30
Kam Kiciamnate ah Zui tu Ngeinate
1 Moses in Israel minamte ii lampuite tungah a nuai a zui tu hilnate pia hi.
2 Pasal khat in Topa tungah na khat piak tu in kam kiciamna khat a vawt ciang ahibuale na khat pawpo ten tu in kiciamna a vawt ciang ama in ciam peal ngawl tu a, a ci theampo taangtungsak hamtang tu hi.Ref 30:2 Thkna 23:21-23; Mt 5:33
3 A pa inn ah a om lai ngaknu khat in Topa tungah na khat piak tu in kamkiciamna khat a vawt ciang ahibuale bang ziam khat ten tu in kamciam a piak ciang,
4 tua sia a pa in a zaak ciang a nial buanale, tua a kamkiciamna ahibuale a kamciamna taangtungsak hamtang tu hi.
5 Ahizong a kamkiciamna sia a pa in a zaak ciang, a khaam le ama in tuasia taangtunsak kul nawn ngawl hi. A kamciam bang a sep tu a pa in oai ngawl ahikom Topa in maisak tu hi.
6 Pasal nei ngawl lai ngaknu khat in a thin takpi taw, ahibuale ngaisun phot ngawlin na khat ten tu in kamciamna a vawt zawkciang pasal a nei le
7 tua thu a pasal in a zaak ciang a khaam buale, a kamkiciamna ahibuale a kamciam theampo ama in seam nanak tu hi.
8 Ahizong a pasal in tua kamkiciamna a zaak ciang a sep tu a khaam le ama in tuasia taangtutsak kul ngawl hi. Topa in ama maisak tu hi.
9 Meingong khat ahibuale a pasal ii khul numei khat in kamkiciamna a vawt theampo le na khat ten tu in kamciamna a vawt theampo taangtungsak tu hi.
10 Pasal a nei numei khat in kamkiciamna khat vawt a, ahibuale na khat ten tu in kamciamna a vawt le,
11 a pasal in tua thu a zaak ciang a khaam buanale ama kamkiciamna ahibuale a kamciam theampo taangtungsak nanak tu hi.
12 Ahizong a pasal in tua thu a zaak ciang, a sep tu a khaam le ama in a kamkiciamna bang sep kul ngawl hi. A pasal in ama kamkiciamna bang a sep tu khaam ahikom Topa in ama maisak tu hi.
13 A pasal in a zi kamkiciamna ahibuale a kamciam khosak natu ahizong, phiat natu ahizong thu nei hi.
14 Ahizong a pasal in a zi ii kamkiciamna a zaak ni in a khaam buale a kamkiciamna bangin a zi in seam tu hi. A zaak ni in khaam ngawl ahikom a lungkimpui sa suak hi.
15 Ahizong ama in tua kamkiciamna sia a zawk pek ciang a phiatsak kik pheang le, tuasia a taangtut ngawl hu in thupiang teng ama in thuak tu hi.
16 Hi thute pasal nei numei ahibuale, pasal nei ngawlin a pa inn ah a om lai ngaknu khat ii kam kiciamnate taw kisai in, Topa ii Moses tungah a piak zui tu ngeinate ahi hi.