5
Pathian taw Thutang Kisuak
1 Tu in eite upna tungtawnin Pathian in thutang hong suaksak a, ih Topa Jesus Christ tungtawnin, Pathian taw kilemna ih nei hi.
2 Tu laitak a ih dinmun ahi Pathian ii thuthiamna sung a theng tu in upna tungtawnin ama in tua munah hong then hi. Tua ahikom eite in Pathian minthanna ih siim natu lametna ih nei hu in ih kisuangtaak hi!
3 Ih ngimnate hu zonghin ih angtang hi, banghang ziam cile ngimna in thuak zawkna piangsak a,
4 thuak zawkna in Pathian thukimna piangsak in, ama hong thukimpuina in lametna piangsak hi.
5 Hi lametna in hong thinkiamsak bua hi, banghang ziam cile Pathian hong piakthong letsong ahi Thaa Thiangtho zangh in ih thin sungah ama ii itna hong buak hi.
6 Banghang ziam cile cimaw a ih om laitakin Pathian ii a teal hun ciangin Christ sia mi ngilote atu in hong thi hi.
7 Mihing thutang khat atu thina thuak tu sia thu haksa ahi hi. Mihing pha khat atu a thi ngam khat po zongh om tha tu hi.
8 Ahihang eite mimaw ih hi laitak ma in eite atu Christ hong thina taw Pathian in eite bangzata in hong it ziam ci hong lak hi.
9 Tua ahiciang, tu in ama chisan taw eite Pathian mai ah thutang ih suak hi; tua ahile Pathian thin uukna pan ama in bangza in eite hong ngum zaw kan lai tu ziam!
10 Eite in Pathian ngalte ih hi laitakin, a Tapa thina tungtawnin eite sia ama taw a kilem a lawmte hong suaksak hi. Tu in Pathian lawmte hi zo ih hi le Christ nuntakna in bangza in hong ngum zaw kan lai tu ziam!
11 Ahihang tua teng bek hi ngawl hi; Pathian lawmte hong suaksak Topa Jesus Christ tungtawn a Pathian sepna tungah ih lungdam hi.
Adam le Christ
12 Mihing khat tungtawnin mawna leitung ah hong theng a, tuaciang ama mawna in thina hong puak hi. Tua taw kizui in mihing suan theampo tungah thina hong kizel hi. Banghang ziam cile mihing theampo maw zo uh hi.Ref 5:12 Pian 3:6
13 Thukham a kipiak ma in leitung ah mawna om zo hi; ahihang thukham om ngawlna ah mawna sazian kikoi ngawl hi.
14 Ahihang Adam hun pan kipan Moses hun dongin thina in mihingte uk a, Adam bang a Pathian thupiakna a ni ngawlte bek hi ngawlin a dangte zongh thi uh hi.
Adam sia hong pai pheang tu mihing khat ii lim ahi hi.
15 Ahihang tuate ngeal kibang ngawl hi, banghang ziam cile Pathian ii a thong a hong piak letsong in Adam ii mawna taw kibang ngawl hi. Tua mihing khat ii hu in mihing tam mama thi hi. Ahihang Pathian ii thuthiamna lian zaw pek a, tuasia bangma in mihing khat ahi Jesus Christ ii thuthiamna tungtawnin a thong a hong piak letsong sia lian zaw hi.
16 Tuabangin Pathian piak letsong le mihing khat ii mawna kilaklaw ah kilamdanna om hi. Mawna khat hang “maw hi” ci a thukhenna piang a, ahihang mawna tam mama kale zong “maw ngawl hi” cina letsong sia kilawm ngawlin hong piang hi!
17 Mihing khat ii mawna tungtawnin thina in hong uk hi. Ahihang Jesus Christ a kici mihing khat ii sepna taw kizui in bangza in a lianzaw thu piang ziam! Pathian ii a kicing thuthiamna le man nei ngawl a hong piak thutang suana a saangte in Christ tungtawnin a ngualzo nuntakna nga tu hi.
18 Tua ahikom mawna khat in mihing theampo hong puavawk a, thukhenna a piansak bangma in thutang nasepna khat in mihing theampo suaktasak a, nuntakna pia hi.
19 Mihing khat ii thunit ngawl hu in mihing theampo mawnei a kisuasak bangma in, mihing khat thunit hu in mihing theampo Pathian mai ah thutangte kisuaksak hi.
20 Mawna ngamtatna a khanto vaial natu in thukham kipia hi, ahihang mawna a khantona munah, Pathian ii thuthiamna khangto seseam hi.
21 Tua ahikom mawna in thina taw hong uk bangma in, Pathian ii thuthiamna in thutang suana taw hong uk a, ih Topa Jesus Christ tungtawnin tawntung nuntakna sungah hong then hi.