12
Samuel in Mipite tung Thuson
1 Tuaciang Samuel in Israel mite munah, “Nong nget uh theampo hong vawtsak zo khi hi. Kumpipa khat no hong uk tu in hong pia zo khi hi,
2 tu in no lam hong pui tu ama nei zo nu hi. Kei ka hi le huai in ka puakkaang zo hi, tuaciang ka tate sia no taw omkhawm nu hi. Ka khangno lai pan kipan tu dong noma lampui seam zo khi hi.
3 Hi sungah om khi hi. Ka sep ka vawt khat po ahi ngawl a om le tu in Topa le a tealsa kumpipa mai ah maw hong suan tavun. Mihing khat po ii khui ahizong, laa ahizong kong laaksak ngei ziam? Akua khat po kong theam ngei, kong nengniam ngei ziam? Khat po tung pan sumnguk kong saang ngei ziam? Hi bang khat pawpo ka ngamta ngei le ka laak babang pia kik tu khi hi,” ci hi.
4 Mipite in zo a, “Hong theamin hong nengniam ngeingawl ni hi; kuama tung pan bangma la ngeingawl ni hi,” ci uh hi.
5 Samuel ii a zo kikna pan, “Kei a maw ngawl het in nong mu uh sia Topa le ama ii tealsa kumpipa sia tuni in tetti ahi hi,” ci hi.
“Hi ma hi, Topa sia kote ii tetti hi,” amate in ci in zo uh hi. Ref 12:6 Pu 6:26
6 Samuel in zom suak a, “ Topa sia Moses le Aaron a teal, Egypt pan na taanghpupite hong pusuapui sia hi.
7 Tu in na omna tek ah ding vun, Topa ii noma le na taanghpupite a hut natu a nasep lianpite theampo no kong phawksak tu a, Topa mai ah note maw kong suan tu hi.
8 Jacob le a innkuanpuite Egypt ah a pai lai in, Egypt te in nengniam ahiciang, na taanghpupite in Topa munah hu ngenin au uh hi, tuaciang ama in Moses le Aaron paisak in, Egypt ngam pan amate pusua pui a, hi ngam ah teangsak hi. Ref 12:8 Pu 2:23
9 Ahihang mite in Topa a Pathian mangil a, tuasia ciang ama in Philistine te, Moab kumpipa le Hazor khuapi ii ngalkaphonpi ukpa Sisera te in na taanghpupite simsak a, zothal hi. Ref 12:9 Thkte 4:2; Thkte 13:1; Thkte 3:12
10 Tua zawkciang amate in Topa tungah hu ngenin, ‘Ko sia maw zo khu hi, banghang ziam cile nang kung panin kiheak khu hi, Topa awng, tuaciang Baal le Astarte milimte bia khu hi. Ka ngalte kung pan hong suatak ta'n, tuaciang nangma hong bia tu khu hi!’ ci in au uh hi. Ref 12:10 Thkte 10:10-15
11 Tuaciang, Topa in Gideon, Barak, Jephthah, a khakbel in kei hong paisak hi. Kote khat simin na ngalte khut sung pan no kong suatak uh hi, tuaciangin ngammuang takin na teang uh hi. Ref 12:11 Thkte 7:1; Thkte 4:6; Thkte 11:29; 1 Sa 3:20
12 Ahihang Ammon te kumpipa Nahash in no hong sim tu in a kithoai laitak, Topa sia na kumpipa a hina na nial uh hi, tuaciang kei munah, ‘Ko hong uk tu kumpipa khat dei khu hi,’ nong ci uh hi. Ref 12:12 1 Sa 8:19
13 “Tu in hi sungah noma teal kumpipa om hi; na nget uh sia ama hi a, tuaciang Topa in no hong pia hi.
14 Topa na Pathian zatak vawtin a na seam in, tuaciang a thu ni in, a thupiakte na ni uh a, noma le na kumpipa in ama nung na zui uh le na theampo a dik a pha in hong piang tu hi.
15 Ahihang Topa ii pau ngai ngawlin, a thupiakte na ni bua uh le ama in no le na kumpipa hong langpan tu hi.
16 Tua ahikom na dinmun uh kholet vun, tua hile Topa hong sep tu na lianpite na mu tu uh hi.
17 Tu hun sia khuakhaal laitak hi kana ngawl ziam? Ahihang thu kong ngen tu a, Topa in vanto sakin nguatui hong puak tu hi. Hi bangin hong pian ciang kumpipa khat na nget uh sia Topa tungah nasia takin maw na hi uh hunlam na kiphawk tu uh hi,” ci hi.
18 Tua ahikom Samuel in thungen a, tua ni ma in Topa in vanto sakin nguazusak hi. Tuasia ciang mi theampo in Topa le Samuel kiita uh hi,
19 tuaciang Samuel munah, “Topa awng, nong hesuakna in, ka thi ngawl natu Topa na Pathian tungah thu hong ngetsak ta'n. Tu in koma mawna dangte tungsia ah kumpipa khat ka ngetna ah maw zo ka hi uh hunlam ka phawk uh hi,” ci uh hi.
20 Samuel in, “Lau heak vun, siatna khaatna tuaza in vawt na hi uh hangin, Topa nusia heak vun, ahihang na thin theampo taw ama na na seam vun.
21 A maan ngawl pathian te zuan heak vun; amate in hong hu thei ngawl, hong ngum thei ngawl hi, banghang ziam cile amate sia a tatak hi ngawl hi.
22 Topa in a ciliap huai kamciamna vawt zo a, ama in no hong nusia ngawl tu hi, banghang ziam cile no sia ama mite hong hisak tu in khensat zo hi.
23 Kei ka hile note atu thunget nawn ngawlna taw ama tungah mawna ka vawt ngawl natu Topa in thu hong pia hi. No vawt tu a pha le a maan thute kong hil zaw tu hi.
24 Topa thu ni vun a, thumaan takin na thin theampo taw ama ii na seam vun. Na lianpi no atu hong sepsak te ciamtee vun.
25 Ahihang mawna na vawvawt lai uh le no le na kumpipa uh hong kisusia tu hi.