Psalm Late 20
Zawna atu Thungetna
1 Ngimna na nga ciangin Topa in na biapuina hong zo tahen;
Jacob ii Pathian in nang hong dal tahen!
2 Ama in a Biakinnpi panin nang kungah huna hong puak tahen,
tuaciangin Zion Mual panin panpuina hong pia tahen!
3 Na piakkhiatnate theampo ama in hong saang tahen a,
na sangaw biakpiaknate theampo ama lungkim tahen.
4 Na dei sia ama in
hong pia tahen a
na tupna theampo ah
zawna hong ngasak tahen.
5 Tuasia ciang nang ii zawna tungtaang ah
lungdamna taw kong au tu uh hi,
Eite ii Pathian pokna taw na zawna poai ka khaam tu uh hi.
Topa in na nget theampo hong tungsak tahen.
6 Topa in ama tealsa kumpipa sia
zawna pia hi ci, tu in ka he hi;
ama in a thiangtho vantung panin ama ii ngetnate zo hi,
tuaciang ama ii vaangletna taw zawna lianpi te pia hi.
7 Pawlkhat in amate ii ngalsimna
siphu ngalleangte muang uh hi,
a dangte in a siphute muang uh hi,
ahihang eite in Topa ih Pathian ii vaangletna ih muang hi.
8 Tuabang mihingte sia lutu in liik tu uh hi,
ahihang eite tho in kip takin ih ding tu hi.
9 Topa awng, kumpipa tungah zawna na pia in a,
kong biapui uh ciangin hong zo ta'n.