EZRA
1
Cyrus in Jew te Cia kiksak
1 Persia mi Cyrus in kumpilianpa a sep, a kum khat kumin Topa in kamsaang Jeremiah tungtawn a, a thusonte taangtungsak hi. Topa ii thotna taw a nuai a thupiakna teng Cyrus in ama ukna ngamsung theampo ah a nging takin a sim tu lai khat at in thaak hi:Ref 1:1 Jer 25:11; 29:10
2 “Hisia in Persia kumpilianpa Cyrus ii thupiakna ahi hi. Vantung Pathian, Topa in leitung bup uk tu in keima hong koi zo a, Judah ngam Jerusalem ah ama atu biakinn khat sa tu in vaipuak hong pia zo hi. Ref 1:2 Is 44:28
3 Ama mi ahi note theampo taw Pathian hong omkhawm tahen. Note Jerusalem ah pai tavun a, Jerusalem ah a kibia Pathian, Israel te ii Pathian, Topa ii Biakinnpi sa kik vun.
4 Saltaang a mite a cia kik natu in hu tu a kul le, a innpaamte in amate hi bangin hu tu hi. Tua a innpaamte in ngunn le khamh, nguai an le vanh pua nganhingte sia, Jerusalem Pathian Biakinnpi sungah a piak tu biakpiaknate taw amate tungah pia khawm tu hi.”
5 Tuaciang Judah le Benjamin namte sung pan bee le phung lutangte, thiampite le Levi te, tuaciang Pathian ii a thin a phawnsak dangte theampo in Jerusalem ah, Topa Biakinnpi sa kik tu in kithoai uh hi.
6 A innpaamte theampo in na tam mama pia in amate hu uh hi: ngunn taw kivawt vanhzakte, khamh, nguai ante, vanh pua nganhingte, na manpha dangte le Biakinnpi atu in biakpiaknate ahi hi.
7 Cyrus kumpilianpa in Nebuchadnezzar kumpipa ii Jerusalem Biakinnpi sung pan a laaksak, ama ii pathiante biakinn sungah a koi kuang le hai te amate pia kik hi.
8 Ama in tua teng Judah ngamukmangpa Sheshbazzar a piak tu in tepteena lai a vawt kumpi sumkeampi pa Mithredath tungah aap hi,
9-10 a piak vanhte a nuai a bang ahi hi:
11 Khamh le ngunn taw kivawt khawbeamte le nadang tuatuamte a vekpi in 5,400 pha a, Babylon pan Jerusalem ah ama le a dang saltaangte a cia uh ciang Sheshbazzar in tua teng ciapui hi.