taw tui dawnsak a, a kaang sungah toai hi. Tuuno sia ama atu in tanu khat taw kibang hi.
4 Ni khat ni in leangna khat a hau pa inn ah zin hong tung hi. Tua pa neak tu in mihaupa in a nganno khat zongh ngaw nuam ngawl hi; ama in mizawngpa ii tuuno laaksak in a zinpa neak tu in huan hi,” ci in son hi.
5 David sia tua mihau pa tungah thin uuk mama a, “A nungta Topa taw kiciam hi tong, hi bangin a ngamta pa a thi tu kilawm hi!
6 Hi bangin a tatsiat hu in a laak za tungah a zaa li in a lo kik kul tu hi,” ci hi.
7 “Nangma tuasia pa ni hi,” Nathan in David munah ci hi. “Tuaciang hisia Israel ii Topa Pathian in ci hi: ‘Saul khut sung pan kong suatak a, Israel kumpipa kong suaksak hi.
8 Ama ii kumpi ngam le a zite nang kong pia hi; Israel le Judah kumpipa kong suaksak hi. Hi sia kicing ngawl lai ahile a zaa nii in a tamzaw hong pia zo tu khi hi.
9 Tua ahile banghangin kong thupiakte ni ngawl ni ziam? Banghangin hi tatsiatna ngamtat in nei ni ziam? Nang in Uriah sia ngal sungah na thisak hi: Ammon te in na thatlumsak hi, tua zawkciang a zi na la hi!
10 Tu in na khang simin na suan na paalte pawlkhat sia thisia thi ngamh in thi tu hi, banghang ziam cile nang in ka thu nong ni bua a, tuaciang Uriah ii zi na la hi.
11 Nangma innkuan sung pan ma in khat ma in nangma ngim hong piak natu in ka kiciam hi. Na zite nangma kung pan la in midang khat ka piak ciangin hi thu na mu tu hi; ama in suntangin amate luppui tu hi.
12 A thimtham in mawna vawt ku ni hi, ahihang Israel theampo ii a mu tu in suntangin tuabang ka piangsak tu hi,” ci hi. Ref 12:11-12 2 Sa 16:22
13 David in, “ Topa tungah maw zo khi hi,” ci hi.
Nathan in, “ Topa in hong maisak hi; thi ngawl tu ni hi.
14 Ahihang hi bangin na ngamtatna panin Topa simmawkna lak zo na hikom na ta sia thi tu hi,” ci in zo kik hi.
15 Tua zawkciang Nathan inn ah cia hi.
David ii Tapa Thi
Uriah zi taw a hin David ii ta sia Topa in a ciinasak mama hi.
16 David in a ta dam natu Pathian tungah thu ngen hi. Ama in bangma ne nuam ngawl a, zan simin ama ii inndoi sungah pai in suat tungah lum hi.
17 A kumpi inn uliante in thosak nuamin hanciam hikale tho nuam ngawl a, amate taw bangma nekhawm nuam ngawl hi.
18 Nipi khat zawkciang a ta hong thi a, tuaciang David ii uliante in tua thu ama tungah son ngam ngawl uh hi. Amate in, “A ta nuntak lai zongin ih paupui ciang David in hong zo nuam ngawl hi. Na ta thi zo hi ci in bangbangin son thei tu hi ziam? Ama le ama bang khat po kilaw tha tu hi!” ci uh hi.
19 David in amate kihuau a mu ciang a tano thi zo hi, ci in phawk thei hi. Tua ahikom ama in amate munah, “Tano thi zo ziam?” ci in dongh hi.
“Hi hi, thi zo hi,” ci in amate in zo uh hi.
20 Suat tung pan David thoto a, kibualin, a sam pot a, a puan laih hi. Tua zawkciang ama Topa ii inn sungah pai in biakna vawt hi. Kumpi inn ah a heak kik ciangin an ngen a, a kilui po ciangin ne paih hi.
21 Ama uliante in ama munah, “Hi thu sia tel zo ngawl khu hi. Tano luhai lai in ama na kaa a, an na ne bua hi; ahihang a thi po ciang thoto in an na ne hi!” ci uh hi.
22 “Hi hi, a nuntak hunsung teng kapin an tang peu khi hi. Topa in kei hong hesuak tha tu a tano thisak ngawl tu hi ci in ka ngaisun hi.
23 Ahihang tu in thi zo ahiciang banghangin an tatang lai tu khi ziam? Tano nungtasak kik thei tu khi ziam? Ni khat ni ciang ama omna ah kei pai tu khi hi, ahihang ama kei kungah hong pai kik thei ngeingawl tu hi,” ci hi.
Solomon hong Piang
24 Tua zawkciang David in a zi Bathsheba heeneam hi. Ama in luppui in, tapa khat nei kik a, David in Solomon ci in a min phuak hi. Topa in patangno sia it hi,
25 tuaciang Topa in kamsaangpa Nathan thupia a, patangno min Jedidiah phuaksak hi, banghang ziam cile Topa in ama it hi.
David in Rabbah Khuapi La
(1 Khangtaanghthu 20:1-3)
26 Tua lanin Joab in Ammon te khuapi Rabbah a simna zom suak a, la zo dektak hi.
27 Ama in kamtaite paisak a, David tungah, “Rabbah sim zo khi hi, tuaciang a tui laakna zongh suan zo khi hi.
28 Tu in na ngalkap om lai teng hong khawmtua ta'n a, a khuapi simin, nangma tatak ma in la in. Tua khuapi la hi ci in min nga nuam ngawl khi hi,” ci in kosak hi.
29 Tua ahikom David in a ngalkapte khawmtua a, Rabbah ah kuanin sim a, zothal hi.
30 Ammon te ii biak milim pathian Molech ii lu tung pan David in kilogramme 35 bang a ngit suangmanpha khat a kisuan khamh kumpilukhu sia la hi. David in tua suangmanpha la in ama lukhu tungah suang hi. Ama ii khuapi sung pan a laaksak vanh zongh tam mama a,
31 a khua mite sia thing at naam, thik tumanh, thik heite taw naseamsakin, zawthawk thu taw uksuang seaksak hi. Ammon khua dangte sung a om mite zongh tuabang ma in seamsak hi. Tua zawkciang ama le a mite Jerusalem ah heak kik uh hi.