11
Saul in Ammon mite Zothal
1 Tha khat bang zawkciang Ammon kumpipa Nahash in Gilead ngam sung, Jabesh khua sia a ngalkaphonpi kuanpui in uumci hi. Jabesh mite in Nahash munah, “Ko taw thukimna kho khat vawt in, tuaciang hong ukpa tu in kong saang tu uh hi,” ci uh hi.
2 Nahash ii zo kikna pan, “Thu khat na lungkim uh le no taw thukimna kho khat vawt ma tawng: Israel mi bup mindai natu in khat sim ii mittang ziatsang khelsak tu khi hi,” ci hi.
3 Jabesh lampuite in, “Israel ngam bup ah kamtaite ka paisak natu in ni sali hun hong pia ta'n. Kuama in hong hu tuak buale kong tum tu uh hi,” ci uh hi.
4 Kamtaite Saul ii teenna Gibeah hong thengin, a thu teng a kison ciang mihingte sia thinkiamin kap uh hi.
5 Saul sia a khuitalte taw lo panin hong cia zawk hiat bek hi a, “Bang tat nu ziam? Banghang mihing theampo kap ziam?” ci in dongh hi. Amate in Jabesh pan kamtaite ii thupuak teng son uh hi.
6 Saul in hi thu a zaak ciang, Pathian thaa in ama uk a, a thinso hi.
7 Ama in khuital nii ngoin, a bak a bak in a sem zawkciang, Israel ngam bup ah kamtaite sabak kengin paisak a, a kidop natu thu puaksak hi: “Ngal kisimna sungah Saul le Samuel nung a zui ngawl peuma a khuital tek uh tuabang ma in kivawtsak tu hi,” ci hi.
Israel mite sia Topa in bang khat po a law thak tu lau in, khat zongh kikhe ngawlin hong paikhawm tek uh hi.
8 Saul in amate Bezak ah khawmtua a: Israel pan 300,000 le Judah pan 30,000 pha uh hi.
9 Amate in Jabesh pan kamtai te munah, “Na mipuite munah son vun, zing ciang nisun ma in amate kisuatak tu hi.” Jabesh a mite in tua thupuak a nga ciangin lungdam leilam uh a,
10 tuaciang Nahash munah, “Zing ciangin hong tum tu khu hi, nong law nop po hong law ta'n,” ci uh hi.
11 Tua zanin Saul in a mite pawl thum in khen a, khuavak ciang ngalte ngiaphual sungah tum ngawpin Ammon te sim uh hi. Ni sun hun in amate thatlum ngawp uh hi. A suakta sun te khakhat in tai thaap uh hi.
12 Tuasia ciang Israel mite in Samuel munah, “Saul sia ih kumpi seamsak ngawl tu hi a ci te koi sungah om siat ziam? Ko tungah hong aap tavun, thatlum siat tu khu hi!” ci hi.
13 Ahihang Saul in, “Tuni in kuama kithisak ngawl tu hi, banghang ziam cile Topa in Israel a suatak ni hi,” ci hi.
14 Tuaciang Samuel in amate munah, “Ih vekpi Gilgal ah pai in, Saul sia ih kumpipa hi ci in khatvei taangko lai tawng,” ci hi.
15 Tua ahikom amate Gilgal ah pai siat a, tuasung mun thiangthona ah Saul sia kumpipa hi ci in thangsak uh hi. Amate in pawlkhop sangaw biakpiaknate pia in, Saul le Israel mite theampo tua thu huvau in poai khaam uh hi.