Psalm Late 68
Zawna Minam La
1 Pathian hong dingto a, a ngalte kithethaangsak hi.
Ama a ensante in lelna taw taikeak uh hi.
2 Meikhu a kiseamkeak bangin amate hawlkeak hi;
khuainunte meikuang mai ah a tuithap bangin,
mihing seksolte Pathian mai ah a mangthang uh hi.
3 Ahihang thutangte in ama omna ah
lungdam in lawp uh hi;
amate lungdam in, lawpna taw au uh hi.
4 Pathian tungah lasa vun,
ama min pokna lasa vun;
meei tungah a to pa atu in lampi sial khol vun.
Ama min sia Topa hi a,
ama ii mai ah lungdam vun!
5 Ama Biakinnpi thiangtho sungah a teang Pathian in
tangate khoi a meingongte sungsia hi.
6 Ama in pawl nei ngawl,
a ngamkhingte ii teen natu inn khat pia a,
thongtaakte lungdam suatakna sungah lampui hi;
ahihang a leedote ngam tawnghtolna munah teang tu uh hi.
7 Pathian awng, na mihingte lam na pui hun,
sennealngam kaantan in mai na nawk pui ciangin,
8 Sinai Pathian ahi Israel te ii Pathian hong paina hangin, note 68:8\xk Sinai Pathian: Israel mite ii Egypt pan Canaan ah a pai laitakin Pathian ama le ama, amate tung Sinai mual ah kilaak hi. see Ex 19:16–25.\x*
lei kiliing a, van in nguatui buaksuk hi. Ref 68:8 Pu 19:18
9 Nangma in ngua na zusak piikpeak a,
a tul sa na leitang na puuapha kik hi;
10 na mite in tua munah a inn sa uh hi;
na phatna taw mizawngte kisap teng na sik hi.
11 Topa in thupia a,
numeite tam mama in tua thu son uh hi:
12 “Kumpipate le a ngalkap honte taikeak hi!” ci uh hi.
Inn ngak nupite in ngalte neisa a kiman teng hawm uh hi:
13 a thakhui khamh cipha taw a tee vakil,
ngunn taw a kituam vakhu limte zongh kihel hi.
(Banghangin ngal kido ni in
note pawlkhat tuu khawk sungah om nu ziam?)
14 Vaanglianbelpa Pathian in
kumpipate Zalmon Mual tungah a thethaang ciang
tua munah ama in vuuk taaksak hi.
15 Bashan mual sia mualdawn tam mama a nei mual khat hi a,
bangza in a nasia mual ahi ziam!
16 Banghangin a nasia na mualdawn saangte panin
Pathian ii a ten natu a teal mualtung sia zawnsakna taw en ni ziam?
Topa sia tua munah a tawntungin teang tu hi!
17 A thahat siphu ngalleang
tul tampite taw
Topa in Sinai panin
a thiangtho mun zuan hi.
18 Ama in a saangna munte ah
kaato a,
a ngalmat sa tam mama
tonpui hi;
ama in a leedo mite
tung panin letsong saang hi.
Tua munah Topa Pathian
teang tu hi. Ref 68:18 Eph 4:8
19 Ni khat zawkciang ni khat
ih vanhngit hong puaksak Topa pok vun;
ama in eite hong hunkhia Pathian ahi hi.
20 Eite Pathian sia hong hunkhia Pathian ahi hi;
ama in Topa, eite Topa hi a,
thina panin eite hong suatak hi.
21 A mawna
a kheal nuam ngawl,
a ngalte ii lutang sia
Pathian in sutham takpi tu hi.
22 Topa in, “Na ngalte Bashan panin kong paipui kik tu hi;
tuipi thukna panin amate ka lato kik tu hi,
23 tua hile amate chisan sung siikin na tan thei tu uh a,
na uite in a du zaza liak thei tu uh hi,” ci hi.
24 Pathian awng,
zawna mualsuana taw
ka kumpipa, ka Pathian ii a biakinn thiangtho sung
a zotna sia a kuama po in mu tek hi.
25 La sate masa a, music thiamte nungkhak in,
a lai ah numeite in daalkual khuangnote tumin pai uh hi.
26 “A mite kikhopna sungah Pathian pok vun;
No Jacob suan theampo awng, Topa pok tek vun!” ci uh hi.
27 A masa phitin unau sungah a nobel ahi
Benjamin suante hong pai a,
a zom in Judah suan lampuite le amate pawlte,
a nung panin Zebulun le Nephtali suante ii lampuite in zui uh hi.
28-29 Pathian awng, kumpipate ii nang letsong hong piakna
Jerusalem na Biakinnpi pan, ko atu na zak,
na vaangletnate hong lak ta'n.
30 Pumpa sungah a om ngamsa ahi, Egypt te teih in;
khuinote taw a omkhawm khuital hon ahi, minamte theampo
na mai ah kunin a ngunn nei uhte nang hong piak mateng in, teih in.
Ngal a kin mihingte thethaang in.
31 Egypt ngam panin tongciin uliante hong pai tu hi;
Ethiopia mite in Pathian tungah
a khutte laamto in thungen tu uh hi.
32 Leitung kumpi ngamte awng,
Pathian tungah lasa vun,
Topa pokna lasa vun.
33 Taanghlai a, a om van,
tua van ah a to pa pok vun.
Ama ii a vaanglian
awpui ngai vun.
34 Pathian ii vaangletna
thangsak vun;
A uk theina vaang sia
Israel te tungah om a, ama thahatna sia van ah om hi.
35 Israel te ii Pathian a thiangtho inn pan
hong pai ciangin bangza in kiitakhuai ziam!
Ama in thahatna le vaangletna a mite tungah pia hi.