31
Midian te taw Biakna vai Ngal Kisimna.
1 Topa in Moses tungah,
2 “Israel mite tungah a vawtna hangin Midian te daan pia in. Tuasia na sep zawkciang thi tu ni hi,” ci hi.
3 Tua ahiciang Moses in mipite tungah, “ Topa tungah a vawtnate hangin Midian te sim a daan a pia thei tu in ngalsim tu kinging vun.
4 Israel ii nam sim pan pasal tulkhat tek ngalsim tu in kuansak vun,” ci hi.
5 Tuaciang Israel ii nam khat sim pan pasal tulkhat tek kiteal a, a vekpi in tulsawm le tulnii ngalsim tu in kithoai hi.
6 Moses in thiampi Eleazar tapa, van thiangthote le thu kikona lemle a keam pa Phinehas in uksakin amate kuansak hi.
7 Topa in Moses tungah a thupiak bangin amate in Midian te simin, pa theampo that siat hi.
8 Tuate sungah Midian kumpi ngate: Evi, Rekem, Zur, Hur, le Reba kihel hi. Amate in Beor tapa Balaam zongh thatlum hi.
9 Israel mite in Midian numeite le patangte manin, a khuite le a ngannote, a nei a lamh theampo sut a,
10 a ngiaphual le a khuapi theampo halsak uh hi.
11 Amate ii a sutol nate theampo, a ngalmatte le a nganno teng zongh,
12 Jericho pan Jordan ngunngal khat Moab zaangtam ah ngiaphual a saat Moses, Eleazar le Israel taangpi bup omna ah paipui uh hi.
Ngalkapte Heak kik
13 Moses, Eleazar le taangpi lampui dang theampo in ngalkaphonpi muak tu in ngiaphual pan pai uh hi.
14 Moses sia ngalsimna pan hong heak kik ngalkap bu teng, tulkhat a ukte le zakhat a ukte tungah thin uuk hi.
15 Moses in amate tungah, “Banghang numei theampo hing khoai nu ziam?
16 Balaam thu zui in Peor ah mipite Topa mai ah thumaan ngawl a suaksak sia, hi numeite ahi hunlam phawk vun. Tuasia in Topa ii mihonte tungah natsia a kizelsak sia ahi hi.Ref 31:16 Mi 25:1-9
17 Tua ahiciang, tu in pano teng le pa taw a khial ngeisa numei teng thatlum vun a,
18 ahizong ngaknuno teng le numei thiangtho theampo noma atu in khoaikhe vun.
19 Tu in mihing a that peuma le mithiluang a tham peuma, ni sali sung ngiaphual pua sangah om tu nu hi. A ni thum ni le ni sali ni in noma le na mat uh numeite kithiansua vun.
20 Note in puanbek theampo, savun, kealmul ahibuale thing taw kivawt nate theampo thiansua hamtang tu nu hi,” ci hi.
21 Thiampi Eleazar in ngalsimna pan hong heakkikte tungah, “Hite sia Topa ii Moses tungah a piaksa zui tu ngeinate ahi hi.
22-23 Mei ii a kak ngawl tute, khamh, ngunn, taau, thik, daan le haak ci bangte mei sung kaantansakin kithiansua tu hi. Nadang teng ahile thiansuana tui taw in kithiansua tu hi.
24 Ani sali ni in na puante sawp vun a, tuaciang note biakna taw kisai a thiang in ngiaphual sungah hong kitumsak tu hi,” ci hi.
A Matte Hawmna
25 Topa in Moses tungah,
26 “Nangma le Eleazar in taangpi lampuite taw kopin ngal sungah ngalmatte le ngannote a kipan a kiman theampo sim siat tu nu hi.
27 Tua te a kikim in khen nii sua vun a, khen khat sia ngalkapte atu le khen dang khat sia a taanglai taangpite atu hi tu hi.
28 Ngalkapte ii khen sung pan ngalmat za nga ciang khat veu Topa atu phiangshia in la vun, khui, laa, tuu le keal te zongh tuabang ma in la vun.
29 Topa tung a kituam piak tu te thiampi Eleazar tungah pia vun.
30 A taanglai mipite ii khen sung pan ngalmat sawmnga ciang khat la in a, khui, laa, tuu le keal zongh tuabang ma in la vun. Tuate Topa Puanbuk uk Levi mite pia vun,” ci hi.
31 Topa thupiak bangin Moses le Eleazar in seam uh hi.
32-35 A nuai a teng sia ngalkapte ii mat te hi a, amate atu in a kep tuam banah a kibelap teng ahi hi. Tuu le keal 675,000, khui 72,000, laa 61,000, numei thiangtho 32,000 ahi hi.
36-40 Hite sung pan a lang ngalkapte ii a tel sia; tuu le keal 337,500 hi a tuasung pan Topa tungah phiangshia in a kipia 675 hi; ngalkapte atu in khui 36,000 hi a, tuate sung pan Topa tungah phiangshia in a kipia 72 hi; Ngalkapte atu in laa 30,500 hi a, tuate sung pan Topa tungah phiangshia in a kipia 61 hi; ngalkapte atu in numei thiangtho 16,000 hi a, tuate sung pan Topa tungah phiangshia in a piak 32 ahi hi.
41 Tuaciang Topa thupiakna bangin Topa a kipia tuam phiangshia sia Moses in Eleazar tungah pia hi.
42-46 Taangpi taangtate ii tel sia ngalkapte a bangma hi a: tuu le keal 337,500, khui 36,000, laa 30,500 le ngaknu thiangtho 16,000 ahi hi.
47 Hi tel sung pan Topa thupiakna bangin ngalmatte le ngannote sawmnga ciang khat Moses in la phot a, Topa Puanbuk a uk Levi mite tungah pia hi.
48 Tuaciang ngalkaphonpi a uk bute sia Moses kungah pai in,
49 thupuak a, “Topa awng, kote khutnuai a om ngalkapte ka sim siat uh a khat zongh kisamh ngawl hi.
50 Tua hi a, kote tek ii ka laak sa uh khamh taw kivawt kizepnate, baanbulte, haakte, khutzungbute, bilbaate le khite kong paipui uh hi. Kote nuntakna hong kep bit natu in hi vanhte Topa tungah kote nuntakna kitatna in ka pia uh hi.” ci uh hi.
51 Moses le Eleazar in khamh taw kivawt tua kizepnate theampo saang uh hi.
52 Ngalkap bute ii a piak teng a kingawm ciang kilogramme 200 dektak ngit hi.
53 Ngalkapbu ahi ngawlte in amate ii mat vanh tek keam uh hi.
54 Tua ahiciang Topa in Israel mite a kepcing natu in Moses le Eleazar in khamh teng Puanbuk sungah paipui in sot uh hi.