32
Assyria te in Jerusalem Sim sawm
(2 Kumpite 18:13-37; 19:14-19,35-37; Is 36:1-22; 37:8-38)
1 Hezekiah kumpipa in thumaan takin Topa na seam a, hi bang thupiang teng zawkciang Assyria kumpilianpa Sennacherib in Judah ngam sim hi. Ama in kulh taw a ki uum khuapite uumci in a ngalkaphonpite tungah luphungte sulet in a kaantan natu thupia hi.
2 Sennacherib in Jerusalem khuapi zongh sim a sawm hunlam Hezekiah in a phaw ciang,
3-4 Assyria te Jerusalem khua hong nai ciang tui a nga ngawl natu in ama le a uliante in khuapi pua sang pan tuinaakte khakcip tu in khensat uh hi. Uliante lampui in khua mite tam mama kuan tek a, tui a suak nawn ngawl natu in tuinaak theampo khakcip uh hi.
5 Kumpipa in khuapi uumna luphungte puuapha in, a tungah ngal vilna tausaangte sa in khuapi uumna pua sangah luphung cian thuana taw ngal nannate khosak hi. Tuaban ah, ama in Jerusalem khua lui mun khen khat ii nisuana sang lei kidipna tungah ngalnanna a sakte zongh puua kik hi. Ama in lum le tei tam mama zongh vawtsak hi.
6 Ama in khuapi sung pasal om theampo ngalkap bute khutnuai ah koi in khuapi kongpi leitual ah a kikhoptua natu thupia hi. Ama in amate tungah,
7 “Citakin kimuang vun, Assyria kumpilianpa ahibuale a lampui ngalkaphonpi sia kiita heak vun. Ama sangah a nei thahatna sangin ei sangah a om thahatna nasia zaw hi.
8 Ama in mihing thahatna nei ahihang eite in hong hu tu le ih ngalte hong simsak tu in Topa ih Pathian kinei hi,” ci hi. A kumpipa ii hi kammalte in mite hanthawn hi.
9 Tawmvei zawkciang Sennacherib le a ngalkaphonpite Lachish ah a om hun laitakin, Sennacherib in Jerusalem khua ah a om Hezekiah kumpipa le ama taw a omkhawm Judah mite tungah hi thu teng puak hi:
10 “Keima Assyria kumpilianpa Sennacherib in kong dok nopna pan, a ki uumci Jerusalem khua sungah na om ngam lai natu sia bang in kimuanna hong pia ziam?
11 Ko khut sung panin Topa na Pathian in no hong hun tu hi ci in Hezekiah in hong son hi, ahihang Hezekiah in note hong theam a, ngilkial dangtaak in hong thisak tu hi.
12 Topa biakna munte le biaknataute a sutham sia ama hi a, Judah le Jerusalem mite tungah biaknatau khat bek ah biakna vawt in ngimnamtui a halsak sia zongh ama ma hi.
13 Ngamdangmite tungah ka taanghpupite le keima ngamtatna he ngawl nu ziam? Ngamdang khat pawpo ii pathiante in a mite Assyria kumpilianpa khut sung panin a hun ngei ziam?
14 Bang hunin tua ngam teng ii pathiante khat pawpo in a ngam sia ko khut sung pan hun ngei na ziam? Tua ahile na pathian in nang hong hun thei hi ci sia, bang in hong ngaisunsak ziam?
15 Tu in Hezekiah in tuabangin theamsak heak vun a, tuabangin lamkhial puisak heak vun. Ama um heak vun! Ngam khat pawpo ii pathian in a mite sia Assyria kumpilianpa khat pawpo khut sung pan hun zo ngeingawl hi. Tua ahiciang hi note pathian in note hong hun takpi zo ngawl tu hi!” ci hi.
16 Assyria uliante in Topa Pathian le Topa naseampa Hezekiah te siat son zaw lai uh hi.
17 Kumpilianpa in Israel te ii Pathian Topa a dona lai thaak a tuasung ah, “Tua ngamte ii pathiante in keima khut sung panin a mite hun ngawl hi, Hezekiah ii pathian in ka khut sung pan a mite hun ngawl tu hi,” ci hi.
18 Tua uliante in tua khuapi a ol zaw in a laak thei natu in luphung tungah a om Jerusalem mite a lau natu le a thinkiam natu in Hebrew kam taw, a tung a teng ci in au hi.
19 Amate in mihing khut taw a kivawt tawm milimte, midangte ii pathiante a sonna taw ma kibangin Jerusalem Pathian zongh sonsak lel uh hi.
20 Tuasia ciang Hezekiah kumpipa le Amoz ii tapa, kamsaang Isaiah te in Pathian tungah thungen a, au in huna ngen uh hi.
21 Topa in vantunglalang khat paisakin Assyria ngalkap te le a ngalkapbute thatsak hi. Tua ahikom a kumpilianpa sia maimawlin Assyria ngam ah heak kik hi. Ni khat ni in ama sia a pathian biakinn sungah a om laitakin a tapate pawlkhat in a namsau uh taw ama thatlum hi.
22 Tuabangin Topa in Hezekiah kumpipa le Jerusalem mi teng Assyria kumpilianpa Sennacherib le a ngal dangte khut sung pan zongh suatak hi. Ama in a mite sia a kiim le a paam ngam theampo taw kilemin teangsak hi.
23 Mihing tam mama in Topa tungah a piak tu biakpiakna te le Hezekiah tungah a piak tu letsongte kengin Jerusalem ah hong pai uh hi, tuabangin tua hun pan kipan minam theampo mai ah Hezekiah sia kizakta in kithasia mama hi.
Hezekiah ii Ciinatna le Kiphatsakna
(2 Kumpite 20:1-3,12-19; Is 38:1-3; 39:1-8)
24 Tua hun khawngin Kumpipa Hezekiah a ciina in thi dek tak hi. Ama in thungen a, Topa in a dam natu lim khat lak hi.
25 Ahihang Hezekiah kiphasak leih in Topa ii ama atu a vawtsak nate hangin lungdamko ngawl hi, tuaciang Judah le Jerusalem mite in ngim nga law uh hi.
26 Ahizong a khakbel ciang Hezekiah le Jerusalem mite kiniamkhiak kik ahikom Topa in Hezekiah ii thi dong tua mite daan pia ngawl hi.
Hezekiah ii Nei le Lam le a Vaang neina
27 Hezekiah kumpipa hau mama a, kuama po in vaang pia hi. Ama in a neisa ngunn, khamh, suangmanpha te, hel namtuite, lumte le vanh manpha dangte khol natu in vanh kholna inndoite sa hi.
28 Tuaban ah ante, sapittui le olive thau kholna tu inndoite; a khuite atu in khuibukte; tuaciang a tuute atu tuu khawk te sasak hi.
29 Tuaban ah Pathian in tuu le khui te pia in a dang nei le lamh tam mama pia ahikom ama in khuapi tam ma saat hi.
30 Gihon Ciktui ii pusuana vang khaktan in Jerusalem luphung sungsang mun khat dongin leinuai ah tui kheetna luam a vawt sia Hezekiah kumpipa ahi hi. A sep a vawt theampo Hezekiah in taangtun a,
31 a ngam sungah a lamdang a piang thu kan tu in Babylon tongciinte a pai laitak ngawngawnin a ngamtatna a heak ku nopna in Pathian in Hezekiah sia ama uuk thu in ngamtasak hi.
Hezekiah ii Kumpi Maanna a Bona
(2 Kumpite 20:20-21)
32 Hezekiah kumpipa ii a nasep dang teng le Topa tungah a kipiaknate theampo sia Amoz Tapa Kamsaang Isaiah ii Mukholna sung le Judah le Israel Kumpipate ii Taanghthu sungah kiciamtee hi.
33 Hezekiah thi a, kumpite thaan tungnung ah kiphum hi. A thi ciang, Judah le Jerusalem mite theampo in zatakna lianpi pia uh hi. A tapa Manasseh in a kumpiza laih hi.