5
Hesuak natu Thungetna Khat
1 Topa awng, ko tungah hong piang thute phawk in.
Kote hong en ta'n a, ka maizumna uh mu in.
2 Kote neisa sia khualmite khut sungah om a;
ngamdangmite sia koma inn sungah teang uh hi.
3 Koma pate sia ngalte in thatlum zo a,
tu in koma nute sia meingong suak uh hi.
4 Kote dawn tu tuite
man piak kul a,
kote thu tu thingkangte lei kul hi.
5 Kalaohte le laate bangin hong kihawl ngawp a,
toi mama hikale ung hong tawlngasak ngawl hi.
6 Nuntak khom natu an ka nga natu uh in
Egypt le Assyria ah an ngenin ka pai uh hi.
7 Koma taanghpupite mawna hi a;
ahihang tu in amate om nawn ngawl hi,
amate mawna hu in kote in ngimna ka thuak uh hi.
8 Silate sangin a phazaw tuan ngawl mihingte in ko hong uk a,
amate khut sung pan kuama in hong hun zo ngawl hi.
9 Ngam sungah mithatte vak kawkoai a,
an ka zon uh ciang, luangkhaamin ka zong uh hi.
10 Ngilkialna in ka ci uh hong suuksak a,
koma vunte meikhuk bangin a sat dong ka thuak uh hi.
11 Zion Mualtung mama ah koma zite hong buansak uh a;
Judah ngam khuano theampo ah koma tanute zothaw in
12 Koma ii lampuite hong matsakin ngui awksak a;
koma ii pasal huaite hong zataksak bua uh hi.
13 Koma ii tangvalte sia silate bangin zawthawk thu taw an ngoaisak uh a;
patangnote sia a thing puak uh khopin hoi vatut uh hi.
14 Khanghaamte khuapi kongpi ah to nawn ngawl a,
khangmoite sia tengtongh tum nawn ngawl uh hi.
15 Kote nuntakna sungah lungdamna bo zo a;
kote ngualnop lapna teng sia khuangaina taw kilaih zo hi.
16 Ko kiphatsakpui nate khat zongh taang nawn ngawl hi.
Kote ka maw uh a,
17 Kote ii ka thin ka lung mama uh na a,
ka thituite uh hangin
pha tak khua ka mu thei bua uh hi,
18 Zion Mual sia ngamkhing ngamdai in kinusia ahikom
tua a kisia sa munte ah ngam uite vak hi.
19 Ahihang Topa awng, nangma sia
a tawntung kumpipa na hi a,
hun tawp dongin na uk tu hi.
20 Banghangin tu tanvei kote hong nusia ni ziam?
Kote nong phawk kik ngei tu ziam?
21 Na kungah
ko hong ciapui kik ta'n,
Topa ! Hong ciapui kik ta'n!
Taanghlai in koma minthanna teng hong pia kik ta'n!
22 Tua ahibuale kote a tawntungin hong nial tu ni ziam?
Na thin uukna in ciangtan nei ngawl ahi ziam?