12
Judah Kumpipa Joash
(2 Khangtaanghthu 24:1-16)
1 Israel ah Jehu Kumpipa a maan zawk a kum salina ciang Joash sia Judah te ii kumpipa suakin, ama in Jerusalem panin kum sawmli sung uk hi. A nu sia Beersheba khua panin Zibiah ahi hi.
2 A khan tawntung ama in Topa ii diksak tu bebekin ngamta hi, banghang ziam cile Jehoiada thiampipa in ama hil hi.
3 Ahitazong doai biakna munte kisusia ngawl a, tuaciang mihingte in sangaw biakpiakna le ngimnamtui halna te tua munah vawt tan lai uh hi.
4 Joash in thiampite sam a, Biakinnpi sungah sangaw biakpiakna tungtaang sum a kipiate, hun maan a sangaw biakpiakna tung pan sumte ahizong amate tungah a thin zawna taw piakte ahizong, tua sumte a top natu in thupia hi. Ref 12:4 Pu 30:11-16
5 Thiampi sim in ama ii sepsak mite tung pan a nga uh sumte vaipuak in a laak natu le a kisamh bangin Biakinnpi puua natu a kizak natu in thupia hi.
6 Ahihang Joash ii maan zawk a kum 23 dong sia thiampite in Biakinnpi puuana khat zongh nei ngawl uh hi.
7 Tua ahikom ama in Jehoiada le a dang thiampite samin, “Banghangin Biakinnpi puua ngawl nu ziam? Tu pan kipan sum na saan uhte noma keam nawn ngawl tu nu hi; Biakinnpi puua natu in aap tu nu hi,” ci in sawl hi.
8 Thiampite lungkim uh a, Biakinnpi amate ii puua kul ngawl tu sia zongh thukim uh hi.
9 Tua zawkciang Jehoiada in thingkuang khat la in, a sitna tungah a hawng khat vut hi, tuaciang a thingkuang sia biaknatau ii kung, Biakinnpi sung tumna ii ziatsang ah koi hi. Tumna munah vaipuak a nei thiampi sia in biakpiakna a piate ii sum theampo thingkuang sungah khia hi.
10 Thingkuang sungah sum tam a om simin kumpipa ii thuzeakpa le Thiampi Lianbelpa hong pai in, ngunn teng a tui thapsak zawkciang khai tee uh hi.
11 A pha za tatak a kiteptee zawkciang Biakinnpi sung nasepte a ukpa tungah a ngunnte aap in, tua pa in lettamate, inn sate,
12 uksuang ciangte, suang at te pia in, inn puua natu in a kisamh thing le suangte theampo lei a, a dang zak tu a kisam theampo pia uh hi.
13 Ahizong a sumte sung panin ngunn haite, kuangte, lemle te, meiinn taw kisai vanhzakte, ngunn le khamh taw a kivawt vanh te ii manh tu in kizangh ngawl hi.
14 Tua sumte sia naseamte thaman le biakinn puuana sung a kizangh vanhte leina bekin kizangh hi.
15 Tua nasep taw kisai in a ukte sia thumaan takpi ahikom tua sumte tungtaang ah sazian koi kul ngawl hi. Ref 12:15 2 Kum 22:7
16 Khialphel biakpiakna le mawphel biakpiakna atu a kipia sumte sia thingkuang sungah kikoi ngawl hi; tuate sia thiampite neisa ahi hi. Ref 12:16 Thiam 7:7
17 Tua hunin, Syria te ii Kumpipa Hazael in Gath khuapi simin zo hi; tua zawkciang ama in Jerusalem sim tu sawm hi.
18 Judah te Kumpipa Joash in ama ii mai ah a maang Jehoshaphat, Jehoram, le Ahaziah te ii Topa tungah a aapsa uh piakkhiatnate la in ama ii piakkhiatna taw ngawm a, Biakinnpi sung le kumpi inn sungah khamh theampo taw kop in Kumpipa Hazael letsongin a piak ciang, tua kumpipa in a ngalkapte Jerusalem panin leidang zot pui hi.
19 Kumpipa Joash ii a sep a vawt a dang theampo sia Judah Kumpite Taanghthu sungah kikhum hi.
20-21 Kumpipa Joash ii uliante in ama thalup sawm uh a, tuate sung pan nii, Shimeath ii tapa Jozacar le Shomer ii tapa Jehozabad in Jerusalem nisuana sangah lei kihukna mun Silla paisukna lampi tungah a kisa inn sia sungah thatlum uh hi. Joash sia David ii Khuapi sung kumpi thaan ah kiphum a, a tapa Amaziah in a kumpipa za laih hi.