Psalm Late 30
Lungdamko Thungetna
1 Topa awng, Nangma in kei hong hun zo na hikom,
Nang kong pok hi,
tuaciang kei tungah ka ngalte in nong enthawsak bua hi.
2 Topa ka Pathian awng,
huna ngenin kong au ciang kei nong damsak a,
thaankuul panin nong keam hi.
3 Leinuai a thuk zaw na zuanin
ka pai laitakin nuntakna a thak nong pia kik hi.
4 A thumaan ama ii mihingte theampo awng!
Topa tungah pok na lasa vun!
A Thiangtho Pa in bang teng seam zo ziam ci in phawk vun a,
ama tungah lungdamko vun!
5 A thin uukna in tawmvei sung teng bek hi a,
a phatna in khan tawntung ahi hi.
Zanin thitui zongh taak tha tu ahitazong
zing sang ciangin lungdamna hong pai hi.
6 Ngammuang ka kisa a,
keima le keima
“Hong kinuaisia ngeingawl tu hi”
ka kici hi.
7 Topa awng, nang in kei tungah nong dik hi;
mualtung ngalnanna kulhpi bangin kei nong dal hi.
Ahihang ka mai panin nong kiseal a, tuaciang ka lau hi.
8 Topa awng, nang
kong biakpui a,
nong hu natu in kong thum hi.
9 “Ka thina tungtaang ah bang meetna nei tu ni ziam?
Thaankuul sung ka zotsuk ciang bang phattuamna om ziam?
Mithite in nang hong pok thei tu ziam?
A lalmaw na phatna amate in thangsak thei tu ziam?
10 Topa awng, hong ngai ta'n a, hong hesuak ta'n!
11 Ka khuangaina sia lungdam lapna taw nong laihsak zo hi;
ka khuangaina nong laaksak zo a
lungdamna taw nong uap zo hi.
12 Tua ahikom ka thim om buatu a,
nang pokna la kong sak tu hi.
Topa awng, nangma in ka Pathian na hi a,
a tawntungin lungdam kong ko tu hi.