Psalm Late 19
Bitphuana ah Pathian Minthanna
1 Van in Pathian minthanna thiang takin kilanghsak hi!
Ama nasepna huvau in a kician mama in lak hi!
2 Ni simin tua thu kisawson a, zan simin kison kikik hi.
3 Thusonna ahibuale kammalte kizangh ngawl a,
awnging zongh kiza ngawl hi;
4 ahitazong amate ii thupuak sia leitung bup ah kizel a
leimong dongin kiza hi.
Pathian in ni atu in van ah inn khat vawtsak hi; Ref 19:4 Rom 10:18
5 a lungdam zinei pa bangin zingsang in hong pusuak hi,
tai kidem tu a lawp kimai thiamte bang ahi hi.
6 Van mong khat pan hong kipan a,
van laizang kaantanin a langkhat dongah pai hi.
Ama ii satna sia bangma in lia thei ngawl hi.
Topa Thukham
7 Topa thukham sia cialcing a; thahatna thak a pia hi.
Topa thupiaknate sia muan thamman a, a kitaangsamhte atu in ciimna pia hi.
8 Topa ii thukhamte maan hi,
tuaciang tua thukham a nite lungdam hi.
Topa thupiakte tang a, thinsung heakna pia hi.
9 Topa thasiana sia pha a,
a tawntungin kizom paisuak tu hi.
Topa thukhennate sia tang a, tuate sia a tawntungin maan hi.
10 Tuate sia khamh pha belte sangin dei huai zaw a,
khuaitui thiangbel sangin thum zaw lai hi.
11 Tuate in na naseampa, keima heakna hong pia a;
tuate ka nit hu in
12 Kuama in ama mama ii khialnate a mu thei bua hi;
Topa awng, a kiseal khialnate panin hong hung ta'n!
13 Vawtluih mawnate panin hong keamcing si ta'n a;
tuate in kei hong uksak heak in.
Tua hile ka cialcing tu a,
mawna ii siatna khaatna pan ka suakta tu hi.
14 Ka bukna le hong tanpa
ka Topa awng,
ka ngaisutnate le ka kampaunate nong saan thei hi tahen!