29
1 Nang hong kipau hong kihil simin na thin na puisak vaial le ni khat ni ciang sukcipna na thuak tu a, na lu na phong kik zo nawn buatu hi.
2 A thutang ngamukpa khat hong lak tavun, a lungdam ngam mite kong lak tu hi. A seksol ngamukpa khat hong lak tavun, a thinngim ngammite kong lak tu hi.
3 Ciimna thupi na sa le na pa in nang hangin angtang tu hi. Pumpi zuak numeite tungah, sumzakna sia a mawmawthuai maizakna hi.
4 Kumpipa in thukhaikim sia thinbot in a nei le a ngam thahat tu a, ahizong ama in sum bekma thinbot in a nei ciang a ngam lalsak tu hi.
5 Na ngualtamhte na sialpok le, nangma le nangma thaang kisia na suak hi.
6 Mi ngilote amate mawna sungah awk hi, thumaan mihingte ahile lungdam in suakta hi.
7 Mihing pha khat in mizawngte nga tuakte he a, ahihang mihing seksolte in tuabangte a tel thei bua uh hi.
8 Ngualdangte atu khualna a nei ngawl mihingte in khuapi bup buaisak thei hi. Mihing ciimte in thimsak khipkhep hi.
9 Mi pilvang khat in a mawmaw khat tungah thu a vawt ciang, mi mawmaw sia nui bekin, aw saang taw kam ngaldo pau hi.
10 Ngual thalup tu a ciza ngawl mihingte in a thumaan pawpo ngaimaw hi, ahihang thumaan mihingte in tuabang mihing khat ii nuntakna huu tu hi.
11 Mihing mawmawte in a thin uukna uh kilanghsak hi, ahihang khuangaisun theite in thinsau in a thin uukna iip hi.
12 Ngamuk khat in a maan ngawl thute a nadon le, a ulian theampo sia leilot theite ahi tu uh hi.
13 Mizawng pa le ama a zothaw pa in hisia nei khawm hi — Topa in amate ngeal sia mittangte neisak khawm hi.
14 Kumpipa khat in mizawngte nga tu a kilawm thute a panpui le ama in kum saupi ngam uk tu hi.
15 Patangte atu in hilna le tekna sia pha hi. Patangte in amate uuk bang bekin a khang le a nute maizumsak tu hi.
16 Mihing ngilote ngamukna za hong nga ciang khialna lian khang hi. Ahihang a thutangte in tuabang mihingte ii kiamsukna mu tu in a nungta tu hi.
17 Na tate tek vun, tua hile a tawntungin ama hu in na angtang tu hi. Amate in maizum natu ahang thu omsak ngeingawl tu hi.
18 Pathian ii lamlak ngawl minam khat sia thu kinitna om ngawl minam ahi hi. Pathian thukham a zui pa in mihing lungdam ahi hi.
19 Naseamte sia thusonpuina bek taw na hil na pau thei buatu hi. Amate in hong tel thei tu ahihang hong thusim tuan buatu uh hi.
20 Ngaisun ngawlin a pau khat po atu sangin, a ngoai a mawmaw khat atu lametna om zaw hi.
21 Na naseam khat sia a no panin, a dei theampo na pia le ni khat ni ciang na neisa theampo ama in hong suanthal tu hi.
22 Mihing thinngamte in kihauna le buaina tam mama piangsak hi.
23 Kisaktheina in, kiamsukna sung hong then tu a, ahizong na kiniamkhiak le hong kizakta tu hi.
24 Nguta khat ii kipawl puipa sia a ngal ci phabel ahi hi. Thukhenzum sungah thumaan a son le nguta pa daan kipia tu a, tuabang a son buale Pathian in nguta pa haamsiat tu hi.
25 Midangte ii nang hong ngaisutnate thin nopmawkin na nei tu sia lauhuai hi, ahizong Topa na muang le ngammuangin na om tu hi.
26 A kuama po in ngamuk khat ii hong deisakna kithangai tek hi, ahihang Topa tung pan bekin thutang khenna na nga thei hi.
27 Thutangte in mi seksolte ensan a, mi seksolte in thutangte ensan hi.