SAMUEL KHATNA
(The First Samuel)
Thuciamlui sung a, taanghthu tuanthu dangte bangma in hi thubu ii thuthun sia Pathian tungah thumaan na in zawna ngana hi a, thunit ngawlna in lalna piangsak ci thu hi. Hisia sia thiangtho takin Topa ii thiampi Eli tungah a son na hi 2:30; “Kei hong zatak vawtte ka patoai tu a, kei hong simmawte ka ngaimawk vawt tu hi.”
Hi thubu in kumpi kikoi na huvau ngaisutna tuatuam omte ciamtee hi. Topa mama sia Israel kumpipa tatakin kingaisun a, ahihang mite ngetna a zo kikna in Topa in kumpipa khat amate atu tealsak hi. A thupi sia kumpipa le Israel mite a kibangin ngam uk thunei bitna le thukhenna nuai ah a omna thu hi. (2:7-10) Pathian thukhamte nuai ah, a hau a zawng a kibangin mihingte theampo ii nga tuak thute kepcingsak natu ahi hi.
1
Shiloh ah Elkanah le A Innkuante
1 Ephraim mualtung ngam Ramah khua ah Ephraim nam ahi Elkanah a kici pasal khat om hi. Ama sia Jeroham ii ta, Elihu ii tupa hi a, Tohu baangkua, Zuph bee le phung sung pan ahi hi.
2 Elkanah in zi nii nei a, Hannah le Peninnah ahi hi. Peninnah in ta nei ahihang Hannah in nei ngawl hi.
3 Kum simin Elkanah sia Topa Vaanglianbelpa bia tu le sangaw biakpiakna vawt tu in Ramah pan Shiloh ah pai hi, tua munah Eli ii tapa nii te Hophni le Phinehas sia Topa ii thiampi seam uh hi.
4 Elkanah in sangaw biakpiakna a vawt simin, tel khat Peninnah pia a, tel khat tek sia a tate pia hi.
5 Tuaciang ama in Hannah it mama hi napi tel khat bek pia thei hi, banghang ziam cile Topa in ta neisak ngawl hi.
6 A kidem pui Peninnah in ama sia nunau zazaan in, a maizum thethei tu in vawt sia hi, banghang ziam cile Topa in Hannah sia ta selsak hi.
7 Kum khat zawk kum khat hi bangin papai a; Topa ii inn ah a pai uh simin Peninnah in Hannah a thin lalsak mama ahikom Hannah sia kap a, bangma a ne nuam bua hi.
8 A pasal Elkanah in, “Hannah awng, banghangin kap ni ziam? Banghangin an ne nuam ngawl ni ziam? Banghangin hee tawntung ni ziam? Tapa sawm sangin kei sia nang atu manpha zaw hi ngawl khi ziam?” ci in dong hi.
Hannah le Eli
9-10 Ni khat, amate Shiloh khua, Topa inn sungah an a neak zawk uh ciang, Hannah hong dingto hi. Ama sia a thin na sa mama a, kap ngawpin Topa tungah thungen hi. Tua hun sung tengin Eli thiampipa sia ama omna kongkha hui ah to nginge hi.
11 Hannah in a ciliap huai kamciam khat pia hi: Vaanglianbelpa “ Topa awng, na naseamnu hong en ta'n! Ka ngimna hong en ta'n a, hong phawk ta'n! Hong mangil heak in! Tapa khat nong pia le, ama nuntakna buppi nang tungah tuam aap tu in kong kamciam hi, ama in a sam meet ngeingawl tu hi,” ci hi.
12 Hannah in Topa tungah hun saupi sung thungen top a, tuaciang Eli in ama ii muk en hi. Ref 1:11 Mi 6:5
13 Ama sia a thimthamin thungen hi; a muk phun ahihang a aw suaksak ngawl hi. Tua ahikom Eli in ama sapittui kham hi tu in um hi,
14 tuaciang ama munah, “Na zukham ngamtatna teng tawp in! Zu ne nawn heak in a, na zu neak tawp in!” ci hi.
15 Ama in, “Hi ngawl khi hi, kei zu kham hi ngawl khi hi, topa awng, zu ne sa in om ngawl khi hi! A cimaw ka hi hi, thu ngengen in ka ngimna teng Topa tungah sung khi hi.
16 Nupi mannung ngawl hong sa heak in. Lungmang mama ka hikom hi bangin thu ngengen khi hi,” ci in zo hi.
17 “Thinnuam in va pai ta'n, Israel te ii Pathian in na nget teng hong pia tahen,” Eli in ci hi.
18 “A tawntungin cikna thiamna taw kei hong phawk ta'n,” ama in ci hi. Tuasia zawkciang an tawm ne in paikhia a, a khuangai nawn bua hi.
Samuel ii Pianna le a Ki aapna
19 A zingsang kik ciang Elkanah le a innkuanpuite tho pal in, Topa a biak zawk uh ciang Ramah khua ah ciakik uh hi. Elkanah in a zi Hannah ompui a, Topa in a zi thungetna zo hi.
20 Tuabangin ama naungil om a, tapa khat hing hi. Ama in a min Samuel phuak a, “Ama sia Topa tung pan ka nget hi” a cina ahi hi.
21 Elkanah le a innkuanpuite Shiloh ah pai in Topa tungah kum sim sangaw biakpiakna le a kamciam tuam sangaw biakpiakna a piak tu hun hong cing kik hi.
22 Ahihang tusia hunin Hannah hong pai bua hi. Ama in a pasal munah, “Nau in noai a ten po ciang a nuntak sung teng a om natu in Topa inn ah ka paipui tu hi,” ci hi.
23 Elkanah in zo kik a, “Pha hi, phabel na sak bangin vawt in; nau noai na tensak dong inn ah om in. Tuaciang Topa in na kamciam hong taangtungsak hen,” ci hi. Tua ahikom Hannah sia inn ah om a, a nau keam hi.
24 Ama in nau noai a tensak zawkciang Shiloh ah paipui a, kum thum a pha khuital khat, anvui kilogramme 10 le savun ip sungah sapittui a dim keng hi. Ama in Samuel sia moi mama ahihang Topa inn Shiloh ah paipui hi.
25 Amate in khuital a ngaw zawkciang nauno sia Eli kungah paipui uh hi.
26 Hannah in ama munah, “Topa awng hong ngai zii ta'n. Kei nong ciamtee lai ziam? Kei sia hi munah dingin Topa tungah thu a ngengen nong mu numei sia khi hi.
27 Hi patang sia ama munah ka ngen a, ka nget bangin hong pia hi.
28 Tua ahikom Topa tungah ama aaptuam khi hi. A nuntak lai theampo ama sia Topa neisa suak tu hi,” ci hi.
Tua zawkciang amate in tua munah Topa bia uh hi.