30
Agur ii Kammalte
1 Hite in Jakeh tapa Agur ii
a ciliap huai kammalte ahi hi:
“Pathian in kei taw omkhawm ngawl hi,
Pathian kei taw omkhawm ngawl hi,
tuaciang keima cimaw khi hi.”
2 Keima in mihing khat taw sangin
nganhing khat taw ka kibang zaw hi.
Mihing khat ii nei tu a kilawm khua ngaisut theina ka nei bua hi.
3 Ciimna ka sin ngei bua hi,
tuaciang Pathian thu bangma heak ka nei bua hi.
4 Akua in vantung thu heaknate a cingin nei ngei ziam?
A kua in vui sia, a khut sungah man ngei ziam?
Tua ahibuale tui sia puanbek taw tun ngei ziam?
Tua ahibuale leitung ngamngite phut ngei ziam?
Na he le, ama akua ziam?
Ama ii tapa sia akua ziam?
5 Pathian in a kamciam theampo keamcing hi. Ama ii huuk tu a zong theampo atu in ama sia lum taw kibang hi.
6 Ama ii son ngeingawl khat pau hi na cile ama in hong teih tu hi, tuaciang a leilotpa na hi hunlam hong lak tu hi.
Paunak Dangte
7 Pathian awng, ka thi ma in thu nam nii kong ngen hi:
8 leilot ngawl natu in hong keamcing ta'n, tuaciang hau le hong hausak heak in a, zawng le hong zawngsak heak in. Tua ahikom an ka taangsap za bek hong pia ka po in.
9 Ka kham vaalin an ka nei le, nang hong tulmaw bong kong ci tha tu hi. Ahihang ka zawng le, ka nguta tha tu a, ka Pathian ii min daina kong suaksak tu hi.
10 Naseamte a topa tungah sonsia ngei heak vun. Tua hu in haamsiatna le ngimna na nga tu hi.
11 A pate haamsiatin a nute a thupi sim ngawl mihing om hi.
12 A nin thei za in, nin napi thiangtho a kisa mihing om hi.
13 Pha mama a kisa mihing om hi — Oh, bangza in amate le amate pha kisa ziam?
14 A zawngte le a kitaangsamhte tung pan ngitlo vai taw a nga thei zaza uh a duup mihing om hi; tuabangin amate nuntakna a zong uh mihing om hi.
15 Liit khat in tanu nii nei a, a min sia “Hong pia ta'n!” hi khawm hi. A lungkim ngeingawl, na nam li om hi:
16 Mithite khua,
tasel numei,
nguatui a kisamh leiko,
le a kisumit zo ngawl meikuangte ahi hi.
17 A pa sia ngual nuizak tu in ciammuina in a nei, ahibuale a nuhuai a zawngsak mihing khat pawpo sia vaciikte in a sa ne le pha hi, tua ahibuale zong a mittangte ngam va-akte in khel le pha hi.
18 Kei atu a tel hak mama thu li om hi:
19 van ah a leang muvanlai,
suangpi tung a vak ngul,
tuipi tungah lam khial ngawlin a pai teambaw,
le pa khat le numei khat a kidei theina ci teng ahi hi.
20 Zi thumaan ngawlte ngamtatna in hi bang ahi hi; ama in palngul mawna vawt a, tua zawkciang kibual a, “Ahihang, a maan ngawl bangma vawt nei bong!” ci lai hi.
21 Leitung ngawngawn ii dual zawk ngawl na nam li om hi:
22 kumpipa a suak sal khat,
a du theampo a nei
mi mawmaw khat,
23 pasal a nga a etsat huai numei khat,
a tonu omna a suan naseam numei khat.
24 Leitung ah nganhing no mama napi pil citak a pil li om hi:
25 Mitsate; tuate in thaneam mama ahihang a an neak tu uh khaal sungin khol hi.
26 Liang lai a, teang ngalhvang nam khat te: tuate in thahat ngawl hi, ahihang liang lai suangpite kawmah teang thei hi.
27 Khaumawte: tuate in kumpipa nei ngawl ahihang hi vadiam in vak hi.
28 Innhikte: na khut sungah khat kihum thei napi, kumpi teenna inn sungah kimu thei hi.
29 Lam a pai uh ciang a etlawm mama na nam li om hi:
30 nganhing sung teng pan a thahatbel le kiitak mama a nei ngawl tawpi;
31 kealtal, aklui pokngai le
a mite mai ah a om kumpipate.
32 Kiphatsak natu le a sia ngeal natu za dongin na mawmaw le tawlnga phot in a, khuangaisun in!
33 Noai na sasau le thawbat na nga tu hi. Midang khat ii naak na suu le, chi luang tu hi. Na thin na sosak le ngimna sungah na theng tu hi.