25
Judah Kumpipa Amaziah
(2 Kumpite 14:2-6)
1 Amaziah sia kum 25 a phakin kumpi suak a, Jerusalem pan kum 29 sung uk hi. A nu sia Jerusalem khua mi Jehoaddin hi.
2 Ama in Topa diksak bang seam ahihang a sepna ah thalawp ngawl hi.
3 Ama thuneina a kip po ciang, a pa a that ulian teng that hi.
4 Ahihang ama in Moses Thukham sungah Topa thupiak bang zui in tua ulian te ii tate that ngawl hi, Moses Thukham sungah: “A tate ii khialna liante hangin a nu le a pa kithat ngawl tu a, a nu le a pa khialna liante hangin a tate kithat ngawl tu hi; mihing khat sia ama mama ii vawt khialna lian hang bekin kithisak tu hi,” ci in om hi. Ref 25:4 Thkna 24:16
Edom Ngam A simna
(2 Kumpite 14:7)
5 Amaziah kumpipa in Judah le Benjamin namte sung pan pasal theampo ngalkap tumsak a, a bee a phung zui in khen hi, tuaciang tulkhat uk le zakhat uk tu in ngalkapbute koi hi. Hi sungah kum kul le a tungsia theampo kihel a, a vekpi in 300,000 pha hi. Amate sia ngalkap a khop tuamte hi a, ngalsim thei paih tu lum le tei toai thiam sa te vive hi.
6 Tua bek dom ngawlin ama in ngunn kilogramme 3,400 bang thaman pia in, Israel ngalkap 100,000 cial hi.
7 Ahihang kamsaang khat kumpipa kungah pai in, “Hi Israel ngalkapte la heak in. Hi saksang kumpi ngam pan mite Topa in ompui ngawl hi.
8 Amate in ngal kisimna ah nang hong thahatsak zaw tu hi, ci in um tha tu ni hi, ahihang zawna le lelna a pia vaang a nei sia Pathian hi a, ama in na ngalte hong lelsak tu hi,” ci hi.
9 Amaziah kumpipa in kamsaangpa tungah, “Tua ahile ka piaksa ngunnte theampo a thawthong suak tu ziam?” ci in dongh hi.
Kamsaangpa in, “Tuasia sangin a tamzaw Topa in nang hong pia kik thei hi!” ci in zo kik hi.
10 Tua ahiciang Amaziah in a cial ngalkapte ciasak kik hi. Tuabangin amate cia a, Judah mite tungah thin uuk mama uh hi.
11 Amaziah ama le ama kihansua in Ci Kuam ah a ngalkaphonpi paipui hi. Tua munah amate in Edom ngalkapte simin 10,000 thatin
12 a dang 10,000 man uh hi. Amate in thongtaakte Sela khuapi liangbo sia tungah paipui a, a nuai suang tungah a kiseplum tu in lawnsuk hi. Ref 25:12 Thkna 24:16
13 Tua hun laitakin Amaziah ii a ngalsim khoppui tu in a oai ngawl Israel ngalkapte in Samaria le Beth Horon kilaklaw a om Judah khuapite sim a, pasal 3,000 thatin, vanh tam mama laaksak uh hi.
14 Amaziah sia Edom ngalkapte zo in a cia kik ciang, amate ii biak milimte ciapui a, omna pia a, tuaciang ngimnamtui halin bia hi.
15 Hisia in Topa thin uuksak ahiciang, Amaziah kungah kamsaang khat paisak hi. Kamsaangpa in, “Nangma khut sung pan ngawngawn in a mipuite a hun zo ngawl ngamdang pathiante banghangin bia ni ziam?” ci in dongh hi.
16 A kampau suan a, Amaziah in, “Bang hun pan kipanin kumpipa ngaisutna pia tu in hong koi khu ziam? Pau nawn heak in, tua ahibuale hong thatsak tu khi hi!” ci hi.
Kamsaangpa in, “Hi bang teng ngamta zo a, ngaisutna kong piak sia awlmawk ngawl na hi hu in Pathian in nangma hong susia tu in khensat zo ahi sia tu in ka he hi,” a ci zawkciang a pau tawp pheang hi.
Israel te A simna
(2 Kumpite 14:8-20)
17 Judah kumpipa Amaziah le ama thu dokte in Israel ngam sim sawm uh hi. Tuaciang ama in Jehoahaz ii tapa, Jehu ii tupa Israel kumpipa Jehoash tungah thu puakin a do natu in thato hi.
18 Jehoash in Amaziah tungah hi bangin zo kik hi: “Khatvei lai in Lebanon Mualte tung pan lingkung khat in cedar thing kung tungah thu khat puak hi: ‘Ka tapa zi tu in na tanu hong pia ta'n,’ ci hi. Ngamsa khat pai in tua lingkung siikcil hi
19 Tu in Amaziah awng Edom te na zaw hu in kiphasak ni hi, ahihang na inn ah om hithiat lete hong oai zaw khi hi. Banghangin nangma le na mite tuasiat natu bekin ngim zong vealvul ni ziam?”
20 Ahihang Amaziah in tua thu nadon ngawl hi. Hi bang a Amaziah ii a ngallel tu sia Pathian ii deina hi a, ama ii Edom milimte a biak hang ahi hi.
21 Tuabangin Israel kumpipa Jehoash in Judah kumpipa Amaziah sim tu in kuan hi. Amate Judah ngam Beth Shemesh ah kisii a,
22 Judah ngalkaphonpite ngallel in, a inn tek ah tai siat uh hi.
23 Jehoash in Amaziah manin Jerusalem ah paipui hi. Tua munah ama in khuapi uumna luphung sia Ephraim Kongpi panin Khuakiing Kongpi ciang metre 200 dektak a sau sia sutham uh hi.
24 Ama in Biakinnpi sung pan a laaksak ngunn le khamh te theampo, Obed Edom ii suan le paalte ii a cin biakinn vanhzakte le kumpi inn sungah a om sum le vanh manpha theampo Samaria ah paipui kik hi. A ngalmatte zongh tonpui hi.
25 Judah kumpipa Amaziah sia Israel kumpipa Jehoash sangin kum sawm le kum nga a khansauzaw hi.
26 Amaziah ii kumpi maanna a kipat pan a bo dong a vawt dangte theampo Judah le Israel Kumpite Taanghthu sungah kiciamtee hi.
27 Amaziah ii Topa a leedo hun pan kipan Jerusalem khua ah ama kithasawm hi. A khakbel ciang ama sia Lachish khuapi ah tai ahihang, a ngalte in zui in tua munah that hi.
28 A luang sia Jerusalem ah siphu taw kipua in, David Khuapi sung kumpite thaan ah kiphum hi.