23
David in Keilah Khua Suatak
1 Philistine te in Keilah khua sim a, a anthak laak sa te a nguksak uh sia David in za hi.
2 Tua ahikom ama in Topa dongh a, “Philistine te sim tu in ka kuan tu ziam?” ci hi.
“Hi hi, amate sim in a, Keilah hun in,” ci in Topa in zo hi.
3 Ahihang a mite in David munah, “Hi lai Judah ah ih kiitak tu a khom om hi; Keilah ah pai in Philistine ngalkapte sim leang pha ngawl seseam tu hi,” ci uh hi.
4 Tua ahikom David in Topa dongh kik a, tuaciang Topa in, “Pai in a, Keilah sim tavun, banghang ziam cile Philistine te kong zosak tu hi,” ci hi.
5 Tua ahikom David le a mite Keilah ah kuanin, Philistine te sim uh hi; amate in tam ma thatin, a ngannote laaksak uh hi. Tuabangin David in tua khuapi hun hi.
6 Ahimelech ii tapa Abiathar suakta in Keilah khua ah David a pop ciang ephod keng hi.
7 David ii Keilah a zotna thu Saul tungah a kison ciang, “Pathian in ama sia ka khut sungah hong pia zo hi. David in ngalnanna luphung kongpite a nei khuapi sung sangah a tumna taw ama le ama thaang kisia zo hi,” Saul in ci hi.
8 Tua ahikom Saul in a ngalkapte samin, Keilah khua ah David le a mite uumci sawm hi.
9 Saul ii amate sim tu in a ngealna thu David in a zaak ciang, thiampi Abiathar munah, “Hi sungah Ephod hong paipui ta'n,” ci hi.
10 Tua zawkciang David in, “ Topa Israel ii Pathian awng, kei na naseampa hu in Saul sia Keilah khua ah pai in suksiat sawm hi ci in za khi hi.
11 Keilah khua mite in kei Saul khut sungah hong aap tu ziam? Ka zaak bangin Saul hong pai takpi tu ziam? Topa Israel ii Pathian awng, nong zo natu hesuak kong ngen hi!” ci hi.
Topa in, “Saul hong pai tu hi,” ci in zo hi.
12 “Tua ahile Keilah khua mite in kei le ka mite Saul khut sungah hong aap tu ziam?” ci in David in dongh kik hi.
“Amate in no hong aap tu hi,” ci in Topa in zo hi.
13 Tua ahikom David le a mite — a vekpi 600 khawng — Keilah khua thakhat ma in nusia a, paisuak uh hi. Saul in Keilah khua pan David a suatak hunlam a zaak ciang a ngealna kheal hi.
David Mualtung Ngam ah Om
14 Ziph khuapi naina duisung, mualtung ngam ah David buu in om hi. Saul in zong tawntung a, ahihang Pathian in David sia ama ii khut sungah a aap bua hi.
15 David in Saul ii ama a thalup nopna sia phawk hi.
David sia Ziph khua paam duisung, Horesh ah om hi.
16 Tua mun ama kungah Jonathan pai a, Pathian ii sungsiatna a muan natu in hanthotna pia hi,
17 tuaciang ama munah, “Lau heak in, ka pa Saul in nang bangma hong law zo ngawl tu hi. Ama in nang Israel kumpipa tu hi a, kei sia nangma zom a zalian kik bel ka hi tu sia tel mama hi,” ci hi.
18 Amate nii khat le khat kilawmtatna in a thiangtho kamciam kipia hi. David sia Horesh ah taamin, Jonathan inn ah cia hi. Ref 23:18 1 Sa 18:3
19 Ziph khuapi panin mihing pawlkhat Gibeah, Saul kungah hong pai in, “David sia Judah thangsang duisung, koma ngam Horesh a om Hachilah Mualtung ah buu hi. Ref 23:19 Ps 54 Thulu
20 Kumpipa awng, ama bangza in man nuam na hi sia hong he khu hi; tua ahikom koma ngam sungah hong pai ta'n, na mat thei natu koma in vawt hamtang tu khu hi,” ci uh hi.
21 Saul in, “Kei tungah hong dik mama na hi uh ciang, Topa in thupha hong pia tahen!
22 Pai tavun a, khatvei ma hong telthiang tavun; ama koisung tatak ah om ziam, tua munah akua in mu ziam, a man in hong kan tavun. Ama sia kukal mama hi ci in za khi hi.
23 A bukna mun tatak hong zong tavun a, kei kungah thu hong puaksak paih nanak tavun. Tua zawkciang noma kong zui tu a, ama tua ngam sungah a om lai le Judah ngam buppi vai a kul zong ka zong tu hi,” ci in zo hi.
24 Tua ahikom amate Saul mai ah pai a, Ziph ah heak kik uh hi. David le a mite Judah ngam thangsang duisung ngamtongta kuam, Maon duisung ah om uh hi.
25 Saul le a mite in David zong tu in pusuak uh hi, ahizong ama in a thu za in, Maon ngampa sung mual khat zuan in tuak ah taam hi. Saul in hi thu a zaak ciang David zuizen hi.
26 Saul le a mite sia mualpangh langkhat ah om in, a lang pangh a om David le a mite taw mual in daa hi. Saul le a mite in amate hong neak a, man dektak ahiciang, amate zong manlang takin tai uh hi.
27 Tua zawk bek lianin kamtai khat hong theng a, Saul munah, “Philistine te in ih ngam hong sim hi! Thakhat ma in hong heak kik ta'n!” ci hi.
28 Tua ahikom Saul sia David a zuizenna tawlnga in, Philistine te do tu in kuan hi. Tua hu in tua mun sia Kikhenna Mual kici hi.
29 David in tua mun nusia in Engedi ngam sungah buu hi.