Psalm Late 81
Poai khaamna La
1 Ei hong hungpa Pathian tungah lungdam in au vun;
Jacob ii Pathian tungah pokna lasa vun!
2 Music tum kipan vun a, daalkual khuangnote tum vun;
tengtonghte le liamlote taw aw hoite ngingsak vun.
3 Thadet ciang le thalik ciangin
poaikhaam natu in
lemle tum vun. Ref 81:3 Mi 10:10
4 Hisia in Israel ngamsung thukham hi a,
Jacob' Pathian ii thupiak ahi hi.
5 Ama in Egypt ngam a sim ciangin
Israel mite tungah tua thukham a piak ahi hi.
Heak ngeingawl aw khat in hi bangin a ci ka za hi,
6 “Note nungzaang panin na vanhngit uh kong laakkeaksak hi;
na puak uh uksuangte kong khiaksuksak hi.
7 Ngim na nga laitakin nong sam uh a, kong hun hi.
Ka bukna vuipi sung panin kong zo a,
Meribah cikte ah note kong ze et hi. Ref 81:7 Pu 17:7; Mi 20:13
8 Ka mite awng, kidop natu kong sonte ngai vun;
Israel awng, ka thu nong ngai tu uh ka thangai mama hi!
9 Note in pathian dang peuma na bia ngei buatu uh hi. Ref 81:9 Pu 20:2-3; Thkna 5:6-7
10 Keima in Egypt ngam pan note hong pusua pui
Topa na Pathian ka hi hi.
Na kam uh kaa vun, an kong vaak tu hi.
11 “Ahihang ka mite in ka thu hong ngai nuam ngawl a,
Israel te in ka thu hong ni ngawl tu hi.
12 Tua ahikom amate sia a thinpuina uh taw kizui in
a uuk bang po ka paisak a,
a vawt nop po ka vawtsak hi.
13 Ka mite in ka pau
hong ngai hen a,
ka thu hong ni le
ka oai mama hi!
14 A ngalte manlang takin ka zawsak tu a,
a ngal a sa theampo ka zawthalsak tu hi.
15 Kei hong ensante in kiitakna taw
ka mai ah hong kun tu uh hi;
amate ii thuak daan sia
a tawntungin kikhomsuan tu uh hi.
16 Ahihang note sia a limbel zungtaang taw kong vaak tu a,
ngam khuaitui taw kong lungkimsak tu hi.”