3
Sardis tungah Kamvaithak
1 “Sardis khua pawlpi ii vantunglalang tungah hi bangin at in:
“Hisia in Pathian ii thaa sali a neipa le aksi sali a neipa ii hong kamvaithak ahi hi. Nang in bang teng vawvawt ci in kong he hi; thi na hihang nungta nginge a, na minthan sia kong he hi!
2 Tua ahikom khanglo in a, na nei sun teng a thicip ma in tha khosak in. Banghang ziam cile na sep teng sia ka Pathian mai ah cialcing ngawl lai hi, ci in kong mu hi.
3 Tua ahikom note hong kihil sa le na zaaksate phawk kik tavun; tua thute ni vun a, na mawnate uh pan kisiik kik vun. Na khanglo bua uh le, note kungah nguta bangin kong pai tu a, kong pai tu a hun ngawngawn zongh na he buatu uh hi.Ref 3:3 Mt 24:43-44; Lk 12:39-40; Tpl 16:15
4 Ahihang tua Sardis khua sungah a om pawlkhatte in, na puansilh uh na thiangsak zo uh hi. Puankaang silhin kei taw na vak khawm tu uh hi, banghang ziam cile tuabang tu in na kilawm uh hi.
5 Zawna a ngate in hi bang puankaang a silh tu hi, tuaciangin amate min sia a nungtate min khumna laibu sung pan ka phiat buatu hi. Ka Pa le a vantunglalangte mai ah amate sia keima neisa ahi hi, ci in a kilangh takin ka thangsak tu hi.Ref 3:5 Pu 32:33; Ps 69:28; Tpl 20:12; Mt 10:32; Lk 12:8
6 “Bil na nei uh le pawlpite tungah Thaa thusonnate ngai vun!
Philadelphia tungah Kam vaithak
7 “Philadelphia khua pawlpi ii vantunglalang tungah hi bangin at in:
“Hi kamvaithak sia a thiangtho le a thumaanpa tung pan ahi hi. Ama in David ii neisa tawtang nei a, kongkha a hon ciang kuama in a khak thei bua hi, tuaciang kongkha a kha ciang kuama in a hong thei bua hi.Ref 3:7 Is 22:22; Job 12:14
8 Note bang vawt ci sia kong he hi; vaangletna tawm nei hi ci in kong he hi; ka hilnate nong zui uh a, kei tungah nong thumaan uh hi. Na mai uh ah kuama ii kha thei ngawl kongkha khat ka hong zo hi.
9 Ngai vun! Jew mi a kici theam a leilot, tua Satan pawlte ahile, na peang uh ah a bok tu in kong paisak tu hi. Amate theampo in note kong it sia he tu uh hi.Ref 3:9 Is 49:23; 60:14; Is 43:4
10 Thuak kenkon natu kong thupiakte, keamcing na hi uh komin, leitung bup mihingte ze et tu in, ngimna hong pai ciang, note zongh kong keamcing tu hi.
11 Hong pai pal tu khi hi, kuama in na zawna tel uh hong suu zawk ngawl natu in, na neisun uh teng keamcing tavun.
12 A zo pa sia ka Pathian biakinn khuam ka suaksak tu a, ama in a nusia ngei buatu hi. Ama tungah ka Pathian min le ka Pathian kung vantung pan hong tuaksuk tu Pathian ii khuapi min ahi Jerusalem khuathak ii min ka at tu hi. Ama tungah ka minthak zongh ka at tu hi.Ref 3:12 Tpl 21:2; Is 62:2; 65:15
13 “Bil na nei uh le pawlpite tungah Thaa ii thusonte ngai vun!
Laodicea tungah Kamvaithak
14 “Laodicea pawlpi ii vantunglalang tungah hi bangin lai at in:
“Hisia in Pathian ii bitphua sa theampo ii pian kipatna, a maan tetti, a thumaan Amen ii hong kam vaithak ahi hi.Ref 3:14 Pau 8:22
15 Na sepsate ka he hi: Nang sia sa le sa ngawl, vot le vot ngawl, ci in hong he khi hi. Na sa le sa vet, na vot le vot vet lete kong oai hi.
16 Ahihang sa le sa ngawl, vot le vot ngawlin a lum bek na hikom ka kam sung pan hong sia kik tu khi hi!
17 Nang in ‘Kei sia hau in nuamsa ing; ka kisap theampo nei ing,’ ci ni hi. Ahihang bangza in zawngkhalin, hesuakhuai na hi hunlam na kihe bua hi! Nangma na zawng a, pumnguak na om a, na mittaw hi.
18 Tua ahikom ngaisut kong piakna panin, na hau natu in kei kung pan khamh, khamh ciitak hong lei ta'n. A maizumhuai pumnguaktangin na om sia na kiseal natu in, puankaang zongh hong lei ta'n. Khua na mu thei natu in, na mittang na noi tu in, za pawlkhat hong lei ta'n.
19 Ka it te a vekpi in, teihin daan ka pia hi. Tua ahikom na thin takpi taw in, na mawnate pan kisiik kik in.Ref 3:19 Pau 3:12; Heb 12:6
20 Ngai vun! Keima in kongkha kungah dingin ka king hi; khat pawpo in ka aw za in kongkha hong hon le, ama ii inn sungah tumin, ama taw an ka nekhawm tu a, ama zongh kei taw an nekhawm tu hi.
21 Keima in zawna nga zo a, tu in ka Pa kung kumpi tokhum tungah ka to bangma in zawna a ngate tungah keima kung ka kumpi tokhum tungah a to thei natu thu ka pia tu hi.
22 “Bil na nei uh le pawlpite tungah Thaa ii sonte ngai vun!”