31
Hezekiah in Biakna Ngeinate Puua kik
1 Tua poai a man zawkciang Israel mite theampo Judah khuapi teng ah pai a, suangkhuamte sutan in Asherah numeipathian ii limte phuktan in biaknatau te le doai sepna munte sutham hi. Amate in a taanglai Judah ngam theampo, tuaciang Ephraim, Benjamin le Manasseh ngamte ah tuabang ma in vawt hi; tua zawkciang amate inn zuan kik siat uh hi.
2 Hezekiah kumpipa in thiampite le Levi te ii nasep kipawlna puuapha kik a, tuabangin mi simin vaipuak nei tek hi. Tuate in meihal biakpiaknate, kipawlkhop biakpiaknate, biakinn biakpiakna sungah kihelna, Biakinnpi sung mun tuatuam ah Pathian min pokna le Pathian tungah lungdamkonate ahi hi.
3 Zing le nitak veu in a kiseam meihal biakpiaknate le Sabbath ni le Tha Thak Poai atu ahizong, Topa Thukham om bangin vawt a kul Poai dangte atu ahizong Hezekiah in ama ii khuihon le a tuu honte sung pan nganno te pia hi. Ref 31:3 Mi 28:1—29:39
4 Tua banah Topa Pathian Thukham om bangin thiampite le Levi te in a hun nei zaza a piak thei natu in amate nga tu a hi piakkhiatnate a piak tek natu in kumpipa in Jerusalem khua mite thupia hi. Ref 31:4-5 Mi 18:12-13,21
5 Tuabangin thu a piak zawk po ciang Israel mite in a antang, sapittui, olive thau, khuaitui te le a dang lo an sung pan a phabel teng letsong in pia hi, tuaciang a neisa theampo sung pan sawm a khat zongh paipui hi.
6 Judah khuapite ah a teang mite theampo in a khui le a tuute sawm a khat puakin, amate ii Pathian, Topa tungah a aapsa letsongte tam mama zongh puak si uh hi.
7 A tha thumna tha sungin letsongte hong puak a, tha li sung a kipee in hong thengin kiciangto hi.
8 Hezekiah kumpipa le a uliante in tuabangza a tam letsong a kipiak a mu uh ciang, amate in Topa le Israel a mite pok hi.
9 Hi letsongte thu kumpipa in thiampite le Levi te tungah a son ciang,
10 Zadok ii suan Thiampi Lianbel Azariah in Ama tungah, “Mihonpite in a letsongte Biakinnpi ah hong paipui pan kipan, neak tu kicingin tam mama zongh vaal lai hi. Tu bangza theampo ih nei na sia Topa in a mite thupha hong piak hang hi,” ci hi.
11 Kumpipa thupiak bangin amate in Biakinnpi suum sungah vanh kholna inndoite vawt a,
12 tua inndoite sungah letsongte le sawm a khat te theampo kikeamcing hi. Amate in tua sia Levi te Conaniah in uksak a, a suapuipa Shimei in husak hi.
13 Amate khutnuai ah na seam tu in Levi te sawm kisee a: Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahath le Benaiah te ahi hi. Hite theampo sia Hezekiah kumpipa le Thiampi Lianbel Azariah thu taw a kiseam ahi hi.
14 Biakinnpi Nisuana sang Kongpi a cingpipa Levi mi Imnah ii tapa Kore sia Topa tungah a kipia letsongte a sang tu le tuate a hawmna ah a ukpa ahi hi.
15 Thiampite teenna khuapi dangte ah hi Levi dangte in thumaan takin ama nasep a hu te sia: Eden, Miniamin, Jeshua, Shemaiah, Amariah le Shecaniah te ahi hi. Ante sia amate sepna bang zui in Levi mipui te tungah kim hawm a,
16 bee le phung zui in hawm ngawl hi. Amate Biakinnpi ah ni sim vaipuak nei pasal kum 30 ahibuale a tungsia theampo a nasep na mun zui in hawmsak uh hi.
17 Thiampite sia bee le phung zui in nasep kiseesak a, Levi te pasal kum kul le a tungsiate sia a pawl nasepna zui in kisee hi.
18 Amate ii a thiangtho nasep thupite bang hun pawpo in sep na tu kingin kul ahikom amate, a zi a tate le a bealh dangte taw a min theampo kiciamtee hi.
19 Thiampi bangkua sungah a om pa a minpiang le Levi bee le phung min tepteena sungah min om theampote, an a hawmsak tu in vaipuak nei pasal teng sia Aaron suan le paalte atu a kisee khuapite ahibuale hi khuapite ii neisa nganthana munte sungah a teang thiampite sung pan veu a hi hi.
20 Judah ngamsung theampo ah Hezekiah kumpipa in a maan sia le Topa a Pathian ii diksak teng seam hi.
21 Ama ii Biakinnpi a tu a sep theampo ahibuale Thukham zuina thu ah thutakin a thin takpi taw a Pathian a biak hu in a maa tun hi.