Psalm Late 69
Hu nget Biapuina
1 Hong hun ta'n, Pathian awng!
Tui in ka ngawng ciang hong khum hi;
2 Buan thuk sungah ka tum suk a,
lei ngum mun om ngawl hi;
tui thukna sung ka theng a,
tuihualte hangin tui ka ta dektak hi.
3 Hu ngenin ka biapupuina taw ka tha bo a,
ka longtawl taak hi.
Nong hu tu kong zawzonna ka mit taak zo hi.
4 Bangma thu om ngawl a,
kei hong ensante sia ka lu a samzamte sangin tamzaw hi.
Ka ngalte in kei langpanna leilot thu son hi;
amate hat a, kei hong thatlum nuam hi.
Ka nguk ngawl bul nate amate in hong pia kiksak hi. Ref 69:4 Ps 35:19; Jn 15:25
5 Pathian awng, ka mawnate
nang kung panin
kiseal ngawl hi;
bangzata mawmaw ka hi sia nong he hi.
6 Nangma hong muangte
maizum a pia hong hisak heak in, Vaanglianpipa Topa Vaanglianbelpa awng!
Nangma hong biate tungah
a mindaisak hong hisak heak in, Israel te ii Pathian awng.
7 Kei hong kiselnona sia nangma hang hi a,
maizumna taw ka kikhucip hi.
8 Kei sia ka suapuite atu in khualmi bang ka hi a,
ka innkuanpuite atu in ngamdangmi bang ka hi hi.
9 Na Biakinnpi atu ka thangaina in
ka sungah mei bangin kuang liang hi.
nang hong kiselnona kammalte kei tung hong tu hi. Ref 69:9 Jn 2:17; Rom 15:3
10 An tanna taw keima le keima
kiniamkhiak in ka om ciang,
mihingte in hong phunsan hi;
11 heena lakna puante ka silh hi, tuaciangin amate in hong nuisan hi.
12 Amate in lampite ah
kei thu son a,
zukhamte in kei huvau
13 Ahihang, Topa awng,
kei ka hile nang tungah thu kong ngen tu hi;
na teal hun khat ciangin
kong ngetna hong zo ta'n, Pathian awng.
Nong itna lianpi hu in hong zo ta'n,
banghang ziam cile kong hun tu ci na kamciam sia na kipsak hi.
14 Buannawng sungah ka tumsuk natu panin hong hun ta'n;
ka ngalte kung panin hong keamcing ta'n,
tuithuk sung panin hong hun ta'n.
15 Tuiliim namthuam in hong khumsak heak in;
tui thukna ah hong tasak heak in a,
thaankuul sungah hong taaksuksak heak in.
16 Topa awng, nong itna kip ii phatna sungah,
kong ngetna hong zo ta'n;
nong ciliapna lian taw kei sang hong nga ta'n!
17 Na naseampa kung pan nangma le nangma kiseal heak in;
kei sia ngimna lianpi thuak khi hi —
tu mama in hong zo ta'n!
18 Kei kungah hong pai ta'n a, hong hun ta'n;
ka ngalte khut sung panin hong suatak ta'n.
19 Kei hong kiselnona, hong min daisaknate le,
hong ngen ngasaknate
na he hi;
ka ngalte theampo na mu hi.
20 Hong kiselnona in ka thin hong tamhsak a,
thinkiam in ka om hi.
Hesuakna ka lamet hang koima ah a om bua hi;
heenepna muangmaw ka hihang ka mu zo bua hi.
21 Ka ngilkial ciangin amate in nguu hong pia hi;
ka dangko ciangin amate in zuhau hong pia hi. Ref 69:21 Mt 27:48; Mk 15:36; Lk 23:26; Jn 19:28-29
22 Amate ii poai khaamnate in amate lalna hi tahen;
amate ii a thiangtho kibuailamna sia amate kiamsuk natu hi tahen. Ref 69:22-23 Rom 11:9-10
23 Amate a mit tawsakin! Amate a tawntungin a cingngu zawsak in!
24 Na thin uukna amate tungah tungsak in;
na thangsiatna sia amate tungah tu tahen.
25 Amate ii ngiaphualte kinusia tahen;
amate ii buk sungah kuama kihingkhoai heak hen. Ref 69:25 Sawl 1:20
26 Nangma ii daan na piak sate amate in vawtsia hi;
nangma ii na liamsakte ii thuaknate amate in thuson in nei uh hi.
27 Amate mawna theampo tepteena khat nei in;
nang ii ngupna sungah amate kihelsak heak in.
28 Nuntakna laibu sung pan amate min sia kimel tahen;
na mite a kitepteena lai sungah
amate kihel heak hen. Ref 69:28 Pu 32:32; Tpl 3:5; 13:8; 17:8
29 Ahihang kei sia na sa in thinkiam in ka om hi;
Pathian awng, hong laamto ta'n a, hong hun ta'n!
30 La khat taw Pathian ka pok tu hi;
ama ii letna sia ama tungah
lungdamkona taw ka thangsak tu hi.
31 Hisia in khuite taw ama biakpiakna sangin
khuital khanthin sa khat taw
sangaw biakpiakna a piak sangin
Topa lungdamsak zaw tu hi.
32 A kizothawte in hisia a mu uh ciangin a lungdam tu uh hi;
Pathian a biate kihansua tu hi.
33 Topa in a kitaangsamhte ngetna ngai a,
thongtaak a mihingte a mangil bua hi.
34 Vantung le leitung awng,
tuipi le a sung a om a nungta theampo awng, Pathian pok vun.
35 Ama in Jerusalem hun tu a,
Judah khuapite sa kik tu hi.
Ama mite tua munah teang tu a,
tua leitang lua tu uh hi;
36 a naseamte ii suan le paalte in tua ngam lua tu a,
ama a itte tua munah teang tu uh hi.