11
David le Bathsheba
1 Kumpipate in ngalsim veu in a kuan hun khaal kipat kik ciangin David in Joab sia a ngalkap bute le ngalkaphonpite taw kuansak hi; amate in Ammon te zo in, Rabbah khuapi uumci uh hi. Ahihang David ama sia Jerusalem ah om hi. Ref 11:1 1 Khang 20:1
2 Nikhat, ni kai zawkciang David sia a mutna pan hong tho a, kumpi innkhum tungah kaato hi. Ama tualai ah a vavaa ciang numei khat kibual in a om mu hi. Ama a mealpha mama hi.
3 Tua ahikom ama in kamtaite paisak in, tua nu sia akua ziam ci in a katsak ciang, Hit mi Eliam ii tanu, Uriah ii zi Bathsheba hi ci in he hi.
4 David in ama a sam tu in kamtaite paisak hi; amate in tua nu ama kung then hi, tuaciang ama in luppui hi. Ama sia tha simin a zeksa kithiansuana a man zawk hiat bek ahi hi. Tua zawkciang ama cia kik hi.
5 A zawkciang ama ngai ahi hunlam kiphawk a, David munah a son tu in kamtai paisak hi.
6 Tuasia ciang David in Joab tungah kam thaak a: “Hit mi Uriah hong puak ta'n,” cisak hi. Tua ahikom Joab in David kungah ama paisak hi.
7 Uriah hong thet ciang David in Joab le a ngalkapte a ciidam ziam, ngal kidona bangbang hi ziam ci in dongh hi.
8 Tuaciang, ama in Uriah munah, “Cia in a, tawm vei tawlngak hun la ta'n,” ci hi. Uriah in nusia a, tuaciang David in a inn ah letsong puaksak hi.
9 Ahihang Uriah cia ngawl a; kumpi inn kongpi ah kumpipa a cingte taw lum hi.
10 Uriah sia inn ah a cia ngawl hunlam David in a zaak ciang ama dongh a, “Hun saupi inn taw kikhen a, nong heak kik zawk bek hi ngawl ziam; banghangin cia ngawl ni ziam?” ci hi.
11 Uriah in, “Israel te le Judah te ngal sungah om a, tuaciang Thuciamna Thingkuang zongh amate taw om hi; kei hong ukpa Joab le a bute zongh mun taanzauna ah ngiaphual saat hi. Bangbangin kei inn zuan a, ne in dawn in ka zi taw lum thei thong tu khi ziam? Tuabang peuma in ngamta ngeingawl tu khi hi ci in biakna taw kisai a thiangtho theampo taw ka kiciam hi,” ci in zo hi.
12 Tua ahikom David in, “Tua ahile tuni in hi sungah taam lai in, zing ciangin kong puak kik tu hi,” ci hi. Tua ahikom Uriah sia tua ni le a zing ciang dong Jerusalem ah taam hi.
13 David in nitak an ne tu in Uriah sam a, zu khamsak hi. Ahihang tua zan zongh Uriah a inn ah cia peang ngawl hi; kumpi inn a cingte inndoi sungah ama puanvan tungah mu zaw hi.
14 A zingsang ciang David in Joab lai thaak a, Uriah in a lai puaksak hi.
15 Ama in a lai sungah: “Uriah sia ngal kisim a nasia belna, ngal mai ah koi in, tuaciang nungkin vun a, ama thalup thuaksak vun,” ci in at hi.
16 Tua ahikom Joab in khuapi a uumci laitakin ngalte thahatna munah Uriah puak hi.
17 Ngalte ngalkapte khuapi panin hong pusuak in, Joab ngalkapte sim uh hi; David ii ngalkapmang pawlkhat kithat a, Uriah zongh thi hi.
18 Tua zawkciang Joab in David munah ngal kidona thu zasak hi,
19 tuaciang ama in kamtai pa pau natu hil a, “Kumpipa tungah ngal kidona thu teng na son siat zawkciang,
20 ama thin uukin, hi bangin hong dongh thei tu hi. ‘Banghangin amate sim tu in khuapi taw a kinai lei na dong pai nu ziam? Khuapi luphungte tung panin thaltangte hong kap tu ci in he ngawl nu ziam?
21 Gideon ii tapa Abimelech a kithalupna ciamtee nawn ngawl nu ziam? A mun sia Thebez hi a, numei khat ii anngoaina suang khat taw luphung tung pan a densuk sia in ama khalum hi. Tua ahile banghangin luphung neak leih in pai nu ziam?’ Kumpipa in tu a bangin hong dongh le ama munah, ‘Na ngalkap mangpa Uriah zongh kithat hi,’ ci vun,” ci hi. Ref 11:21 Thkte 9:53
22 Tua ahikom kamtai pa, David kungah hong pai in Joab ii a thupiak bangin son hi.
23 Ama in, “Ih ngalte sia ei sangin hat zaw a, mun taanzauna ah ei hong sim tu khuapi sung pan hong pusuak hi, ahihang amate sia khuapi kongpi dong ka nawt kik uh hi.
24 Tuasia ciang amate in luphung tung pan thaltang taw hong kap in, na kumpi ngalkapmang pawlkhat hong thalupsak a, Uriah zongh thi hi,” ci hi.
25 Kamtaipa munah David in, “Joab na hanthawn in a, ngal kidona sung sia a kua teng thi tu ci in kison thei ngeingawl ahi nungsang a thin lal ngawl natu son in. Khuapi sia nasia seseam in sim a, a laak natu son in,” ci hi.
26 Bathsheba in a pasal kithat ci in a zaak ciang khuangai in tau hi.
27 A khuangai tu hun teng a bo ciangin David in ama sia kumpi inn ah sam hi; ama ii zi hong suak a, tapa khat hing hi. Ahihang David ii ngamtatna huvau Topa lungkim ngawl hi.