2
Hannah ii Thungetna
1 Hannah in hi bangin thungen hi:
“ Topa in ka lungtang sia
lungdamna taw hong dimh hi;
Ama ii sepna sate hu in
bangza in ka lungdam ziam!
Ka ngalte ka nuisan hi;
Pathian in hong hu ahikom bangza in ka thinnuam ziam! Ref 2:1-10 Lk 1:46-55
2 “ Topa bangin a thiangtho
kuama om ngawl hi;
Ama taw a kibang kuama om ngawl hi,
Ih Pathian bangin hong dal
kuama om ngawl hi.
3 Na kisuantaak vazakna uh teng kheal vun;
Na kiphatsak kampaute thimsak vun.
Banghang ziam cile Topa sia
a he a tel Pathian hi a,
mihingte sepna vawtna theampo tungah thu khen hi.
4 Ngalkap thahat te ii thalte taltan a,
ahihang a thazawmte thahat tawto hi.
5 Khatvei lai in pha takin a kivaakte,
tu in an thalaw bek a, ngual cial sa in om hi,
ahihang a ngilkialte sia kial nawn ngawl hi.
Tasel zi sia ta sali hong nei hi,
ahihang ta tam mama te ii nu kungah kuama a taang nawn bua hi.
6 Topa in thatlum a,
tuaciang nungtasak kik hi;
ama in mihingte sia mithi khua ah puak hi,
tuaciangin heakpui kik hi.
7 Ama in mihing pawlkhat zawngkhalsak a,
pawlkhat hausak hi;
pawlkhat sia ama in kiniamkhiaksak a,
pawlkhat liansak hi.
8 Ama in mizawngte leivui panin laamto a,
a kitasamhte a lungmanna panin phongto hi. Ref 2:8 Ps 113:7
Amate sia kumpipa tapate taw kithawlsakin,
ki upat vawtna munah koi hi.
Simlei ii phungkawng sia Topa aa hi;
tuate ii tungah ama in leitung sato hi.
9 “Ama in a thumaan a mite ii nuntakna dal hi,
ahihang a seksolte sia khuazing sungah mang hi;
mihing khat in ama hantang tha ngum hatna taw mualsuak zo ngawl hi.
10 Topa ii ngalte sia kisusia cip tu hi;
Topa in amate vantung panin vanto bangin langpan tu hi.
Topa in leitung buppi thu hong khen tu hi;
ama in a kumpipa tungah vaangletna pia tu hi,
ama ii teal kumpipa in zosak tu hi.
11 Tua zawkciang Elkanah sia Ramah ah cia kik hi, ahihang Samuel patangno sia Shiloh ah taang a, thiampi Eli khutnuai ah Topa naseam hi.
Eli ii Tapate
12 Eli ii tapate sia mihing phelphol vive hi. Amate in Topa a awlmaw bua uh hi,
13 tua bek dom ngawlin thiampite ii mipite tung pan a nget thei tu te a nadon bua uh hi. Tua taangin mihing khat ii sangaw biakpiakna a om ciangin thiampi pa ii naseampa in kaa thum nei thiktung zum khat taw hong pai uh hi. A sa a kihuan saan laitakin
14 ama in beal sungah a thiktung kaa taw sun a, a laak po sia thiampipa ii neisa ahi hi. Shiloh ah sangaw biakpiakna pia tu in hong pai Israel mite theampo sia hi bangin kivawt hi.
15 Tua banah ngan thau hoai in a kihal ma in, thiampipa ii naseampa hong pai a, sangaw biakpiakna a pia pa munah, “Sa pawlkhat thiampipa em tu hong pia ta'n; ama in na sa huansa hong saang ngawl tu hi, sasial bek dei hi,” ci hi.
16 Tua pa in, “A maan bangin ngamta tawng, a thau hal phot tawng; tua zawkciang na dei po la in,” ci in a zo ciang, “Hi ngawl hi! tu ma in hong pia ta'n! Nong pia buale zawthawk thu taw la tu khi hi!” thiampipa ii naseampa in ci tu hi.
17 Hi bangin Eli ii tapate mawna sia Topa muna ah nasia leih hi, banghang ziam cile amate in Topa tungah biakpiaknate tuabangin simmawk vawt uh hi.
Shiloh ah Samuel
18 Tua hun sungin patang Samuel sia puanneal kawngsawm thiangtho khat taw Topa na seam hi.
19 A nu in a pasal ii kum sim sangaw biakpiakna a vawt simin a pai khop uh ciangin, puantual khat veu ama atu in khuisak a, puak hi.
20 Tua hun ciang Eli in Elkanah le a zi thupha pia a, Elkanah munah, “ Topa atu na piaktuam na tapa taangin hi numei nu tung panin ta dangte zongh hong pia tahen,” ci hi.
Tua zawkciang amate inn ah cia kik uh hi.
21 Topa in Hannah sia thupha pia takpi a, tapa thum le tanu nii nei thua hi. Patang Samuel sia Topa na a sepna sungah khangto hi.
Eli le A tapate
22 Tu in Eli sia huai mama zo hi. Ama in a tate ii Israel mite tungah a ngamtatna theampo zaza a, Topa ompuina Puanbuk kongbiang a na a seam numeite ngawngawn luppui uh hi, ci in za hi.
23 Tua ahikom amate munah, “Banghangin hi bangte vawt nu ziam? Mihing theampo in siatna na vawt uhte hong son hi.
24 Kheal vun, ka tate awng! Hi thu sia a lipkhaphuai mama in Topa mite ii son ahi hi!
25 Mihing khat in midang khat tungah a maw le Pathian in sungsia thei hi, ahihang Topa tungah a mawte sia akua in sungsia thei tu ziam?” ci hi.
Ahihang amate in a pa thu a ni bua uh hi, tua ahikom Topa in amate thalup tu in khensat zo hi.
26 Patang Samuel sia hong khang tawto a, Topa le mihingte mai ah maipha nga hi. Ref 2:26 Lk 2:52
Eli ii Bangkua atu Sonkholna
27 Topa kung pan hi thu puak in kamsaang khat Eli kungah hong pai hi: “Na taanghpupi Aaron le innkuanpuite Egypt kumpipa salin a om lai in, Aaron tungah keima ka kilaak hi.
28 Israel minam theampo ii sung pan keima thiampi tu, biaknatau ah a seam tu, ngimnamtui hal tu, ephod silh a, keima thu hong dongh tu in amate innkuan ka teal hi. Tuaciangin biaknatau tungah a kihal sangaw biakpiakna te tel khat sia amate tan thei natu thu ka pia hi. Ref 2:28 a Pu 28:1-4 ; b Thiam 7:35-36
29 Tua hikasap ka mite tung pan, ka nget biakpiaknate le sangaw biakpiaknate banghang duhopna thin taw en ni ziam? Eli awng, ka mite ii kei tungah hong piak sangaw biakpiakna theampo pan sabak phabel teng taw na tate a thau dong amate le amate na kivaaksakna taw banghangin kei sangin na tate upat vawt zaw ni ziam?
30 Keima, Israel te ii Topa Pathian in na innkuan le na phung sia keima thiampi seam tawntung tu hi, ci in a bosa hun sungah kamciam ka pia hi. Ahihang tu ahile kong cina pan, tuasia len nawn ngawl khi hi! Tua sangin kei hong patoai te ka patoai tu a, kei hong simmaw te ka ngaimawk vawt tu hi.
31 Ngai in, na bangkua sungah kuama a khanhaam in a nuntak ngawl natu, na bee na ngui sungah tangval khangmoi teng ka thalup siat tu hun hong theng tu hi.
32 Nangma in ngim na nga tu a, Israel midangte thupha ka piakte na eang tu hi, ahihang na bangkua sungah kuama a khanhaam dong a nungta buatu hi.
33 Ahitazong na suan na paalte khat sia keamin ka nungtasak tu a, thiampi in ka na seam tu hi. Ahihang ama sia a mittaw in, a lam etna theampo bo tu hi, tuaciang na suan na paal theampo sia thi ngamh in thi tu hi.
34 Na tapate nii Hophni le Phinehas, ni khat thu in hong thi khop ciang kong son teng tung hi ci in hong lak tu hi. Ref 2:34 1 Sa 4:11
35 Vawt le ka oai theampo vawt a, kei tungah hong thumaan tu thiampi dang khat ka teal tu hi. Ama sia suan le paal ka pia tu a, amate in ka teal kumpipa omna ah seam tawntung tu uh hi.
36 Na suan na paal sung pan a luhai lai te in tua thiampipa kungah pai in sum le anneak tu ngen tu a, tuaciang a neak tawm tu a zonna in thiampite nasep a hu thei natu in ngen tu hi,” ci hi.