36
Judah Kumpipa Joahaz
(2 Kumpite 23:30-35)
1 Judah mite in Josiah ii tapa Joahaz teal a Jerusalem khua ah ama sathau noai in kumpi suaksak hi.
2 Judah kumpi a sua lai in Joahaz kum 23 pha a, Jerusalem pan tha thum sung uk hi.
3 Egypt kumpipa Neco in ama thongtaaksak a, Judah panin Neco tungah ngunn kilogramme 3,400 le khamh kilogramme 34 phiangshia in piasak hi.
4 Neco in Joahaz ii suapuipa Eliakim Judah kumpi suaksak a, a min Jehoiakim ci in laihsak hi. Joahaz sia Neco in Egypt ngam ah paipui hi. Ref 36:4 Jer 22:11-12
Judah Kumpipa Jehoiakim
(2 Kumpite 23:36—24:7)
5 Jehoiakim sia Judah kumpi a sua lai in kum 25 pha a, Jerusalem pan kum sawm le kum khat sung uk hi. Ama in Topa a Pathian tungah maw hi. Ref 36:5 Jer 22;18-19; 26:1-6;35:1-19
6 Babylon kumpipa Nebuchadnezzar in Judah ngam sim in, Jehoiakim man a thikkol bulin Babylon ah paipui hi. Ref 36:6 Jer 25:1-38; 36:1-32;45:1-5; Dan 1:1-2
7 Nebuchadnezzar in Biakinnpi vanh manpha pawlkhat pua in Babylon a kumpi inn ah koi hi.
8 Jehoiakim ii a sep a vawt theampo, a kiihuai ngamtatnate le a tatsiatnate dongin Israel le Judah kumpipate Taanghthu sungah kiciamtee hi. A tapa Jehoiachin in a kumpiza laih hi.
Judah Kumpipa Jehoiachin
(2 Kumpite 24:8-17)
9 Jehoiachin sia Judah kumpi a sua lai in kum sawm le kum liat pha a, ama in Jerusalem pan tha thum le ni sawm sung uk hi. Ama zongh Topa tungah maw hi.
10 Khuakhaal kipat ciang Nebuchadnezzar kumpipa in Jehoiachin sia thongtaak tu in Babylon ah paipui hi. Biakinnpi sum le vanh manphate zongh pua hi. Tua zawkciang Nebuchadnezzar in Jehoiachin ii pano Zedekiah sia Judah le Jerusalem kumpi suaksak hi.Ref 36:10 Jer 22:24-30; 24:1-10; 29:1-2; Eze 17:12; Jer 37:1; Eze 17:13
Judah Kumpipa Zedekiah
(2 Kumpite 24:18-20; Jer 52:1-3a)
11 Zedekiah sia Judah kumpi a sua lai in kum 21 pha a, ama in Jerusalem pan kum sawm le kum khat sung uk hi. Ref 36:11 Jer 27:1-22; 28:1-17; 36:13; Eze 17:15—36:17; Jer 21:1-10
12 Ama in Topa tungah maw in Topa kammal a son kamsaangpa Jeremiah ii thusonte kiniamkhiakna taw ngai ngawl hi.
Jerusalem Khua Bona
(2 Kumpite 25:1-21; Jeremiah 52:3b-11)
13 Nebuchadnezzar kumpipa ii ama tungah a thumaan tu in Pathian min taw hamtangpi in a kiciamsak Zedekiah in ama leedo hi. Zedekiah thinpui in kisiik kik nuam ngawlin Israel te ii Pathian, Topa kung zuan kik nuam ngawl hi. Ref 36:13 Eze 17:15
14 Tua banah Judah lampuite, thiampite le mipite in a kiim ah a om minamte ii mawna khialnate zui in milim bia uh hi, tuabangin amate in Topa mama ii a thiansak Biakinnpi ninsak uh hi.
15 A taanghpupite ii Pathian, Topa in amate le a Biakinnpi a huuk nop manin a mite kidop thei natu in kamsaangte tatsat ngawlin paisak hi.
16 Ahizong amate in Pathian ii kamtaite nunau in, a kammalte awlmawk ngawl a, kamsaangte nuisan uh hi, a khakbel ciang a mite tungah Topa thin uukna nasia tatak ahikom suatak natu lampi om ngawl hi.
17 Tua ahiciang Topa in amate sim tu in Babylon kumpipa paisak hi. Kumpipa in Judah tangvalte Biakinnpi sung ngawngawn ah thatlum hi. Kumpipa in a moi a haam, numei pasal, a ciina a ciidam ci doi ngawlin kuama hesuak ngawl hi. Pathian in amate a vekpi ma ama tungah aap hi. Ref 36:17 Jer 21:1-10; 34:1-5
18 Babylon kumpipa in Biakinnpi sung, biakinn sum le vanh manpha, kumpipa le a uliante nei le lam teng theampo laksak a Babylon ah pua kik hi.
19 Ama in Biakinnpi le khuapi sia a kumpi innte le a nei a lam theampo taw haltum in khuapi uumna luphungte sutham hi. Ref 36:19 1 Kum 9:8
20 Ama in a nungta lai theampo Babylon ah ciapui a, tua munah amate in sila bangin Persia kumpilianpa hong khan dong ama le a suan a paalte ii na seam uh hi.
21 Tuabangin kamsaang Jeremiah tungtawn a, Topa ii hi bang a sonkhol sa sia taangtung hi: “Sabbath tawlngakna a kitang ngawl teng lo kik natu in a ngam sia kum sawmsali sung ngamtongta hi tu hi.”
Cyrus in Jew te Ciakiksak
(Ezra 1:1-4)
22 Persia mi Cyrus, kumpilianpa a sep, a kum khat na kumin Topa in kamsaang Jeremiah tungtawn a, a thusonte taangtungsak hi. A nuai a, a thupiaknate a suasak tu le ama ii ukna ngam theampo ah a nging a sim tu in lai at in a thaak natu Topa in Cyrus thawn hi:
23 “Hisia in Persia kumpilianpa Cyrus ii thupiakna ahi hi. Vantung Pathian, Topa in leitung buppi uk pa in keima hong koi zo a, Judah ngam Jerusalem ah ama atu biakinn khat sa tu in vaipuak hong pia zo hi. Tu in no, Pathian mite theampo awng, tualai ah va pai tavun a, Topa na Pathian note taw hong omkhawm tahen.”Ref 36:23 Is 44:28