21
Naboth ii Sapit Huan
1 Jezreel khua sung Kumpipa Ahab ii kumpi inn hui ah Naboth a kici pasal khat ii sapithuan om hi.
2 Ni khat ni in Ahab in Naboth munah, “Na sapithuan kei hong pia ta'n; ka kumpi inn taw kinai a, tua leitang sia antee lamsang ciin na huan tu dei khi hi. Sapit huan a phazaw khat hong pia tu khi hi, ahibuale na deizaw le a man kilawm khat hong pia tu khi hi,” ci hi.
3 Naboth in, “Hi sapithuan sia ka taanghpupite tung pan ka luasuk hi a, Topa in nang kong piak tu hong khaam hi,” ci in zo kik hi.
4 Ahab inn ah cia a, Naboth ii kampau teng hu in thin uukin a thinnuam ngawlin om hi. A lupna tungah lum a, pang sang nga in an ne nuam ngawl hi.
5 A zi Jezebel sia ama kungah pai in, “Banghangin tuaza in na thinnuam ngawl ziam? Banghang an ne ngawl tu ni ziam?” ci in dongh hi.
6 Ama in, “Naboth ii kei tungah hong ci teng hang hi. A sapithuan lei tu in ka paupui a, a uuk le zong huan dang khat piak tu in ka ci hi, ahihang ama in tua huan sia na neisa suak thei ngawl tu hong ci hi!” ci in zo hi.
7 Jezebel in, “Tua le, nang kumpipa ni ziam maw hi ngawl ni ziam? Na lupna pan tho in, na maitaisakin a, an ne in. Naboth ii sapithuan keima hong ngasak tu khi hi,” ci in zo kik hi.
8 Tua zawkciang ama in laithak pawlkhat at in, Ahab min bul a, tazeik tuum in, Jezreel khua a uliante le lampuite thaak hi.
9 A laithakte sungah: “An tan ni khat taangko vun, mipite sam vun, tuaciang Naboth sia upat vawt vun.
10 Mihing pha ngawl nii in a maitang panin Pathian le kumpipa a haamsiatna huvau mawsuansak vun. Tua zawkciang khuapi puasia ah paipui in suangtum taw deanglum vun,” ci hi.
11 Jezreel khua uliante le khua mi lampuite in Jezebel ii thupiak bangin ngamta uh hi.
12 Amate in antan ni khat taangko in mipi sam a, Naboth sia upat vawt uh hi.
13 Misia te nii in ama sia mipi mai ah Pathian le kumpipa haamsiat hi ci in mawsuanh hi, tua ahikom ama sia khuapi puasia ah kipaipui in suangtum taw kideanglum hi.
14 Jezebel tungah kam kithaak a: “Naboth kithatlum zo hi,” ci hi.
15 Jezebel in kam kithaak sia a nga po ciang, Ahab munah, “Naboth sia thi zo hi. Tu in a sapithuan nang hong zuak nop ngawl sia la in tang in,” ci hi.
16 Thakhatin Ahab pai in sapithuan sia a neisa tu in la hi.
17 Tuaciang Topa in Tishbe panin kamsaangpa Elijah munah,
18 “Samaria ah Kumpipa Ahab kungah va pai ta'n. Ama sia Naboth ii sapithuan sungah tua huan sia a neisa sua tu in kithoai na mu tu hi.
19 Ama munah son in, keima Topa in ama munah, ‘Pasalpa na suamlup zawkciang a neisa la tu in kithoai lalai ni ziam,’ ci khi hi. Ama tungah hi teng son in: ‘Naboth ii chisan uite ii a lia na mun ma ah nangma chisan zongh tua uite in liak tu hi!’ ci in son ta'n,” ci hi.
20 Ahab in Elijah a mu ciang, “Ka ngal pa awng, kei hong pha zo ngawngaw ni ziam?” ci hi.
Elijah in “Hi hi, hong pha zo khi hi,” ci in zo hi. “ Topa muna ah khialna hi teng na vawt natu in nangma le nangma kipumpiak ni hi.
21 Tua ahikom Topa in, ‘Tuasiatna nang tungah kong piangsak tu hi. Nangma le na innkuan sungah pa a minpiang a haam a moi theampo kong heam siat tu hi.
22 Na bangkua sia Nebat ii tapa Kumpipa Jeroboam bangkua bang hi tu a, Ahijah ii tapa Kumpipa Baasha ii bangkua bang hi tu hi, banghang ziam cile nangma in ka thin uuk natu in nong sau a, Israel te sia mawna sungah lam na pui hi,’ hong ci hi.
23 Topa in Jezebel taw kisai in, a luang Jezreel khuapi sungah ui in ne tu hi, ci hi. Ref 21:23 2 Kum 9:36
24 Na mealheakte khuapi sungah a thite ui in ne tu a, ngam taanzauna munah a thite vaciik in ne tu hi,” ci hi,
25 Topa muna ah Ahab bangin khialna vawt natu a kipumpiak kuama dang om ngawl hi — tua theampo a zi Jezebel ii hanthotna panin piang ahi hi.
26 Israel mite maisang a nawk lai in ngamsung pan Topa ii nawkeak Amor te ii biak bangma in ama in milim biakna taw maizumhuaibel mawnate vawt hi.
27 Elijah ii a pau tu teng a man ciang Ahab in a puansilh lai te baltham in, suut a, khau-ip puan silh hi. Ama in an ne ngawlin khau-ippuan te taw lum a, mainuu in thin lalin vavak hi.
28 Topa in kamsaangpa Elijah munah,
29 “Ahab in keima mai ah bangzata kiniamkhiak in a om sia na mu ziam? Hi bangin ngamta ahiciang ama khan sungah tuasiatna piangsak ngawl tu khi hi; a tapa ii khan sung in Ahab bangkua sungah tuasiatna piangsak tu khi hi,” ci hi.