Psalm Late 5
Hong Dal natu Thungetna
1 Ka kammalte hong ngai ta'n a ka huuisaknate hong za ta'n, Topa awng
2 Hu ngenin ka auna aw hong ngai ta'n,
ka Pathian le ka kumpipa awng!
Topa awng, na tungah thu kong ngen hi,
3 zingsangin ka aw nong za hi;
ni sua ciang kong ngetnate na mai ah kong lui a, nong zo tu kong ngak hi.
4 Banghang ziam cile nang sia tatsiatna a dei Pathian na hi bua hi;
nang omna munah ngitlonate na oai bua hi.
5 A kiphasakte sia na mai ah a ding thei buatu hi;
mihing seksol theampo na ensan hi.
6 Nangma in leilot thusonte na susia a,
a ngoltolte le ngual theamte na thusim bua hi.
7 Ahihang kei sia nong itna lian ahikom
na inn sungah kong tum thei hi,
na Biakinnpi thiangtho sang nga in
nangma thasiana taw kong bia tu hi.
8 Topa awng, ngal ka hau lawlawm hi!
na deina bang a vawt tu in lam hong pui ta'n;
ka zui tu in na lampi tamkimsak in.
9 Ka ngalte ii kampaute
kimuang thei ngeingawl hi,
amate in lalcipsak tu bek
uuk hi.
Amate kampau te sia
kisial pokna hi a, zaak nop huai hi,
ahihang, thina hong then thei kitheamna taw kidim hi. Ref 5:9 Rom 3:13
10 Pathian awng, amate puavawk in daan pia in:
amate ii thimtham tupna taw amate puk tahen;
a khialna tam mamate le nang hong leedo hu in na kung pan amate notkeak in.
11 Ahihang nangma hong bealte theampo lungdam tahen.
Amate in lungdamna taw lasa thei tawntung tahen.
Nang hong itte na dal in,
nang hu in amate lungdam takpi hi.
12 Nang thu hong nite thupha na pia hi, Topa awng;
nangma itna in amate lum bangin sung hi.