11
Judah te ii Kumpinu Athaliah
(2 Khangtaanghthu 22:10—23:15)
1 Kumpipa Ahaziah ii nu Athaliah in a tapa ii kisuamlupna a zaak po ciang kumpipa innkuan pui theampo thalup natu thupia hi.
2 Ahaziah ii tapa Joash bekma suakta hi. Ama sia a dangte taw kithatlum dektak a, ahihang a ni Jehosheba in suatak hi, tua nu sia Kumpi Jehoram ii tanu hi a, Ahaziah ii suapui sealh ahi hi. Ama in Joash sia a keam nu taw la in Biakinnpi sung lupna inndoi khat sungah koi a, kithalup ngawl natu in Athaliah ii mu natu pan seal hi.
3 Kum luk sung Jehosheba in patangno sia biakinn sungah Athaliah ii Kumpinu a sep sung theampo phual hi.
4 Ahihang a kum sali na ciangin thiampi Jehoiada in kumpipa a cingte le kumpi inn a cingte a uk uliante Biakinn ah samin, ama ii ngealna bang a ngamtat nop natu kiciamna taw thukimna vawtsak hi. Ama in Kumpipa Ahaziah ii tapa Joash amate lak hi,
5 tuaciang hi thupiakna teng pia hi: “Sabbath ni in vaipuak la tu in nong pai uh ciang, no sung pan see thum sua see khat in kumpi inn cing tu nu hi;
6 a dang see thum sua see khat sia Sur Kongpi cingin om tu nu hi, tuaciang a om lai see thum sua see khat te inn kongpi ah kong cingte nung pan cing sawn tu nu hi.
7 Sabbath ni a vaipuak nei ngawl a om pawl nii te sia kumpipa hung tu in Biakinnpi ah a cingin om tu nu hi.
8 Kumpipa Joash sia noma in namsau daw sa in cing tu a, ama ii paina theampo ah ama ompui tu nu hi. No ii nai ah hong pai khat po a om le thatlum tu nu hi,” ci hi.
9 Uliante in Jehoiada ii hil bangin ni a, a mite ama kungah paipui hi — Sabbath ni a vaipuak nei ngawlte le vaipuak neite paipui uh hi.
10 Ama in uliante sia David ii neisa, Biakinnpi sungah a kikeam tei le lum te pia a,
11 tuaciang ama in kumpipa cing tu in ngalkapte sia a namsau daw sa in Biakinn mai kiimkot ah koi hi.
12 Tua zawkciang Jehoiada in Joash pusua pui in, kumpilukhu a lu tungah koi a, kumpite ii zak tu thukham laibu bu khat Joash pia hi. Tua zawkciang Joash sia sathau noai in kumpipa hi ci in taangko uh hi. Mipite in a khut uh beang uh a, “Kumpipa a khansau tahen!” ci uh hi.
13 Kumpinu Athaliah in a cing ngalkapte le mipite ii awsa za ahikom, mihonpi kikhawm in a omna Biakinnpi ah manlang in pai hi.
14 Ngeina om bangin kumpipa thak sia Biakinnpi tumna khuampi kungah dingin a om sia kumpinu in mu hi. Ama sia uliante le lemle tumte in kiim uum uh a, mipite a vekpi in lungnuam takin au in, lemle tum uh hi. Athaliah in a puansilh baltham in, “Hong leeheak hi! Hong leeheak hi!” ci in au hi. Ref 11:14 2 Kum 23:3
15 Jehoiada in Athaliah sia biakinnpi huang sungah a kithalup tu oai ngawl ahikom ama in ngalkap uliante munah: “A ngual a ngualin a cingte kilaklaw panin ama la in paipui vun, ama suatak a sawm pawpo that vun,” ci in thupia hi.
16 Amate in Athaliah manin, kumpi inn ah paipui uh a, tua mun Siphu Kongpi ah ama thatlum uh hi.
Jehoiada ii Ngam puua kikna
(2 Khangtaanghthu 23:16-21)
17 Thiampi Jehoiada in Kumpipa Joash le mipite, Topa ii mite a sua natu in Topa taw thuciamna vawtsak hi; ama in kumpipa le mipite kilaklaw ah zongh thuciamna vawtsak hi.
18 Tua zawkciang mipite in Baal ii biakinn ah pai uh a, biakinn baltham uh hi; amate in biaknataute le milimte saat tham uh a, tuaciang Baal ii thiampi Mattan sia biaknatau ii mai ah thatlum hi.
Jehoiada in Biakinn ah a cingte koi in,
19 tua zawkciang ama sia ngalkap uliante, kumpipa a cing ngalkapte, le kumpi inn a cingte in kumpipa sia Biakinnpi pan kumpi inn ah paipui uh a, mihonpite in zui uh hi. Joash in Cinna Kongpi panin tumin, kumpi tokhum tungah ama ii mun hong la hi.
20 Mipi theampo sia lungdam uh a, kumpi inn sungah Athaliah zongh kithat zo ahikom khuapi sung sia ngamdai in om uh hi.
21 Joash sia kum sali a phak laitakin Judah te kumpipa suak hi.