4
Vantung ah Biakpiakna
1 Hi santak ah mukholna dangkhat ka nei a, vantung ah kongkha khat kihong sa in a om ka mu hi.
Tuaciang lemle aw taw a kibang ka zaak ngeisa ahi kei hong paupuina awnging in “Hi sungah hong paito ta'n, hisia zawkciang bang teng piang tu ziam, ci in kong lak tu hi,” hong ci hi.
2 Thakhat thu in Thaa in kei hong uk hi. Tua mun vantung ah kumpi tokhum khat om a, a tungah mihing khat to hi.Ref 4:2-3 Eze 1:26-28; 10:1
3 Ama maitang sia jasper le carnelian suangmanphate bangin, taang a, tuasia ciang a kumpi tokhum buppi kiimkot ah emerald suanghing bang ahi sangun khat om hi.
4 Kumpi tokhum ii kiimkot ah a beamin, kumpi tokhum dang kul le li om a, tuate tungah upa kul le li puankaang silhin, khamh kumpilukhu khu in to uh hi.
5 Kumpi tokhum pan khualeng vazal a, nging vangam in vanto hi. Tua kumpi tokhum mai ah Pathian thaa salite ahi meisip salite kuang hi.Ref 4:5 Pu 19:16; Tpl 8:5; 11:19; 16:18; Eze 1:13; Tpl 1:4; Zec 4:2
6 A kumpi tokhum mai ah a thiang vakil limlangh tuipi taw a kibang khat zongh ka mu hi.
Kumpi tokhum kiim a pangh khat sim panin a nungta nganhing li in uumci a, a nung a mai theampo mittang taw kidim hi.Ref 4:6-7 Eze 1:22; 5-10; 10:14
7 A masabel sia tawpi taw kibang hi; a niina sia khuital taw kibang hi; a thumna sia mihing maitang nei hi; a lina sia muvanlai leang bang ahi hi.
8 Nganhing lite khat simin tha luk tek nei a, tuaciang tua thate sungsang le puasang ah mittang taw kidim uh hi. Sun taw zan taw amate in a lasak a tawlnga ngei bua uh hi:
“Vaanglianbel Topa Pathian sia
Thiangtho, thiangtho, thiangtho hi,
ama in a om sa, a om nginge, hong pai pheang tu pa hi,” ci uh hi.Ref 4:8 Eze 1:18; 10:12; Is 6:2-3
9 Kumpi tokhum tungah a to pa, a tawntung a tawntungin a nungta pa tungah nganhing li teng in minthanna, upatna le lungdamkona la sak uh hi.
10 Tuabangin a sep uh ciangin upa kul le lite sia kumpi tokhum tung a to Topa mai ah boksuk in, a tawntung a tawntungin a nungta pa bia uh hi. Amate in a kumpi lukhute sia kumpi tokhum mai ah khiasuk in,
11 “Ka Topa le ka Pathian!
Minthanna, upatna le
vaangletna saang tu in na kilawm hi.
Banghang ziam cile nangma in
na theampo na bitphua hi,
tuaciangin nangma deina taw
amate tungah pianna le
nuntakna na pia hi,” ci uh hi.