24
David in Saul ii Nuntakna Khoaikhe
1 Philistine te a simna pan Saul hong cia kik ciang, David sia Engedi nai dui sungah om hi ci in Saul munah kison hi.
2 Saul in Israel ngamsung ngalkap phabel 3,000 la in David le a mite zong tu in Ngam Keal Suangpi ii nisuana sangah hong pai uh hi.
3 Ama in tuukhawk pawlkhat taw a kinai lampi hui suanghawng khat ah awnghaw tu in tum hi. Tua sia David le a mite ii a sung tawngh ah a bukna suanghawng na hi luilam hi. Ref 24:3 Ps 57 Thulu; Ps 142 (Thulu)
4 Amate in ama munah, “Tusia nangma ii hunpha hi! Topa in na ngalte nangma khut sungah kong koi tu hi hong ci sa hi, ama tungah na law nop po law thei tu ni hi,” ci uh hi. David bokvak in pai a, Saul heak ngawl lan in a puantual mong bek khat at tansak hi.
5 Ahihang tuasia hun laitakin David thinnuam ngawl a,
6 ama in a mite tungah, “ Topa ii kumpipa in a teal ka topa tungah siatna ka vawt ngawl natu Topa in hong keamcing tahen! Ama tawm zongh ka suksiat thaak ngawl tu kisam hi, banghang ziam cile Topa ii tealsa kumpipa ahi hi!” ci hi. Ref 24:6 1 Sa 26:11
7 Tua ahikom David in a mite sia Saul a sim ngawl natu in a thinzosak hi.
Saul dingto a, suanghawng nusia in ama pai natu ah pai tu in kipan hi.
8 Tua zawkciang David pusuakin a nung panin zui a, “Kumpipa awng!” ci in ama biakpui hi. Saul hong kiheak a, tuaciang David lei ah bok suk in zatak a piak zawkciang,
9 ama in, “Banghangin keima nang vawtsiat tu hanciam hi ci a, thu hong son mihingte thu ngai ni ziam?
10 Tu ma hiat ma in Topa in nang sia suanghawng sung keima khut sungah hong piak sia nangma tatak ma in mu thei ni, hi. Ka mite pawlkhat in nang thatlum in hong sawl hi, ahihang khuangai huai kong sa a, tawm zongh nasak ngawl tu khi hi ka ci hi, banghang ziam cile nang sia Topa ii kumpipa tu in hong teal na hi hi.
11 Ka pa awng hong en ta'n, na puantual mong bek ka khut sungah ka toai sia en in! Hong thatlum thei khi hi, tuabang hi ngawlin hisia bek at keak zaw khi hi. Hisia in nang langpanin kong leedo nop ngawlna le nang bangma kong law nop ngawlna thu hong telsak tu hi. Nang tungah bangma hong khial ngawl napi kei hong that nuam in hong vaizui ni hi.
12 Topa in ei nii akua maw hi ziam thu hong khen tahen! Kei tungah nong ngamtatna hu in Topa in nang daan hong pia tahen, banghang ziam cile nang sia bangma hong law ngawl tu khi hi.
13 Taanghkam teptee khat, ‘Siatna sia misiate bek in vawt hi’ a ci sia he ni hi. Tua ahikom nang sia bangma hong law ngawl tu khi hi.
14 Israel kumpipa ii a thalup nop sia en vun! A del thapaai sia bang ziam en vun! Ui thisa khat, uili khat hi lel ziam! Ref 24:14 1 Sa 26:20
15 Ei ngeal akua maw hi ziam Topa in thu hong khen tu hi. Hi thu ama in hong en cian tahen, kei hong hung in, nang khut sung pan hong hun tahen,” ci hi.
16 David ii thuson zawkciang, Saul in, “Ka ta David awng, nangma tatak ma ni ziam?” ci hi. Tuaciang ama hong kap hi.
17 Tua zawkciang David munah, “Nangma maan a, kei khial khi hi. Kei ii nang tungah khialna ta za kong nei kawmsung panin, hong dik mama ni hi!
18 Tu ni in nang sia kei tungah bangza in hong dik ni ziam ci in hong lak zo ni hi, banghang ziam cile Topa in na khut sungah kei hong aap hi napi nong thatlum bua hi.
19 Mihing khat in a ngalpa man zo kasap vawtsia ngawlin bang tanvei suaktasak kik ngei ziam? Tuni in kei tungah nong vawt teng hu in Topa in nang thupha hong pia tahen!
20 Tu in ka tel thu in nang sia Israel te kumpipa suak tu a, kumpi ngam sia nangma ukna nuai ah kizom suak tu hi.
21 Ahihang ka min le ka innkuan ii min a kimakngil bit ngawl natu in, ka suan ka paalte nong khoaikhetsak natu Topa min taw kamciam hong pia ta'n,” ci hi.
22 David in tuabang ka hi tu hi ci in kamciam pia hi.
Tuaciang Saul a inn ah cia kikin, David le a mite sia a bukna mun zuan kik uh hi.