Psalm Late 36
Mihing Seksolzia
1 Mihing seksol pa thinsung tawngh ah,
mawna in thu son hi;
Pathian nialin ama thasiana a nei bua hi. Ref 36:1 Rom 3:18
2 Ama le ama nasia mama kisa ahikom
Pathian in a mawna mu ngawl tu a
puavawkna thuaksak ngawl tu hi ci in um uh hi.
3 Ama ii kampauna in seksolna le leilotnate taw kidim a,
ama in ciimna le phatna taw seam nawn ngawl hi.
4 Lupna tungah a lup laitak zong
ngitlo vai veu amate in ngeal uh hi;
a sep pawpo a pha om ngawl a,
a sia khat beak zongh nial ngeingawl hi.
Pathian ii Phatna
5 Topa awng, na itna kip in vantungte ban a,
na thumaanna in vante ah kizelto hi.
6 Na thutang sia mualpite bangin saang a,
na thutang khenna in tuipi bangin thuk hi.
Mihingte le nganhingte in nangma khoina sungah om hi.
7 Pathian awng, na itna kip sia, bangza in manpha ziam!
Na thakhui ii limh nuai ah
kote in kidalna ka nga uh hi.
8 Tam mama nong piak ante ne in nuam ka sa uh a,
na phatna sia nguntui bangin nong dawnsak thei hi.
9 Nang sia nuntakna theampo ii naak na hi a,
nangma ii khuavak hangin khuavak ka mu uh hi.
10 Nang hong hete sia it suak in a,
a thutangte tungah a pha in hong seam suak ta'n.
11 Mihing kiphasakte in hong ngalvawtsak heak in a,
mihing seksolte in hong notsak heak in.
12 Mi ngilote liikna san en vun.
Tua munah amate pukin thoto zo ngawl hi.