4
Abraham Etteena
1 Tua ahile ih pianna pa ahi Abraham thuakna sa tungtaang ah bang ih son tu ziam?
2 Ama ii ngamtatna tung panin Pathian in thutang suaksak ahile a kisuantaak natu nei tu hi — ahihang Pathian mai ah ama in bangma kisuantaak natu om ngawl hi.
3 Laithiangtho in, “Abraham in Pathian um a, tua a upna hu in Pathian in thutang suaksak hi,” ci hi.Ref 4:3 Pian 15:6; Gal 3:6
4 Naseam khat in sep thaman saang hi, tua thaman sia letsong kici thei ngawl hi; a thalaw sa hi ci in kingaisun hi.
5 Ahihang sepna hi ngawl a upna a nei sia in, mimawte maw ngawl hi a ci Pathian a up hu in, a upna sia Pathian in saang a, thutang suaksak hi.
6 Hi thu in sepna kihel ngawl Pathian ii thutang hi ci in a saan, mihingte ii lungdamna, David ii son sia ahi hi.
7 “Tatkhialnate kimaisak a,
a mawna pan a kisuatak te
bangza in a lungdam ziam! Ref 4:7-8 Ps 32:1-2
8 Topa ii a mawnate sazian in
a teptee ngawl tu sia in
mihing lungdam ahi hi!”
9 Hi lungdamna David ii son sia vunteap atte bek atu ahi ziam? Hi ngawl hi! Vunteap at ngawlte atu zongh ahi hi. Banghang ziam cile laithiangtho sungah a ki at bangin ih sonsa hi a, “Abraham in Pathian um a, tua a upna hangin Pathian in ama thutang hi, ci in saang hi.”
10 Hi thu bang hun laitakin piang ziam? Abraham vunteap a at zawkciang ziam? A at ma ziam? A at ma hi a, a at zawk hi ngawl hi.
11 Ama sia a khak sang ciangin a vunteap at pheang hi. Vunteap a atna zongh, Abraham in Pathian um ahikom Pathian in ama a vunteap a at ma in thutang hi ci a tepteena lim ahi hi. Tua ahikom Abraham in Pathian um a, thutang hi ci in ama ii a saante theampo, a vunteap at vateal ta buale kuama theampo ii thaa lamsang ah a pa uh ahi hi.Ref 4:11 Pian 17:10
12 Ama in vunteap atte ii pa zongh hi a, vunteap a at bek dom ngawlin, ih pa Abraham vunteap a at ma a, upna taw a nuntakna sungah ama bangma in a nungta te ii pa zongh ahi hi.
Pathian Kamciam sia Upna tungtawnin Kisaang
13 Pathian in Abraham le a suan a paalte munah hi leitung sia amate atu hi ci in kamciam pia hi, hi kamciam in Abraham ii thukham a nit hu hi ngawl a, a up hangin thutang hi ci a, Pathian in a teptee hu ahi hi.Ref 4:13 Pian 17:4-6; 22:17-18; Gal 3:29
14 Banghang ziam cile Pathian ii kamciam sia Thukham a tangte atu hi thong le mihingte upna sia a lui thawthong suak tu a, Pathian kamciam zongh man nei ngawl hi tu hi.Ref 4:14 Gal 3:18
15 Thukham in Pathian thin uukna piangsak hi; Ahihang thukham om ngawlna munah thukham paltanna om ngawl hi.
16 Pathian kamciam in upna bulphu in nei a, tua ahikom Abraham suan le paal Thukham tangte bek hi ngawlin — Abraham up bangin a umte theampo tungah man nei ngawlin a piak tu in kho takin vawt hi. Banghang ziam cile Abraham in eite theampo ii thaa lam sangah ih pa ahi hi.Ref 4:16 Gal 3:7
17 Laithiangtho in, “Minam tam mama ii pa kong suaksak zo hi,” a ci bangma ahi hi. Tua ahikom a thisa a nungtasak kik thei, a om ngeingawl laite thupiakna taw a piangsak thei, Abraham ii a up Pathian ii a muna ah tua kamciam sia kip hi. Ref 4:17 Pian 17:5
18 Muanmawk lamet natu om ngawl kawm panin Abraham in um a muangmaw ahikom ama sia “minam tam mamate pa” suak hi. Laithiangtho in “Na suan na paal te aksi za in tam tu hi,” ci hi.Ref 4:18 Pian 15:5
19 Tua hun lai in ama kum zakhat pha dektak zo a, a pumpi sia a thithi ma hi zo in, tua bek dom ngawlin Sarah in ta nei thei ngawl ahitazong a upna a thaneam tuan bua hi.Ref 4:19 Pian 17:17
20 Ama in a upna thasua ngawl a, Pathian kamciam zongh a muang la bua hi. A upna in ama thahatna taw kidimsak a, ama in Pathian pok hi.
21 Ama ii a thinsung tawngh pan a upna sia, Pathian in kamciam a piak bangin tungsak tu hi ci in um hi.
22 Tua thu hangin Abraham in upna tungtawnin, “Pathian in thutang hi ci in saang hi.”
23 “Ama sia thutang hi ci in kisaang hi,” ci kammal zongh ama bek atu a kici ahi bua hi.
24 Ih Topa Jesus thina pan a tho kiksak ama a um, thutang hi ci in hong kiciamtee ei atu zonghin a ki at kammal ahi hi.
25 Jesus sia eite ii mawna hu in a thi tu in ki aap a, Pathian mai ah thutang ih sua natu in nuntakna sungah ama kinungta kiksak hi. Ref 4:25 Is 53:4-5