19
1 Hisia zawkciangin, vantung a mihonte auna bang khat ka za hi. “Pathian pok vun! Ngupna, minthanna, vaangletna Pathian neisa ahi hi!
2 Ama ii thukhennate sia maanin tang hi! Ama in a paktatna taw leitung a lalsak pumpi zuaknu sia nilkeak zo hi. Pathian in ama daan pia hi, banghang ziam cile ama in Pathian naseamte thatlum hi,” ci uh hi. Ref 19:2 Thkna 32:43; 2 Kum 9:7
3 Tuaciangin amate au kik a, “Pathian pok vun! Khuapi a kaanghtumsak meikuang pan meikhu in a tawntung a tawntungin kaato hi!” ci hi.Ref 19:3 Is 34:10
4 Upa kul le li le nganhing nungta li teng sia bokin kumpi tokhum tungah a to Pathian bia uh hi. Amate in, “Amen! Pathian Pok vun!” ci uh hi.
Tuuno Mopoai
5 Tua zawkciang, kumpi tokhum panin aw khat hong nging a, “Pathian pok vun, a naseam theampo le ama a thasia mihing a lian a no theampo in pok vun!” ci hi.Ref 19:5 Ps 115:13
6 Tuaciangin tuiteau nging bang le vanto nging bang mihonpi auna aw bang khat ka za hi. Tua awte in, “Topa pok vun! Banghang ziam cile Topa, eite ii Vaanglianbel Pathian sia Kumpi ahi hi! Ref 19:6 Eze 1:24; Ps 93:1; 99:1
7 Eite lawpin lungdam tawng; ama ii letna pok tawng! Banghang ziam cile Tuuno mopoai hun hong theng zo a, ama ii mo tu sia in ama le ama kipuua sa in om zo hi.
8 Ama ii silh tu in a thiang, a tee vazia puante kipia zo hi,” ci uh hi. A puanneal in Pathian ii mihingte ii na pha a septe ahi hi.
9 Tuaciangin vantunglalang in kei tungah, “Hi thu at in: Tuuno mopoai sungah a kisamte sia mihing lungdamte ahi hi,” hong ci hi. Tuaciang vantunglalang in, “Hite sia Pathian ii a son tatak kammalte ahi hi,” hong ci thua lai hi.Ref 19:9 Mt 22:2-3
10 A peang ah ama bia tu in ka bok hi, ahihang, ama in, “Hong bia heak in! Keima in, Jesus ii hong pualaak thumaan thutak a kholet nangma le na suapuite theampo taw naseam khawm khat ka hi hi. Pathian bia in!” hong ci hi.
Banghang ziam cile Jesus ii hong pualaak thumaan thutakin kamsaangte thinsung a hil sia ahi hi.
Siphu Kaang tungah A to pa
11 Tuaciang vantung a kihongin ka mu a, tua ii sungah siphu kaang khat om hi. A tung to pa sia Thumaan Thutang kici hi; ama in khaikim takin thukhen a, a ngalte do hi.Ref 19:11 Eze 1:1; Ps 96:13
12 Ama mittangte sia meikuang bang hi a, a lu tungah kumpilukhu tam mama khu hi. Ama simngawl kuama dang ii a heak ngawl min khat ama tungah ki at hi.Ref 19:12 Dan 10:6
13 Ama silh puantual sia in chisan taw kidim hi. Ama min sia “Pathian Kammal” ahi hi.
14 Vantung ngalkap honte in puankaang neal silh a, siphu kaang tungah to in ama zui uh hi.Ref 19:15 Ps 2:9; Is 63:3; Jol. 3:13; Tpl 14:20
15 Ama kam sung panin a hiam namsau khat pusuak a tua taw ngam theampo a zothal tu hi. Amate tungah ama in thik ciangkhut taw uk tu a, vaanglianbelpa Pathian thin uukna ahi sapittui sukna sungah sapittuite siikcil tu hi.
16 A puantual tung le a pheizang tungah, “kumpite ii Kumpipa, topate ii Topa,” ci in a min ki at hi.
17 Tua zawkciang vantunglalang khat sia ni tungah a ding ka mu hi. Ama in vui sungah a leang vacimte munah awnging tatak taw, “Pathian poaipi sungah pai tu in hong kikhawmtua tavun! Ref 19:17-18 Eze 39:17-20
18 Kumpipate, ngalkap maangte, ngalkapte ii sa, siphute le a tung a tote ii sa, mihing theampo, sila le sila ngawlte, a lian a note ii sa ne tu in, hong pai tavun!” ci hi.
19 Tua zawkciang nganhing le leitung kumpipate le a ngalkap honte in siphu tung a to pa le a ngalkap honte sim tu in hong kingawmtua uh hi.
20 Nganhing le tua nganhing omna mai ah, nalamdang lakna a vawt leilot kamsaangpa kiman khawm hi. Nganhing tepteena a neite le, nganhing milim a biate sia, nalamdang laknate taw ama in theam zo hi Nganhing le leilot kamsaangpa sia, kaan meikuang meili sungah a hingtang in kivawk khawm hi.Ref 19:20 Tpl 13:1-18
21 A ngalkaphonpite sia siphu tung a to pa kam sung pan hong pusuak namsau taw kithatlum uh hi; tuaciang vacim theampo in a sa a du zaza in ne uh hi.