20
Kum Tulkhat
1 Tua zawkciang vantung panin vantunglalang khat hong tuaksuk ka mu a, a khut sungah a hawng thukpui kikhana tawtang le thikkhau ngit khat toai hi.
2 Ama in taangh ngulpui — Doaimangpa kici Satan — sia man a, kum tulkhat sung thikkhau taw khit hi.Ref 20:2 Pian 3:1
3 Vantunglalang in ama sia a hawng thukpui sungah lawnsuk a, tawkalh in, kum tulkhat a cin mateng, minam tuatuamte a theam thei ngawl natu in a kongkha ah tepteena tuum hi. Tua zawkciang ama sia tawmvei sung kitha kik tu hi.
4 Tua zawkciang kumpi tokhumte ka mu a, a tungah a tote in thu a khen thei natu in vaangneina kipia hi. Pathian kammalte le Jesus ii pualaak thumaan thutak te a thansak uh hu a, a kithatte ii thaate zongh ka mu hi. Amate in nganhing le a lim a bia bua uh hi, tua bek dom ngawlin, a talki tungah ahibuale a khutte tung zongh ah nganhing tepteena a nei bua uh hi. Amate in hong nungta kikin Christ taw kum tulkhat kumpipate bangin a uk uh hi.Ref 20:4 Dan 7:9,22
5 Kum tulkhat a cin mateng in, a thisa a taanglaite kuama a nungta kik a om bua uh hi. Hi a thite thawsak kikna sia a masabel ahi hi.
6 Hi a thite thawsakna masa sungah a kihelte sia nasia takin thupha saangte hi uh a, a lungdamte ahi hi. Niivei thina in amate tungah vaangneina a nei nawn bua hi; amate sia Pathian le Christ ii thiampite hi tu uh a, ama taw kum tulkhat maangkhawm tu uh hi.
Satan Zawthalna
7 Kum tulkhat a bo zawkciang, Satan sia a thong pan kitha kik tu a,
8 leitung mun theampo ah a kithethaang Gog le Magog minamte theam tu in pai tu hi. Satan in tuate theampo sia ngalsim tu in hong kaikhawm tu a, tuipivaal ah senvuite za in tam tu uh hi.Ref 20:8 Eze 7:2,38:2,9,15
9 Amate leitung bup ah kizelin, Pathian ii mihingte ii phual le a it khuapi a kiim uum uh hi. Ahihang vantung panin, meikuang hong taaksuk a, amate lalsak hi.
10 Tua zawkciang amate a theam Doaimangpa sia nganhing le leilot kamsaangpa kivawkna meili le kaan sungah kivawk hi; tuaciangin amate sia sun taw zan taw a tawntung a tawntung ngim kipia tu hi.
A khakbel Thukhenna
11 Tuaciangin a lian kumpi tokhum kaang khat le a tungah a to pa ka mu hi. Leitung le vantung sia ama omna panin tai uh a, mu mun om nawn ngawl hi.Ref 20:11-12 Dan 7:9-10
12 Tuaciangin a thite a lian le a no a kibangin kumpi tokhum mai ah a ding ka mu hi. Laibute kihong a, tua zawkciang a nungtate tepteena laibu dang khat zongh kihong hi. A thite sia tua laibu sungah amate ngamtatna a kitepteena bangin thu kikhen hi.
13 Tua zawkciang tuipi in ama sungah a thite aap hi. Thina le mithi khua in amate ii a kep a thite aap uh hi. Tuaciang, a vekpi in a sepna uh bangin thu kikhen hi.
14 Tua zawkciang thina le mithi khua sia zongh meili sungah kisep hi. Hi meili in niivei thina ahi hi.
15 A nungtate min khumna laibu sungah a min a om ngawl peuma meili sungah kilawn hi.