20
Syria te taw Kidona
1 Syria kumpipa Benhadad in a ngalkap theampo khawm a, ngam uk 32 te ii huna siphu le siphu ngalleang te taw kuanto in Samaria khuapi uumci in sim hi.
2 Ama in khuapi sungah kamtaite paisak in Israel kumpipa Ahab munah, “Kumpipa Benhadad in
3 ama tungah na ngunn, na khamh, na numeite le na tate a hatbel teng taw na lut tu hong tangkal hi,” ci hi.
4 Ahab in “Kumpipa Benhadad ka topa munah ka lungkimna thu son tavun; ama in kei le ka neisa theampo tang thei hi,” ci in zo hi.
5 A zawkciang kamtaite in, Benhadad tung pan ngetna dang khat taw Ahab kungah hong heak kik uh hi. “Na ngunn, na khamh, na numeite le na tate nong aap natu kam hong thaak khi hi.
6 Ahizong tu in, ka uliante kong paisak tu a, na kumpi inn le na uliante ii innte tok in, manpha a sak theampo la tu hi. Amate zing ciang tubang hun khawngin hong theng tu hi,” ci hi.
7 Kumpipa Ahab in ngamsung a lampui theampo samin, “Na mu uh hi a, hisia pa in ei hong susia nuam hi. Ama in kam hong thaak a, ka zite ka tate le ka ngunn ka khamh teng hong ngen hi, tuaciang kei lungkim khi hi,” ci hi.
8 Lampuite le mipite in, “Ama bangma awlmaw heak in; lut heak in!” ci in zo hi.
9 Tua ahikom Ahab in Benhadad ii kamtaite munah, “Hong nget masak teng thukim khi hi, ahihang a niina sia thukim zo ngawl khi hi, ka topa kumpipa munah va ci tavun,” ci in zo kik hi.
Kamtaite va pai a, tua zawkciang hong heak kikin
10 Benhadad tung pan kamthaak dang khat hong keng hi: “Na khuapi hisia a susia zo tu le amate khut tek taw suangbek teng a vawk siat zo tu mihing a khom kong paipui tu hi. Tuabangin ka ngamta bua ta le pathiante in hong vaatlum tahen!” ci hi.
11 Kumpipa Ahab in, “Kumpipa Benhadad munah son tavun a, ngalkap citak khat in ngal kido zawkciang kisuangtaak pheang a, kido ma in kisuangtaak ngawl hi,” ci in zo hi.
12 Benhadad in Ahab ii zona kam sia ama le a kipawlpui ngamuk dangte taw a puanbukte sungah zu a neak laitakin kison hi. Ama in a mite, khuapi sim tu kinging in sawl a, tua ahikom amate sia dinmun la tu in kuan uh hi.
13 Tua laitakin kamsaang khat Kumpipa Ahab kungah hong pai a, “ Topa in, ‘Tua ngalkap hon lian sia kiita heak hen! Tuni in tuasia nangma in kong zosak tu hi, tuasia ciang keima Topa ka hi hunlam nong he tu hi,’ ” ci in son hi.
14 Ahab in, “Akua in kidona lampui tu ziam?” ci in dongh hi.
Ngamkhen uk mangte ii nuai ah a seam khangmoi ngalkapte in lampui tu hi “ Topa in ci hi,” ci in kamsaangpa in zo hi.
Kumpipa in, “Ngalkaphonpi sia a kua in uk tu ziam?” ci in dongh hi.
“Nangma,” ci in kamsaangpa in zo hi.
15 Tua ahikom kumpipa in ngamkhen uk mangte ii nuai a ngalkap khangmoi te sam a, a vekpi sia 232 pha hi. Tua zawkciang ama in Israel ngalkaphonpi sam a, a vekpi in 7,000 pha hi.
16 Kisimna sia sun laitakin kipan a Benhadad le a pawlpui 32 te a puanbukte sungah zu khamin a om laitak ahi hi.
17 Ngalkap khangmoite kuan masa uh hi. Benhadad ii paisak ngalvilte in Samaria pan ngalkap pawlkhat hong pai hi ci in ama tungah ko uh hi.
18 Ama in thupia a, “Hong sim tu in hong kuan ahizong, kilemna ngen nuam in hong pai ahizong, amate a nungta in pummat siat vun,” ci hi.
19 Ngalkap khangmoite in kisimna lampui in, Israel ngalkaphonpi in zuisak a,
20 tuaciang mi simin ama ii kido pui tek that hi. Syria te tai in, Israel te in del ngawp paih ahihang Benhadad sia siphu tung to in tai a suakta hi, ama sia siphu ngalkap pawlkhat in tonpui hi.
21 Kumpipa Ahab sia ngalphual ah hong kuan a, siphute le siphu ngalleang te manin, Syria te in nasia takin lel hi.
22 Tua zawkciang kamsaangpa zongh kumpipa Ahab kungah pai a, “Cia kik in a, na ngalkapte puuapha in, tuaciang a pha takin ngealkhol in, banghang ziam cile Syria kumpipa in mai khaal kipat ciang hong sim kik tu hi,” ci hi.
Syria ii Niivei A simna
23 Kumpipa Benhadad ii uliante in, “Israel ii pathiante sia mualpi pathiante hi a, tua hu in Israel te in ei hong zo hi. Ahizong, zaangtam ah simin hi leang zo nanak tu hi hing ci uh hi.
24 Tu in ngamukmang sawmthum le nii te tawpsak in a, ngal a sim ngalkap maangte taw theak in.
25 Tuaciang nang hong taisan sa ngalkapte za in a tam ngalkaphonpi sam in, siphute le siphu ngalleangte zongh tua za ma sam in. Israel te zaangtamna ah ih sim tu a, tu sia ciangin amate ih zo tu hi,” ci hi
Kumpipa Benhadad in amate ii ngaisut piakna sia thukim a, tuabangin ngamta hi.
26 Khaal kipat hun hong thet kik ciangin ama in ngalkapte sam a, Aphek khuapi ah Israel te sim tu in kuan uh hi.
27 Israel te sia kisam a, ngalvanh a cing in a kinguan sa hi; amate a kuan ciang pawl nii in kikhen a. Syria te taw kimaingat in ngiaphual saat uh hi. Israel ngalkapte sia Syria te ngamsung theampo ah a kizel te taw teengat ciang keal hon tawmno nii bang ahi hi.
28 Kamsaang khat Kumpipa Ahab kungah hong pai a, “ Topa in hi bangin ci hi: ‘Syria te in kei sia mualte pathian khat hi a, zaangtam te ii pathian hi ngawl hi hong ci hu in, hi ngalkap hon lian sia kong zosak tu a, tuasia ciang nang le na mite in keima Topa ka hi hunlam nong he tu uh hi, ci hi, ’ ”ci in son hi.
29 Ni sali sung Syria te le Israel te sia kimaitua in a ngiaphual tek ah om uh hi. A ni sali ni ciang amate a kido kipan a, Israel te in Syria te tul zakhat thatlum hi.
30 A suakta lai teng sia Aphek khuapi sungah tai a, a khuapi luphung cimh in, tua 27,000 te tung san ah taak suk hi.
Benhadad zongh khuapi sungah suakta a, inn nung inndoi khat sungah om hi.
31 Uliante ama kungah pai in, “Israel kumpipate sia ngual hesuak thei hi ci in za khu hi, Koma kawng ah khau-ip puan teangin ka ngawng uh ah khauhual te aw in, Israel kumpipa kungah ko hong paisak ta'n, tua hi le ama in na nuntakna hong khoaikhe tha tu hi,” ci uh hi.
32 Tua ahikom amate in a kawngah khau-ip puan teang uh a, a ngawng ah khauhualte vial in Ahab kungah, “Na naseampa Benhadad in a nungta in a suatak natu hong maangkaa hi,” ci uh hi.
Ahab in, “Ama nungta lai ziam? Pha hi! ama sia ka suapui khat bangma hi!” ci in zo hi.
33 Benhadad ii uliante in limpha khat ngaingam in a om laitak Ahab in “suapuipa” a ci poma ciang, amate in thakhatin zawp in, “Na ci bangma in Benhadad sia na suapui pa hi!” ci uh hi.
“Ama keima kungah hong paipui tavun,” ci in Ahab in thupia hi. Benhadad hong thet ciang Ahab in siphu ngalleang sungah a tokhawm tu in sam hi.
34 Benhadad in ama munah, “Ka pa ii na pa tung pan khua a laak teng hong pia kik tu khi hi, tuaciang Damascus khua ah nangma atu sumzuak sum leina phual khat zongh ka pa ii Samaria ah a koi bangin koi thei tu ni hi,” ci hi.
Ahab in, “Hi thukimna tungtawnin nang hong suatak tu khi hi,” ci in zo kik hi. Ama in kiciamna khat vawtin, Benhadad paisak hi.
Kamsaang khat in Ahab Puanil
35 Topa ii sawlna bangin kamsaang pawlkhat sung pan khat in a kamsaang pui khat mun ma ah, ama vua in sawl hi. Ahihang tua pa in nial hi,
36 tua ahikom ama in tua pa tungah, “ Topa ii thupiakna nial na hikom kei nong nusiat po ciang tawpi khat in nang hong thatlum tu hi,” ci hi. Tuaciangin a nusiat po ciang tawpi khat in zui paih a, ama that hi. Ref 20:36 1 Kum 13:24
37 Tua zawkciang tua kamsaangpa ma in a dang khat ii munah, “Hong vua ta'n!” ci hi. Hi sia pa in vua hi; ama in nasia takin vua a liamsua hi.
38 A kimealseal natu in kamsaangpa in a maitang puan taw tuamin pai a, lampi hui ah Israel kumpipa hong kaantan tu ngakin ding hi.
39 Kumpipa hong kaantan ciang kamsaang pa in biakpui a, “Kumpipa awng, ngal ka do laitakin ngalkap khat in a ngal mat khat kei kungah hong paipui a, ‘Hi sia pa cing in; a suakta napo le na nuntakna taw lul tu ni hi, tua ahibuale zong ngunntang tulthum liau tu ni hi, ’hong ci hi.
40 Ahihang vai dang taw komla ka hikom tua pa suakta hi” ci hi.
Kumpipa in, “Nangma le nangma thu kikhen ni hi, daan na thuak kul tu hi,’ ci in zo hi.
41 Kamsaangpa in a maituamna puan eaukeak a, thakhat thu in kumpipa in kamsaang khat ahi hunlam tel paih hi.
42 Tuasia ciang kamsaangpa in kumpipa munah, “Hi sia Topa ii kammal hi: ‘Thalup tu in kong thupiak pa suaktasak na hikom nangma in na nuntakna taw lul tu ni hi, tuaciang ama ii ngalkaphonpi na suataksak hu in nangma ngalkaphonpi kisusia tu hi,’ ” ci hi.
43 Kumpipa sia Samaria a inn ah cia kikin thinngim in a thin kiam hi.