21
Zawna taw Jerusalem Khua sung Tumna
(Mark 11:1-11; Luke 19:28-40; John 12:12-19)
1 Jesus le nungzuite in Jerusalem khua hong nai uh a, Olive Mual, Bethphage a kicina mun hong theng hi. Tua munah Jesus in, a nungzuite nii sawlin paikholsak a,
2 hi bangin thupia hi; “Na mai a om khuano sia ah pai tavun, tua munah laapui khat kikhii in om thakhat thu in na mu tu uh a, laano zongh a pui kungah om tu hi. A khau suutin a nii in keima kungah hong paipui tavun.
3 Tuaciang khat po in, bang khat po hong cile ‘Topa in tulmaw hi’: ci po le uhte thakhatin hong tha tu hi,” ci hi.
4 Hi bangin a pian theina sia kamsaangpa sonna teng a taangtut natu ahi hi.
5 “Zion khuapi munah son vun,
En vun, na kumpipa
no kungah hong pai hi!
Ama kiniamkhiak in
laa tungah to a,
laapui ii ta laano tungah to hi.”Ref 21:5 Zec 9:9
6 Tua ahikom nungzuite in Jesus sawl bangin pai in vawt uh hi:
7 laa le laano hong paipui uh a, a laktong puasilh uh dapin, Jesus sia a tungah to hi.
8 Mihonpi in a laktong puasilh uh lampi ah pha in a dangte in thingsawl saatin, lam tungah pha uh hi.
9 Jesus mai le a nung panin a pai mihonte in, “David Tapa minthang hen! Topa min taw hong pai pa tungah Pathian in thupha pia tahen! Hosanna, Pathian in pokna nga tahen!” ci in au uh hi.Ref 21:9 Ps 118:25-26
10 Jerusalem khua sungah Jesus hong tum ciang, a khuathing ngamlum lialua uh hi. “Ama sia akua ziam?” ci in mipite in dongh uh hi.
11 “Hisia pa sia Galilee ngam Nazareth pan kamsaangpa Jesus hi,” ci in mihonte in zo uh hi.
Jesus Biakinn ah Pai
(Mark 11:15-19; Luke 19:45-48; John 2:13-22)
12 Biakinn sungah Jesus tumin vanh lei vanh zuak theampo notkeak hi. Sum theakte ii sabuai le vakhu zuakte ii tokhumte sawnthalsak hi,
13 tuaciang, “Laithiangtho sungah Pathian in, ‘Ka Biakinn sia thungetna inn’ kici tu hi, ci hi, ahihang note in ngutate bukna na suaksak uh hi!” ci hi.Ref 21:13 Is 56:7; Jer 7:11
14 Mittaw le peangbai te Biakinn sung ama kungah hong pai uh a, amate damsak hi.
15 Thiampi liante le Thukhamhil syate in, Jesus ii nalamdang a vawt hu le, patangte ii “David Tapa tungah Hosanna, kipok tahen!” a ci hu in amate thin uuk hi.
16 Tua ahikom amate in Jesus munah, “Amate in bang teng ci ziam, na za ziam?” ci in dongh hi.
“Ka za takpi hi, laithiangtho sungah sim ngeingawl nu ziam? ‘A cialcing pokna a pia thei tu in Patangte le nausente na sinsak zo hi,’ ” ci in Jesus in zo hi.Ref 21:16 Ps 8:2
17 Jesus in amate nusia in Bethany zuan tu in, khuapi puasia ah paisuak a tua munah zantaam hi.
Jesus in Theikung Haamsiat
(Mark 11:12-14;20-24)
18 Zingtuungin khua sung sang hong zot kik ciang, Jesus a ngilkial hi.
19 Ama in lamhui ah theikung khat mu in vil a, ahihang a tee simngawl bangma a mu bua hi. Tua ahikom thingkung tungah, “Nang sia nga kik thei nawn ngawl tu ni hi!” ci hi. Thakhat thu in theikung kongaw cip paih hi.
20 Nungzuite in a mu ciangin lamdang sa uh hi. “Banghang hi za in kocip paih thei ziam?” ci uh hi.
21 Jesus in “A tatakin kong ci ciang, um in muang la bua po le uhte hi thei tungah ka vawt bangin na vawt thei tu uh hi. Hisia bek zongh hi ngawlin, hi mual munah, ‘Tho to in a, tuipi sungah kilawnsuk in,’ ci le uhte, tuabang ma in hong hi tu hi.Ref 21:21 Mt 17:20; 1 Cor 13:2
22 Na um uh le thungetna taw na nget uh po na nga tu uh hi,” ci hi.
Jesus Thuneina huvau Dokna
(Mark 11:27-33; Luke 20:1-8)
23 Biakinn sungah Jesus heak kik a, hilna a nei ciangin, thiampi liante le upate in, “Hi bang na sep thei natu in bang thuneina nei ni ziam? Akua in hi thunei theina hong pia ziam?” ci in dongh uh hi.
24 Jesus in, “Kei zongh kam khat hong dongh tu khi hi, tuasia nong zo thei uh le a bang thuneina taw hite seam khi ziam cisia kong son tu hi,” ci in zo kik hi.
25 “John ii baptize piak theina thu sia, koisung pan hong pai ziam? Pathian tung pan ziam maw mihing tung pan ziam?” ci hi.
Amate teng kinial uh a, “Bangbang ci tu hi ziam? ‘Pathian tung pan ci tu hi leang, tua ahile banghangin John sia um ngawl nu ziam?’ hong ci tu hi.
26 “Ahihang ‘mihing tung pan’ ci thong leang, mipite kiitakhuai hi, banghang ziam cile amate theampo in John sia kamsaang khat hi ci in saang hi,” ci uh hi.
27 Tua ahikom amate in Jesus munah, “He ngawl khu hi,” ci uh hi. Tuasia ciangin, amate tungah Jesus in, “Kei zongh hite bang thuneina taw vawt khi ziam ci in kong son buatu hi,” ci hi.
Tapa Niite taw Thusonteena
28 “Tu in hi thu bangbang na ngaisun uh ziam? Khatvei lai in pasal khat in tapa nii nei hi. A tapa lianzaw sia kungah ama pai in, ‘Ka tapa awng, sapithuan ah tu ni in na kuan ta'n,’ ci hi.
29 Ama in, ‘Uuk ngawl khi hi’ ci napi a zawkciangin a thin kikheal kik in kuan hi.
30 Tua zawkciang a pa in a tapa dang khat sia munah tuabang ma in sawl hi. Tua a tapa in, ‘Pa awng, hi tahen,’ ci napi a kuan bua hi.
31 Tapate nii sung pan akua in a pa thu ni zaw ziam?” ci hi.
“A tapa lianzaw sia in ni zaw hi” ci uh hi.
Tuaciang Jesus in amate tungah, “Kei kong ci in ah: Shiadongte le numei paktatte in Pathian Ukna ngam sungah note sangin theng masa zaw tu hi.
32 Banghang ziam cile Tuiphumpa John hong pai a, thumaan lampi hong hil napi, ama na um bua uh hi; ahihang shiadongte le numei paktatte in um uh hi. Hite na mu zawk ngawngawn in, na thin uh kikheal in na um nuam bua uh hi.”Ref 21:32 Lk 3:12; 7:29-30
Sapit huan A Saapthawte Thusonteena
(Mark 12:1-12; Luke 20:9-19)
33 Jesus in “Thusonteena dang khat ngai vun,” ci hi. “Khatvei lai in leitang nei khat in, sapithuan khat vawt a, a kiimkot dal vawtin, sapittui suuk natu dum to a, lo hun natu teitaan khat vawt hi. Tua zawkciang a lo tuasia saapthawsak tu in, ngual a aap zawkciang, ama khualhaw tu in ding hi.Ref 21:33 Is 5:1-2
34 Sapit nga law hun ciangin, ama tel tu teng a saang tu in, huanthote munah a silate paisak hi.
35 Huanthote in silate man a, khat sia saatin, khat sia that uh a, khat sia suangtum taw deang uh hi.
36 Leitang neipa in a silate a tamzaw paisak leleau hi, ahihang huanthote in a masate tungah a ngamtat uh bangma in, taa kik uh hi.
37 A khakbel ciangin, ‘Ka tapa buang hong zataksak tu zam,’ ci in, a tapa sawl hi.
38 Ahihang huanthote in a tapa a mu uh ciangin, ‘Hisia huan neipa tapa hi. Hong pai tavun, thatlum tu hi; tua hile a neisa teng ih tang thei tu hi!’ ci uh hi.
39 Tua ahikom ama man in, sapithuan pua sangah a lot zawkciang, thatlum hi.
40 “Tu in huan neipa sia sapithuan sungah hong pai tak ciangin huanthote bang law tu ziam?” ci in Jesus in dongh hi.
41 “Ama in tua misiate thatlum nanak tu a, a hun zui in, thaw ante, ama saan tu bangin a pia tu ngualdangte tungah sapithuan sia saapthaw tu in aap tu hi,” ci in zo hi.
42 Jesus in, “Laithiangtho ci thu sia sim ngeingawl nu ziam?
‘Inn sate ii mannung ngawl
a sak a nil suangtum sia
a kizanghbel suangtum
hong suak hi.
Hi thu in Topa ii nasep na hi a;
ih mu ciangin lamdang mama hi!’Ref 21:42 Ps 118:22-23
43 “Tua ahikom kong ci hi, Pathian Ngam sia no kung pan in, kila tu a, nga pha a piangsak mihingte tungah kipia tu hi.
44 Hi suang tungah a taak sia akua po ahizong zaantham in vui tu hi; tua suang sia khat po ii tungah a taak ahile tua pa zaantham in thi tu hi.”
45 Pharisee te le thiampi liante in Jesus thuson nate za uh a, amate a cinopna ahi hunlam tel uh hi.
46 Tua ahikom ama sia mat sawm uh a, ahihang amate in mihonpite kiita uh hi, banghang ziam cile amate in Jesus sia kamsaang khat hi ci in ngaisun uh hi.