24
Judah Kumpipa Joash
(2 Kumpite 12:1-16)
1 Joash sia kum sali a phak kumin Judah kumpi suak a, Jerusalem pan kum 40 sung uk hi. A nu sia Beersheba khua mi Zibiah ahi hi.
2 Ama in thiampi Jehoiada nuntak laitengin a sep a vawtna ah Topa lungdamsak hi.
3 Jehoiada in Joash kumpipa atu in zi nii tealsak a, a zite taw tanute tapate toai hi.
4 Tawmvei kumpi a sep zawkciang Joash in Biakinnpi puuaphat tu in khensat hi.
5 Ama in thiampite le Levi te Judah ngamsung khuapi theampo ah paisak in kum sim Biakinnpi puua natu a kisam za sum khon tu in sawl hi. Ama in manlang a vawt paih natu in sawl ahihang Levi te haisaang ahiciang,
6 ama in amate lampui Jehoiada samin, “ Topa ompuina Puanbuk atu in mipite in panpuina phiangshia pia tahen ci a Topa naseampa Moses ii tangkal bangin, banghangin Levi te in Judah mite le Jerusalem mite tung pan shia khonsak ngawl ni ziam?” ci in thu dongh hi. Ref 24:6 Pu 30:11-16
7 Nupi thimthel Athaliah ii nungzuite in Biakinnpi susia in biakinn vanh thiangtho tam mamate Baal biakna in zangh zo hi.
8 Kumpipa in Levi te tungah sum khiakte khol natu thingkuang khat vawtin biakinn kongpi ah a koi natu in thupia hi.
9 Amate in Pathian naseampa Moses ii a masabel in duisung ngampa ah a khon phiangshia sia kuama po in Topa tungah a piak natu in Jerusalem le Judah ngamsung theampo ah zasak kawkoai uh hi.
10 Hi thu in mipite le a lampuite lungdamsak a, amate in a shia sumte hong paipui tekin thingkuang dim hi.
11 Ni simin Levi te in tua vaipuak nei kumpi ulian khat tungah tua thingkuang puak uh hi. Thingkuang a dim simin kumpi thuzeakpa le Thiampi Lianpa ii taangmipa in a sumte la in a thingkuang sia a omna ngei ah koi kik uh hi. Tuabangin amate in sum tam ma khon uh hi.
12 Kumpipa le Jehoiada in tua sumte sia Biakinnpi puuana a saite tungah pia uh hi, amate in a puua tu in suang ciangte, lettamate le thik vawt te cial uh hi.
13 Naseamte theampo in nasep hanciam tekin Biakinnpi sia a sakciil bang linlian in a kho mama in puuapha kik uh hi.
14 A puuanate a man zawkciang khamh le ngunn a taanglaite sia kumpipa le Jehoiada pia a, amate in Biakinnpi atu a kisamh kuangnote le nazak dangte vawtna in zangh uh hi.
Jehoiada ii Thupaizia Kilumlet
Jehoiada nuntak lai tengin Biakinnpi ah sangaw biakpiakna te a hun maan in kipia hi.
15 Huai mama in kum 130 a phak zawkciang ama thi hi.
16 Israel mipi atu, Pathian atu le Biakinnpi atu a nasep kiheaksak na in amate in David Khuapi, kumpi thaan ah phum uh hi.
17 Ahihang Jehoiada thi zawk po ciang Judah lampuite in Joash kumpipa sia amate thu ngai tu in zol zaw hi.
18 Tua ahikom, mipite in a taanghpupite ii Pathian, Topa Biakinnpi sungah biakna vawt nawn ngawlin milimte le Asherah numeipathian limte bia tu kipan uh hi. Hi mawna khialna a vawt nate taw Judah le Jerusalem tungah Topa thin uuksak hi.
19 Topa in ama a zot kik natu a phawksak tu in amate kungah kamsaangte a puak hang mite in nangai ngawl uh hi.
20 Tuasia ciang Pathian thaa in thiampi Jehoiada ii tapa Zechariah tungah theng hi. Ama mipite mu theina ah dingin, “ Topa Pathian in banghangin a thupiakte zui ngawlin noma le noma tungah tuasiatna tungsak nu ziam! Note in ama nusia nu hi, tua hu in ama in note hong nusia hi!” ci in aukeak hi. Ref 24:20-21 Mt 23:35; Lk 11:51
21 Joash kumpipa in Zechariah a kithasawmna ah pawmin, kumpipa thupiakna taw mipite in biakinn tual ah Zechariah suang taw deanglum uh hi.
22 Kumpipa in Zechariah ii pa Jehoiada ii ama tungah a thumaan nasepnate mangil a, Zechariah thatsak hi. Zechariah in a thi dektak ciang, “Na vawt uh sia Topa in hong mu in note daan hong pia tahen!” ci in au san hi.
Joash ii Kumpi Maanna a Bona
23 Tua kum tangngam phalbi kipat hun ciang Syria ngalkaphonpi in Judah le Jerusalem simin a lampui theampo that a, vanh tam mama laksak in Damascus ah ciapui hi.
24 Syria ngalkapte tawm ahihang, Judah mite in a taanghpupite ii Pathian, Topa a taisat hu in Topa in a tamzaw pek Judah ngalkaphonpite zosak hi. Hi bangin Joash kumpipa daan kithuaksak hi.
25 Ama nasia takin liam a, ngalte a nungkin zawkciang thiampi Jehoiada ii tapa a thalup hu in a ulian te nii in thasawm a, a phulamna in a lupna tungah thatlum hi. Ama David Khuapi sungah kiphum ahihang kumpi thaan ah kiphum ngawl hi.
26 Joash a suamte sia Ammon numei Shimeath ii tapa Zabad le Moab numei Shimrith ii tapa Jehozabad ahi hi.
27 Kumpite ii Thubu Sontelna sungah Joash tapate taanghthu, ama atu a pha ngawl kamsaanna te le Biakinnpi a sak kikna thu tepteenate kihel hi. A tapa Amaziah in a kumpiza laih hi.