22
Mopoai Thusonteena
(Luke 14:15-24)
1 Jesus in mihingte munah thusonteenate zangh kikin thu son hi.
2 “Vantung ngam thu sia hi bang ahi hi. Khatvei lai in kumpipa khat in a tapa atu mopoai anneakna khat vawt tu in kipan hi.
3 Ama in a naseamte sawl a mopoai hong siim natu in, khualhilsak hi. Ahihang amate pai nuam ngawl hi.
4 Tua ahikom naseam dangte paisak a, khual a kihilte munah hi bang sawl hi. ‘Ka poai sia tu in a kipan thei tu hi zo hi; ka khuital le ka khuino thaute kingo zo hi, na theampo kinging sa in om zo hi. Mopoai ah hong pai tavun!’
5 Ahihang khual a kihilte in awlmawk ngawlin amate nasep tek ma sep san uh hi: khat in a lokuan a, a dang khat in a sumbuk ah pai in,
6 a dangte in kumpipa naseamte pummat a, velin thatlum uh hi.
7 Kumpipa thin uuk mama ahikom a ngalkapte paisak a, mihing that te thatlum in a khuapi halthapsak hi.
8 Ama in a naseamte sam a, ‘Ka mopoai kipat thei lian tu in, om zo ahihang ka khualhil sate mopoai taw kiphu ngawl hi.
9 Tu in lam ziikpite ah pai tavun a, mihing na mu zaza uh sam tavun,’ ci hi.
10 Tua ahikom naseamte in lam ziikpite ah pai in a mu theampo le mihing pha mihing sia a kibangin khawmtua uh hi; tuaciang in mopoai vawtna inn dim hi.
11 “Kumpipa sungtang in a leangnate a et ciang, mopoai puan silh ngawlpa khat mu hi.
12 ‘Lawm awng, mopoai puan silh ngawlin hi sungah bangbangin hong tum thei ni ziam?’ ci in dongh hi. Ahihang tua pa in a zo natu a he bua hi.
13 Tuasia ciang kumpipa in naseamte munah, ‘Hisia pa a khut a peang sawmcip vun a, doipua khuazingna ah vawk tavun. Tua munah ama kapin ha ngoai tu hi,’ ” ci hi.Ref 22:13 Mt 8:12; 25:30; Lk 13:28
14 Jesus in a thukhupna ah, “Tam mama kisam tu a tawm bek kiteal tu hi,” ci hi.
Shia Piakna huvau Kidokna
(Mark 12:13-17; Luke 20:20-26)
15 Pharisee te pai a, kam doknate taw Jesus aitaa sawm uh hi.
16 Tua zawkciang amate in, a nungzuite pawlkhat le Herod mihingte pawlkhat paisak uh hi. “Sya awng, thumaan na son hi ci in hong he khu hi. Pathian ii mihingte atu a deisak thutakte, mihingte in bang ngaisun ci patau ngawlin na hil hi. Banghang ziam cile mihingte maitang na zakta bua hi.
17 Bangbang ngaisun ni ziam?, Rome Kumpilianpa shia ih piak tu sia, ih Thukham taw kisi ziam, kisi ngawl ziam? hong son tan?” ci uh hi.
18 Ahihang Jesus in amate thinsung ah, thusia a sawmna, he ahikom, “A kihitheamsakte awng! banghangin hong aitaa nu ziam?
19 Shia piak tu sumtang sia hong lak tavun,” ci hi.
Amate in sumtang a kungah paipui uh hi,
20 Jesus in, “Hite akua lim le akua min ziam?” ci in dongh hi.
21 “Kumpilianpa aa hi” ci in zo uh hi.
Tua ahikom Jesus in, “Pha hi, Kumpilianpa sum sia Kumpilianpa na pia vun a, Pathian sum sia Pathian na pia vun,” ci hi.
22 Hi thu a zaak uh ciangin amate in lamdang sa uh hi; tua ciangin ama nusia in paisan uh hi.
Thina pan Thaw kikna Thu dokna
(Mark 12:18-27; Luke 20:27-40)
23 Tua ni in Sadducee te pawlkhat Jesus kungah hong pai uh a, “Mihingte in thina pan tho kik ngawl tu hi,” ci uh hi.Ref 22:23 Sawl 23:8
24 “Syapa awng, Moses ii cina panin, pasal khat sia ta nei ngawlin a thi le a suapuipa in meingongnu sia teenpui tahen, tua hile ta a nei uh ciang, mithipa ta bangin, kingaisun tu hi.Ref 22:24 Thkna 25:5
25 Tu in hi sungah unau pa sali om ngei hi. A lianbel sia in zi nei in ta nei ngawlin thi a meingongnu sia, a suapuipa in lua hi.
26 Tuabang ma in a niina a thumna panin kipan a salina dongin ta nei ngawlin thi uh a, meingongnu lua susuk uh hi.
27 A khakbel ciangin meingongnu zongh thi hi.
28 Tu in mithite thaw kik ni ciangin tua numei sia akua ii zi hi tu ziam? A vekpi in ama teenpui ngei tek hi,” ci uh hi.
29 Jesus in, “Pathian ii vaangletna le Laithiangtho na heak ngawl uh hu in bangza in khial nu ziam!
30 Banghang ziam cile mithite a thaw kik ciang, vantung ah a om vantunglalangte bang hi tu a, kiteenna om ngawl tu hi.
31 Tu in mithite thaw kikna thu, Pathian hong son thute sim ngeingawl nu ziam? Ama in,
32 ‘Keima in Abraham ii Pathian, Isaac ii Pathian, Jacob ii Pathian ka hi hi,’ ci hi. Ama in a nungtate Pathian hi a, a thisate Pathian ahi bua hi,” ci hi.Ref 22:32 Pu 3:6
33 Mihonte in hi thu a zaak uh ciangin, a hilnate lamdang sa uh hi.
A Lian Thupiakna
(Mark 12:28-34; Luke 10:25-28)
34 Sadducee te a pau natu a heak ngawl dongin, Jesus in a koi zawkciang, Pharisee te hong kikhawmtua uh a,
35 amate sung panin, Thukham hil sya khat in, Jesus sia thudokna khat taw aitaa sawm hi.Ref 22:35-40 Lk 10:25-28
36 “Sya awng, Thukham sung teng pan a lianbel le a thupibel thupiak sia koisia ziam?” ci in dongh hi.
37 Jesus in, “ ‘Na Topa Pathian sia na thin theampo, na thaa theampo le na ngaisutna theampo taw it in.’Ref 22:37 Thkna 6:5
38 Hisia in a lianbel le a thupibel Thupiak ahi hi.
39 A niina a thupibel Thupiak sia tuasia taw ma in kibang hi: ‘Nangma le nangma na ki it bangin midangte zongh na it in.’Ref 22:39 Thiam 19:18
40 Moses Thukham buppi le kamsaangte hilna theampo sia hi thu niite kibulphu hi,” ci hi.
Messiah huvau Dokna
(Mark 12:35-37; Luke 20:41-44)
41 Pharisee te pawlkhat a kikhop uh ciangin Jesus in,
42 “Messiah huvau bangbangin ngaisun nu ziam? Ama akua ii suan ziam?” ci in dongh hi. “Ama sia David suan hi,” ci uh hi.
43 Jesus in “Tua ahile banghangin Thaa in David munah, ‘Topa’ cisak ziam?” ci in dongh hi. David in,
44 ‘Topa in ka Topa munah:
Na ngalte na peang nuai ah ka koi dong,
hi sung ka ziatsang ah hong to ta'n,’ ci hi.Ref 22:44 Ps 110:1
45 “David in ama sia ‘Topa’ ci ahile Messiah sia bangbangin, David ii suan hi thei tu ziam?” ci in Jesus in zo kik hi.
46 Jesus dokna kuama in a zo thei bua uh a, tua ni pan kipan kuama in ama thu a dongh ngam nawn bua uh hi.