Psalm Late 37
Mihing Seksolte le Miphate Thet natu
1 Mihing seksolte hangin thinngim heak vun;
khialna a vawtte eang heak vun.
2 Amate in lopa ko bangin bo pal tu hi;
thingno vulte bangin thi tu hi.
3 Topa muangin ngamtat pha ngamta vun;
tua leitang tungah teangin ngammuang tavun.
4 Na lungdamna uh sia Topa sungah zong vun,
tuasia ciang ama in na lungngulna bang hong pia tu hi.
5 Nangma le nangma Topa tungah ki aap in;
ama muang in, ama in nang hong hu tu hi;
6 ama in na thutang sia sun ni bangin hong taangsak tu hi.
7 Thinsau in Topa sep tu ngak in;
a nuamsate le a sia ngealna neite ii
maa tutnate hangin thinngim heak vun.
8 Thinngimna le thin uukna in na zosak heak vun,
tuate in ngimna sung hong then bek hi.
9 Topa a muangte in ngam le lei a lua tu hi;
ahihang a seksolte kinotkeak tu hi.
10 Hai ngawlin a seksolte hong bo tu hi;
na zawzon hangin na mu nawn buatu hi.
11 A kiniamkhiakte in ngam le lei lua tu a,
nopsakna le thinnopna nga tu uh hi. Ref 37:11 Mt. 5:5
12 Mihing seksolte in mihing phate
thasawmin etsatna taw salh uh hi.
13 Ahihang Topa in mihing seksolte nuisan lel hi,
banghang ziam cile amate
hai ngawlin kilalcipsak tu hi ci in he hi.
14 A zawngte le a cimawte thatlum nuam a,
a maan na a seamte thatlum nuamin,
mihing seksolte in a namsau dokin a thal uh keak uh hi;
15 ahihang amate le amate a namsau uh taw ma kithatlum tu uh a,
tuaciang a thal uhte laltham tu hi.
16 Mihing pha khat ii tawmno khat a nei teng sia
mihing seksol theampo ii
hauna sangin man neizaw hi,
17 banghang ziam cile Topa in
a seksolte ii thahatna laaksak tu a,
ahihang mihing phate sungsia tu hi.
18 Topa in ama ii thu a nite khoi a,
a ngam le a lei sia a tawntungin amate atu hi tu hi.
19 Hunsia hong tun ciangin, amate in thuak ngawl tu uh hi;
kialpi tun hunin a khom tu uh an nei tu hi.
20 Ahihang mihing seksolte thi tu uh hi;
Topa ngalte sia ngamsung paakte bangin mangthang tu hi;
amate meikhu bangin a bo tu uh hi.
21 Mihing seksolte in leitoai in, lo kik ngeingawl a,
ahihang mihing phate in ngo takin pia hi.
22 Topa ii thupha a piakte in ngam le lei lua tu uh a,
ama ii haamsiatna a thuakte ahile, kinotkeak tu hi.
23 Topa in mihing khat sia a pai natu lak a,
ama a lungkimsakte hung hi.
24 Amate sia a puk zongin a topcip buatu uh hi,
banghang ziam cile Topa in domto tu hi.
25 Tu in ka huai zo a, hun sau ma ka nungta zo hi.
Ahihang mihing pha khat Topa in nusia ahibuale
a tate khutdaw an ngenin vaak ci thu ka mu ngei bualai hi.
26 Amate in midangte tungah ol takin pia in, pukthaak tawntung a,
tuaciang a tate sia a thupha saanna khat ahi hi.
27 Ngitlona panin kiheak vun a, a pha vawt vun,
tuasia ciang na suan na paalte in tua leitang tungah teang tawntung tu hi;
28 banghang ziam cile Topa in a maan dei a,
a thumaan a mihingte a nusia bua hi.
Amate a tawntungin sungsia a,
ahihang a seksolte ii suan le paalte sia kinotkeak tu hi.
29 Thutangte in ngam le lei lua in
a sungah teang tawntung tu hi.
30 Miphate ii kammalte sia ciimkam hi a,
thutang hi tawntung hi.
31 Amate’ Pathian ii thukham sia
a thinsung ah keam a,
tua thukham panin a pial ngei bua hi.
32 Mihing pha khat sia mihing seksol khat in encik a
thalup tu in hanciam hi;
33 Ahihang Topa in
a ngalpa khutsa sungah a nusia buatu a,
ahibuale thu a kisit ciangin
mawputsakna a thuak buatu hi.
34 Topa tungah lametna nei vun a, a thupiakte ni vun;
ngam le lei hong piakna taw ama in note hong patoai tu hi,
tuaciang mihing seksolte a nawkeak na mu tu hi.
35 Khatvei lai in mihing seksol ahi
ngual a zothaw ngawp thei khat ka he ngei hi;
ama in Lebanon mualtung ah
cedar thingkung khat bangin ngual tungtuangin om hi;
36 ahihang ka pai kik ciang a na om nawn bua hi;
ama ka zon hang ka mu zo bua hi.
37 Mihing pha pa en vun a, thutang pa entel vun;
kilemna a nei mihingte in suan le paal nei hi,
38 ahihang mimawte sia
kilal cimitsak siat a,
a suan a paalte sia
39 Topa in mihing thutangte hun a,
ngimna hun sungah amate sungsia hi.
40 Topa in amate hu a suatak hi;
ama in mihing ngilote khut sung panin hun hi,
banghang ziam cile amate a dal tu in ama zuan uh hi.